Rain in Gujarat : દિવાળીના તહેવારોમાં પણ વરસાદ નહીં જંપે, આ 4 જિલ્લામાં ભારે વરસાદની આગાહી, ખેડૂતોમાં ચિંતા
છેલ્લું અપડેટ : 18 Oct 2025
Rain in Gujarat : દિવાળી અને નવા વર્ષના તહેવારમાં દક્ષિણ ગુજરાતના કેટલાક જિલ્લામાં હળવાથી મધ્યમ વરસાદની હવામાન વિભાગે આગાહી કરી છે. હવામાન વિભાગે આગામી 19 ઑક્ટોબરથી 23 ઑક્ટોબર સુધી વરસાદ થવાની શક્યતા વ્યક્ત કરી છે.
દક્ષિણ ગુજરાતમાં હળવા વરસાદની આગાહી
હવામાન વિભાગ મુજબ, દક્ષિણ ગુજરાતના તાપી, નવસારી, ડાંગ અને વલસાડ જિલ્લાના છૂટાછવાયા સ્થળોએ ગાજવીજ સાથે હળવાથી મધ્યમ વરસાદ આગાહી છે. વરસાદી શક્યતાને લઈને ખેડૂતોના ડાંગર સહિતના પાકને નુકસાની થવાની ભીતી સેવાઈ રહી છે, ત્યારે તહેવાર ટાણે ખેડૂતોમાં ચિંતા જોવા મળી રહી છે.
દિવાળી-બેસતા વર્ષના દિવસે વરસાદની આગાહી
હવામાન વિભાગની આગાહી મુજબ, આગામી 20, 21 અને 22 ઑક્ટોબર, 2025 એટલે કે, દિવાળી અને બેસતા વર્ષના દિવસે દક્ષિણ ગુજરાતના કેટલાક સ્થળોએ વરસાદની સંભાવના છે. જેમાં નવસારી, ડાંગ, વલસાડ જિલ્લાના છૂટાછવાયા સ્થળોએ ગાજવીજ સાથે હળવાથી મધ્યમ વરસાદની આગાહી છે.
18 ઑક્ટોબર, 2025ના રોજ દક્ષિણપૂર્વ અરબી સમુદ્ર અને કેરળ-કર્ણાટક કિનારે લક્ષદ્વીપ પર નીચા દબાણ સર્જાઈ શકે છે. જે પશ્ચિમ-ઉત્તરપશ્ચિમ તરફ આગળ વધવાની શક્યતા છે, ત્યારે આગામી 48 કલાકમાં ડિપ્રેશનમાં તીવ્ર બનવાની સંભાવના છે.