VIDEO: નર્મદા: ધોધમાર વરસાદથી જળબંબાકાર, જગતનો તાત ખુશખુશાલ
છેલ્લું અપડેટ : 24 Jun 2026
સોર્સ : GSTV
નર્મદા જિલ્લાના ડેડિયાપાડા અને સાગબારા પંથકમાં વહેલી સવારથી જ મેઘરાજાની ધમાકેદાર એન્ટ્રી થતાં સર્વત્ર ધોધમાર વરસાદ તૂટી પડ્યો છે. આજે તારીખ 24ના રોજ સવારથી શરૂ થયેલો આ વરસાદ ખાસ કરીને ડેડિયાપાડા તાલુકાના અંતરિયાળ ડુંગરાળ એવા કોકમ, પીપલોદ, સરીબાર અને ડુમખલ વિસ્તારમાં સવારે દસ વાગ્યા સુધી અનરાધાર વરસ્યો હતો. આ ઉપરાંત નર્મદા જિલ્લાના સાગબારા અને મુખ્ય વેપારી મથક સેલંબા વિસ્તારને પણ મેઘરાજાએ ધમરોળ્યો હતો. ચોમાસાના આ મન મૂકીને વરસેલા પ્રથમ ધોધમાર વરસાદને પગલે કાળઝાળ ગરમીથી રાહત મળી છે અને જગતનો તાત ખુશખુશાલ થઈ ગયો છે. આ પંથકના ખેડૂતો પોતાના ખેતરોમાં ઉત્સાહભેર બિયારણના વાવેતરની કામગીરીમાં લાગી ગયા છે.
