Morbi/ ડુપ્લીકેટ ટાઇલ્સ કેમિકલ કૌભાંડ: કંપનીના માર્કાવાળી બેગોમાં નકલી માલ ભરી બજારમાં વેચતા બે આરોપી ઝડપાયા, એક ફરાર
છેલ્લું અપડેટ : 26 Nov 2025
મોરબીના લાલપર નજીક આવેલા કારખાનામાં કંપનીના ટ્રેડ માર્કનો ગેરકાયદે ઉપયોગ કરી તેમાં ટાઇલ્સ ચોંટાડવાનું ડુપ્લીકેટ કેમિકલ ભરી બજારમાં સસ્તા ભાવે વેંચવાનું કૌભાંડ ખુલ્યું છે. કારખાનામાંથી 15.18 લાખનો મુદ્દામાલ મળી આવ્યો છે. પોલીસે બેગ વેચનાર તથા બેગ બનાવી આપનાર ત્રણ શખ્સો સામે ગુનો દાખલ કર્યો છે.
આ અંગે પીડીલાઇટ કંપનીના મલયભાઇ યોગેશભાઇ શાહે આરોપીઓ શિરીષભાઇ અમરશીભાઇ ચારોલા, અનિલભાઇ હરીભાઇ બાવરવા અને મયુરભાઇ જયસુખભાઇ સાંગાણી વિરૂદ્ધ ફરિયાદ નોંધાવી છે. તેમાં જણાવાયું છે કે મોરબીના લાલપર ગામના ઇન્ડસ્ટ્રીયલ એસ્ટેટ - 5માં પ્લોટ નં. 27 માં આવેલા એબીએસ બિલ્ડ ઇન્ડિયા નામના કારખાનામાં આરોપીઓ પીડીલાઇટ ઇન્ડસ્ટ્રીઝ લિમિટેડની ડુપ્લીકેટ બેગો બનાવી કંપનીના ટ્રેડ માર્ગનો ગેરકાયદે ઉપયોગ કરી અને આ ડુપ્લીકેટ માર્કાવાળી બેગમાં કંપનીનું ટાઇલ્સ ચોંટાડવાનું ડુપ્લીકેટ રો - મટિરિયલ્સ ભરી બજારમાં સસ્તા ભાવે વેચાણ કરી કંપનીને આર્થિક નુકસાન કરતા હતા.
આરોપી શિરિષભાઇ તથા અનિલભાઇના કબજાવાળા શેડમાંથી પીડી લાઇટ કંપનીના માર્કાવાળી વિવિધ મટીરીયલ ભરેલી રૂા. 15 લાખની કિંમતની 2051 બેગ, માર્કાવાળી 1370 ખાલી બેગ, પ્રિન્ટિંગ મશીન, સિલાઇ મશીન મળી કુલ 15.18 લાખની કિંમતનો મુદ્દામાલ મળી આવ્યો હતો. આરોપી મયુર બેગ તૈયાર કરાવી આપતો હોવાનું ખુલ્યું છે. મોરબી તાલુકા પોલીસે શિરીષ અને અનિલ એમ બે આરોપીઓને ઝડપી આગળની કાર્યવાહી હાથ ધરી છે.
