Vadodara news: વડોદરાના હેવમોર સર્કલ પાસે હિટ એન્ડ રનનો પ્રયાસ, પિતા-પુત્રી ઈજાગ્રસ્ત
છેલ્લું અપડેટ : 14 Dec 2025
Vadodara news: શહેરમાં દિન પ્રતિદિન ડ્રિંક એન્ડ ડ્રાઈવના બનાવો સામે આવી રહ્યા છે, જેનાથી શહેરની ટ્રાફિક સલામતી સામે ગંભીર પ્રશ્નો ઉભા થયા છે. ગઈકાલે રાત્રે હેવમોર સર્કલ પાસે નશામાં ધૂત કારચાલકે મોપેડ સવાર પિતા-પુત્રીને ટક્કર મારી ફરાર થવાનો પ્રયાસ કર્યો હતો. જોકે ઘટનાસ્થળે એકત્ર થયેલા ટોળાએ કારચાલકને ઝડપી પાડી પોલીસના હવાલે કર્યો હતો.
ગઈકાલે સાંજે અંદાજે 7:30 કલાકે જુના પાદરા રોડયોગા સર્કલ ખાતે એક કારના ચાલકે મોપેડ સવાર નીલ્પેશ ચૌહાણને અડફેટે લીધો હતો. ટક્કર બાદ કારચાલક બેફામ ગતિએ કાર હંકારતો રહ્યો હતો. ઘટનાને પગલે લોકોએ કારનો પીછો કરી વાસણા રોડ પર મનીષા સર્કલથી બીનાનગર ત્રણ રસ્તા પાસે કારને રોકી પોલીસને જાણ કરી હતી.
જે.પી. રોડ પોલીસે સ્થળ પર પહોંચી તપાસ હાથ ધરી હતી. બ્રેથ એનાલાઈઝર ટેસ્ટમાં કારચાલક ટીકુ વિજેન્દ્ર સિંધ (રહે. દર્શનનગર, કોતરતલાવડી પાસે, માંજલપુર/મૂળ રહેવાસી - ઉત્તર પ્રદેશ) નશામાં હોવાનું બહાર આવ્યું હતું. મોપેડ ચાલક નીલ્પેશ ચૌહાણે જણાવ્યું હતું કે, કારચાલ કે તેમને ટક્કર મારી હતી, જેમાં તેમને તથા તેમની પુત્રીને નાની નાની મોટી ઈજા પહોંચી હતી તેમજ મોપેડને નુકસાન થયું હતું. સદ્દનસીબે બંનેનો જીવ બચી ગયો હતો.
પોલીસે સિગ્નલ તોડીને બેફામ રીતે વાહન હંકારવાના ગુનામાં આરોપી સામે એમ.વી. એક્ટ અને પ્રોહિબિશન એક્ટ હેઠળ ગુનો નોંધી રૂ. 2 લાખની કિંમતની કાર કબજે લીધી હતી.
નશામાં બેફામ કાર હંકારતો ચાલક ઝડપાયો
ગોત્રી પોલીસ ટીમ ગઈકાલે રાત્રે 12:20 કલાકે પેટ્રોલિંગમાં હતી ત્યારે ગોત્રી-ભાયલી રોડ પર ખાનગી મોલ પાસે એક કારચાલક બેફામ રીતે કાર હંકારતો નજરે ચડ્યો હતો. પોલીસે તેને રોકી તપાસ કરતા કારચાલક સચિન નરેશ ગાંધી (રહે. રાજસ્તંભ સોસાયટી, પોલોગ્રાઉન્ડ) નશાની હાલતમાં હોવાનું જણાયું હતું.પોલીસે તેની વિરુદ્ધ એમ.વી. એક્ટ તથા પ્રોહિબિશન એક્ટ મુજબ ગુનો નોંધી રૂ. ૫ લાખની કિંમતની કાર કબજે કરી હતી.
