Video: જેલ છે કે હોટલ? સુરેન્દ્રનગર સબજેલનો વીડિયો વાયરલ થતાં તંત્રના હોશ ઊડ્યા, ASPએ સંભાળી તપાસ

સુરેન્દ્રનગર સબજેલની સુરક્ષા વ્યવસ્થા સામે ફરી એકવાર મોટા સવાલો ઊભા થયા છે. જેલ પરિસરની અંદર કેદીઓ આરામથી સૂતા હોય અને કામકાજ કરતા હોય તેવો એક ચોંકાવનારો વીડિયો સોશિયલ મીડિયામાં વાયરલ થતાં જેલ વિભાગ અને પોલીસ તંત્રમાં ભારે દોડધામ મચી ગઈ છે. ઘટનાની ગંભીરતાને ધ્યાને લઈને ઉચ્ચ પોલીસ અધિકારીઓ દ્વારા તપાસનો ધમધમાટ શરૂ કરવામાં આવ્યો છે.

પ્રાથમિક તપાસમાં બહાર આવેલી વિગતો અનુસાર, આ વીડિયો જૂન મહિના દરમિયાન સબજેલની અંદર આવેલી બેરેકમાં જ મોબાઈલ કેમેરાથી શૂટ કરવામાં આવ્યો હતો. સંવેદનશીલ ગણાતી જેલની અંદર કેદીઓ પાસે સ્માર્ટફોન હોવો અને અંદરથી વીડિયો બહાર આવવો એ સુરક્ષામાં મોટી ક્ષતિ દર્શાવે છે.

ઉચ્ચ કક્ષાએ તપાસનો ધમધમાટ

સમગ્ર મામલે સુરેન્દ્રનગર એ-ડિવિઝન પોલીસ તેમજ એએસપી (ASP) દ્વારા સંયુક્ત રીતે તપાસ હાથ ધરવામાં આવી છે. પોલીસ મુખ્યત્વે નીચે મુજબના મુદ્દાઓ પર ઊંડાણપૂર્વક તપાસ કરી રહી છે. જેલની ચુસ્ત સુરક્ષા અને તપાસ ચોકીઓ હોવા છતાં બેરેક સુધી મોબાઈલ કઈ રીતે અને કોના મારફતે પહોંચ્યો? કયા કેદી અથવા વ્યક્તિએ આ વીડિયો બનાવ્યો અને તેને સોશિયલ મીડિયા પ્લેટફોર્મ સુધી કોણે પહોંચાડ્યો? જેલના સ્ટાફ અને સંબંધિત અધિકારીઓની ભૂમિકા શંકાના દાયરામાં આવતા તેમની પણ પૂછપરછ શરૂ કરવામાં આવી છે. જૂન મહિના દરમિયાન કેદીઓને મળવા આવેલા મુલાકાતીઓ (મુલાકાતી રજિસ્ટર) અને જેલની અંદર મોકલાયેલી તમામ ચીજવસ્તુઓની યાદીની બારીકાઈથી ચકાસણી કરવામાં આવી રહી છે.

જેલ તંત્ર આ મામલે જવાબદાર કર્મચારીઓ કે કેદીઓ સામે કડક કાનૂની અને ખાતાકીય પગલાં ભરવાની તૈયારી કરી રહ્યું છે.

નોંધઃ જીએસટીવી આ વીડિયોની કોઈ પુષ્ટિ કરતું નથી.