Video/ Surat માં ‘પેકર્સ એન્ડ મૂવર્સ’ની આડમાં દેશભરના લોકોના બેંક ખાતા સાફ કરતું રેકેટ ઝડપાયું!
છેલ્લું અપડેટ : 25 Dec 2025
સુરતમાંથી એક ચોંકાવનારું સાયબર કૌભાંડ પ્રકાશમાં આવ્યું છે. સુરત સ્પેશિયલ ઓપરેશન ગ્રુપ (SOG) એ ડીંડોલી વિસ્તારમાં દરોડા પાડીને 200 કરોડ રૂપિયાના માતબર સાયબર ફ્રોડનો પર્દાફાશ કર્યો છે. પોલીસની આ કાર્યવાહીમાં પાંચ સાયબર ગઠીયાઓની ધરપકડ કરવામાં આવી છે, જેઓ છેલ્લા પાંચ વર્ષથી લોકોની મહેનતની કમાણી લૂંટી રહ્યા હતા.
ઓફિસ 'પેકર્સ એન્ડ મૂવર્સ'ની, કામ 'બેંક ખાતા સાફ' કરવાનું
મળતી વિગત મુજબ, સુરતના ડીંડોલી વિસ્તારમાં આવેલા મંગલપાર્ક સ્થિત ગ્રીન વેલી શોપિંગ કોમ્પલેક્ષમાં એસ.ઓ.જી.એ ગુપ્ત માહિતીના આધારે છાપો માર્યો હતો. અહીં 'ક્રિષ્ના પેકર્સ એન્ડ મૂવર્સ' નામે ઓફિસ ચલાવવામાં આવતી હતી. જોકે, આ ધંધો માત્ર એક મહોરું હતું. હકીકતમાં, આ ઓફિસની અંદરથી દેશભરના લોકો સાથે ઓનલાઈન છેતરપિંડી આચરવાનું આખું રેકેટ ચલાવવામાં આવતું હતું.
દુબઈ કનેક્શન અને ધરપકડ કરાયેલા આરોપીઓ
તપાસમાં બહાર આવ્યું છે કે આ ગેંગના તાર છેક દુબઈ સુધી જોડાયેલા છે. દુબઈથી સંચાલિત આ ગેંગના ઈશારે સુરતના આ શખ્સો કામ કરી રહ્યા હતા. પોલીસે આ મામલે નીચે મુજબના પાંચ આરોપીઓની ધરપકડ કરી છે:
- પ્રતીક પ્રફુલ વસાવા
- દીપક ઉમાદત પાંડે
- રૂપેશ હાંડગે
- ભૂષણ પાટીલ
- સલીમ આરટીઓ
મોડસ ઓપરેન્ડી: કેવી રીતે આપતા અંજામ?
આરોપીઓ અત્યંત શાતિર રીતે છેતરપિંડી કરતા હતા. જુદા-જુદા વ્યક્તિઓના નામે બેંક એકાઉન્ટ ખોલાવવા માટે ખોટા ઈલેક્ટ્રોનિક દસ્તાવેજો અને નકલી જામીન ઉભા કરવામાં આવતા હતા. ઇન્ટરનેટ બેન્કિંગ અને સોશિયલ મીડિયા દ્વારા લોકોનો સંપર્ક કરી તેમને વિશ્વાસમાં લેતા અને ત્યારબાદ તેમના બેંક એકાઉન્ટ ખાલી કરી દેતા. દુબઈમાં બેઠેલા સાથીદારો સાથે મળીને આ ગેંગે દેશભરના અનેક નિર્દોષ લોકોને પોતાના શિકાર બનાવ્યા છે.
પોલીસે જપ્ત કરેલો મુદ્દામાલ
દરોડા દરમિયાન એસ.ઓ.જી.એ સ્થળ પરથી મહત્ત્વના પુરાવાઓ કબજે કર્યા છે, જેમાં:
- 7 મોબાઈલ અને 2 કોમ્પ્યુટર
- 9 ચેકબુક અને 4 પાસબુક
- 7 ATM/ડેબિટ કાર્ડ અને 5 સીમકાર્ડ
- 8 વિવિધ બેંકોના સ્ટેમ્પ અને ફર્મ સાથે જોડાયેલા ઓળખના દસ્તાવેજો
5 દિવસના રિમાન્ડ
ડીસીપી રાજદીપસિંહ નકુમ (સુરત) એ જણાવ્યું હતું કે, પકડાયેલા પાંચેય આરોપીઓને કોર્ટમાં રજૂ કરી તેમના 5 દિવસના રિમાન્ડ મેળવવામાં આવ્યા છે. પોલીસને આશંકા છે કે આ તપાસમાં અન્ય મોટા માથાઓના નામ પણ બહાર આવી શકે છે અને કૌભાંડનો આંકડો 200 કરોડથી પણ વધુ હોવાની શક્યતા છે.
