VIDEO: ઉમિયાધામ ઊંઝામાં પોષી પૂનમની ધામધૂમથી ઉજવણી, દૂર-દૂરથી આવેલા શ્રદ્ધાળુઓથી ઉભરાયું મંદિર
છેલ્લું અપડેટ : 03 Jan 2026
VIDEO: ઉત્તર ગુજરાતના સુપ્રસિદ્ધ યાત્રાધામ અને કડવા પાટીદાર કુળદેવી માં ઉમિયાના ધામ ઊંઝા ખાતે આજે પોષી પૂનમ નિમિત્તે શ્રદ્ધા અને ભક્તિનો ત્રિવેણી સંગમ જોવા મળ્યો હતો. પોષ સુદ પૂનમનું હિન્દુ ધર્મમાં અને ખાસ કરીને ઉમિયાધામમાં વિશેષ મહત્વ હોવાથી વહેલી સવારથી જ મંદિરના દ્વાર ખુલતાની સાથે જ ભક્તોનું ઘોડાપૂર ઉમટી પડ્યું હતું.
ભક્તોની લાંબી કતારો અને જયઘોષ
માં ઉમિયાના દર્શન માટે વહેલી સવારથી જ શ્રદ્ધાળુઓ લાઈનોમાં ઉભા રહી ગયા હતા. મંદિર પરિસર 'જય ઉમિયા' ના નાદથી ગુંજી ઉઠ્યું હતું. ભક્તોમાં ભારે ઉત્સાહ જોવા મળ્યો હતો અને કલાકો સુધી લાઈનમાં ઉભા રહ્યા બાદ માં ઉમિયાના તેજસ્વી સ્વરૂપના દર્શન કરી સૌએ ધન્યતા અનુભવી હતી.
દૂર-દૂરથી આવ્યા શ્રદ્ધાળુઓ
માત્ર મહેસાણા જિલ્લામાંથી જ નહીં, પરંતુ સમગ્ર ગુજરાત અને અન્ય રાજ્યોમાંથી પણ મોટી સંખ્યામાં માઈભક્તો આજે ઊંઝા પહોંચ્યા હતા. પૂનમનો વિશેષ મહિમા હોવાથી અનેક સંઘો પગપાળા પણ માં ના દ્વારે પહોંચ્યા હતા. ભક્તોએ માં ઉમિયાને શીશ ઝુકાવી સુખ-શાંતિ અને સમૃદ્ધિની પ્રાર્થના કરી હતી.
મંદિર ટ્રસ્ટની વ્યવસ્થા
ભક્તોની ભારે ભીડને ધ્યાનમાં રાખીને ઉમિયા માતાજી સંસ્થાન-ઊંઝા દ્વારા દર્શન માટે ખાસ વ્યવસ્થા કરવામાં આવી હતી. ભક્તોને કોઈ મુશ્કેલી ન પડે તે માટે સ્વયંસેવકો અને સુરક્ષાકર્મીઓ ખડેપગે રહ્યા હતા. પૂનમ નિમિત્તે માતાજીને વિશેષ શણગાર અને અન્નકૂટ પણ ધરવામાં આવ્યો હતો, જે દર્શનાર્થીઓ માટે આકર્ષણનું કેન્દ્ર બન્યો હતો