મોજમસ્તી માટે વંદે ભારત ટ્રેન પર પથ્થરમારો! 3 યુવકોની ધરપકડ

ગુજરાતમાં વંદે ભારત એક્સપ્રેસ (Vande Bharat Express) પર પથ્થરમારો કરવાની ઘટના સામે આવી છે. સુરતમાં ઉદયપુરથી આવતી વંદે ભારત ટ્રેન પર પથ્થર ફેંકીને ત્રણ બારીઓના કાચ તોડી નાખવાના આરોપસર રેલવે પ્રોટેક્શન ફોર્સ (RPF)એ ત્રણ યુવાનોની ધરપકડ કરી છે. પૂછપરછ દરમિયાન આરોપીઓએ માત્ર મોજમસ્તી માટે ટ્રેન પર પથ્થર ફેંક્યા હોવાની કબૂલાત કરી હોવાનું સામે આવ્યું છે. જોકે, આ બેદરકારીથી મુસાફરોના જીવ જોખમમાં મુકાઈ શક્યા હોત.

ઉદયપુરથી સુરત આવતી ટ્રેન પર હુમલો

આ ઘટના 19 ઓક્ટોબરના રોજ બની હતી. ટ્રેન નંબર 26904 ઉદયપુરથી સુરત તરફ આવી રહી હતી, ત્યારે ઉતરાણ અને સુરત વચ્ચે રેલવે ટ્રેકની પૂર્વ બાજુથી પથ્થરમારો કરવામાં આવ્યો હતો. આ હુમલામાં કોચ C-6ની બે બારીઓ અને પેન્ટ્રી કાર પાસેની એક બારીના કાચ તૂટી ગયા હતા.

ઘટનામાં કોઈ મુસાફર કે રેલવે કર્મચારીને ઈજા થઈ નહોતી. જોકે, ચાલુ ટ્રેન પર પથ્થરમારો થવાથી ગંભીર અકસ્માત સર્જાવાની શક્યતા હતી.

CCTV ફૂટેજથી આરોપીઓ સુધી પહોંચી પોલીસ

ઘટનાની જાણ મુંબઈ સેન્ટ્રલ ડિવિઝનના કંટ્રોલ રૂમ દ્વારા રાત્રે 11:29 વાગ્યે સુરત RPFને કરવામાં આવી હતી. ત્યારબાદ અધિકારીઓએ તાત્કાલિક શોધખોળ શરૂ કરી હતી. પોલીસની ટીમે સુરત યાર્ડ, તાપી નદીના કિનારા અને રેલવે ટ્રેકની આસપાસની ઝાડીઓમાં તપાસ કરી હતી. જોકે, શરૂઆતમાં આરોપીઓનો કોઈ પત્તો મળ્યો નહોતો.

ત્યારબાદ રેલવે ટ્રેક, આસપાસના વિસ્તારો અને ટ્રેનમાં લગાવેલા CCTV કેમેરાના ફૂટેજ (CCTV Footage)ની તપાસ કરવામાં આવી. તેના આધારે ગોલુ કુમાર ચૌધરી (22), સંદેશ કુમાર (18) અને મંતોષ મુખિયા (18)ને પકડી લેવામાં આવ્યા હતા.

બિહારના ત્રણેય યુવકો ફેક્ટરીમાં મજૂરી કરતા હતા

પકડાયેલા ત્રણેય આરોપીઓ મૂળ બિહારના રહેવાસી છે. તેઓ છેલ્લા બે વર્ષથી રેલવે લાઇન નજીક આવેલી એક ફેક્ટરીમાં મજૂરી કરતા હોવાનું અહેવાલમાં જણાવાયું છે. પૂછપરછ દરમિયાન તેમણે મોજમસ્તી માટે પથ્થર ફેંક્યા હોવાની વાત કહી હોવાનું સામે આવ્યું છે.

રેલવે અધિનિયમ હેઠળ કાર્યવાહી

સુરત RPFએ 19 ઓક્ટોબરના રોજ અજાણ્યા આરોપીઓ સામે STCR 2962/26 હેઠળ કેસ નોંધ્યો હતો. રેલવે અધિનિયમની કલમ 153 અંતર્ગત મુસાફરોની સલામતી જોખમમાં મૂકવાના મામલે કાર્યવાહી હાથ ધરવામાં આવી છે.

રેલવે તંત્રએ સ્પષ્ટ કર્યું છે કે ટ્રેન પર પથ્થરમારો કરવો ગંભીર ગુનો છે. આવી હરકતથી મુસાફરોને ઈજા થઈ શકે છે અને મોટો અકસ્માત પણ સર્જાઈ શકે છે. તેથી રેલવે સંપત્તિને નુકસાન પહોંચાડનાર અને મુસાફરોની સુરક્ષા જોખમમાં મૂકનાર સામે કડક કાયદાકીય કાર્યવાહી કરવામાં આવશે.