Bhavnagar / ત્રાપજ નજીક ગમખ્વાર અકસ્માત; ટ્રેલર પાછળ કાર ઘૂસી જતાં 6 લોકોનાં મોત

ભાવનગર જિલ્લાના ત્રાપજ નજીક આજે (છઠ્ઠી ઓક્ટોમ્બર) ગમખ્વાર માર્ગ અકસ્માત સર્જાયો છે. પૂરપાટ ઝડપે આવી રહેલી કાર ઉભેલા ટ્રેલર પાછળ ધડાકાભેર ઘૂસી ગઈ હતી. આ ભીષણ અકસ્માતમાં ઘટનાસ્થળે જ 6 લોકોના કમકમાટીભર્યા મોત નીપજ્યા હતા, જ્યારે એક વ્યક્તિ ગંભીર રીતે ઈજાગ્રસ્ત થયો છે.

મૃતકોની ઓળખ થઈ

મળતી માહિતી અનુસાર, આ દુર્ઘટનામાં જીવ ગુમાવનાર તમામ લોકો અલંગ શિપબ્રેકિંગ યાર્ડના બે અલગ-અલગ પ્લોટમાં ફરજ બજાવતા સ્ટાફના સભ્યો હતા. આ ભયાનક મૃત્યુ પામનારા છ વ્યક્તિઓની ઓળખ વિજય, સાધુ, જિગ્નેશ, ભાર્ગવ, હિરેન અને યોગેશ તરીકે થઈ છે. જ્યારે દુર્ઘટનામાં ગંભીર રીતે ઈજાગ્રસ્ત થયેલા જયેશ નામના શખસને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યા છે. આ ગમખ્વાર અકસ્માતના સમાચાર મળતાં જ મૃતકોના પરિવારજનો સહિત સમગ્ર અલંગ વિસ્તારમાં ભારે શોકનું મોજું ફરી વળ્યું છે.

અકસ્માતની જાણ થતાં જ સ્થાનિક પોલીસનો કાફલો તાત્કાલિક ઘટનાસ્થળે દોડી આવ્યો હતો અને તમામ મૃતદેહોને પોસ્ટમોર્ટમ અર્થે હોસ્પિટલ ખસેડીને આગળની તપાસ હાથ ધરી છે.