Mehsana news: રાજ્યસભાના સાંસદે શરૂ કરી નવી પહેલ, સામાન્ય નાગરિકને જોડાવા કરી અપીલ
છેલ્લું અપડેટ : 04 Jan 2026
દેશના વડાપ્રધાન નરેન્દ્ર મોદીના પ્લાસ્ટિક મુક્ત ભારત ના સંકલ્પને સાકાર કરવાના હેતુથી રાજ્યના મહેસાણામાં રાજ્યસભાના સાંસદ મયંક નાયક દ્વારા એક સરાહનીય પ્રયોગ શરૂ કરવામાં આવ્યો છે. આ પ્રોજેક્ટ અંતર્ગત શહેરના નાગરિકો પોતાના ઘરના જૂના કે ફાટેલા કપડાં આપીને બદલામાં નવી કાપડની થેલી મેળવી શકે છે.
અભિયાન માત્ર પર્યાવરણની જાળવણી પૂરતું મર્યાદિત નથી
આ અભિયાન માત્ર પર્યાવરણની જાળવણી પૂરતું મર્યાદિત નથી, પરંતુ તેની સાથે સામાજિક સેવાનો ઉમદા હેતુ પણ જોડાયેલો છે. આ થેલીઓ વિધવા મહિલાઓ દ્વારા તૈયાર કરવામાં આવે છે, જેનાથી તેમને આત્મનિર્ભર બનવા માટે રોજગારીની તકો મળી રહી છે. મહેસાણામાં આવેલા રાજ્યસભાના મયંક નાયકના સેવાલય કાર્યલય ખાતે આ પ્રવૃત્તિ કરવામાં આવી છે.
કાપડની નવી થેલી આપવામાં આવે છે
કોઈપણ નાગરિક જ્યારે નકામા કપડાં લઈને સેવાલય પહોંચે છે, ત્યારે તેમને કાપડની નવી થેલી આપવામાં આવે છે. આ પહેલથી પ્લાસ્ટિકના વપરાશમાં ઘટાડો થશે અને લોકોમાં પર્યાવરણ પ્રત્યે જાગૃતિ આવશે.સાથે રોજગારી મળશે અને એક નવી પહેલ પણ લોકો મા આવશે સાંસદ મયંકભાઈ નાયકના આ અનોખા પ્રયોગને સ્થાનિક લોકો દ્વારા બહોળો પ્રતિસાદ મળી રહ્યો છે.