Video: દિવાળી ટાણે દાહોદમાં કાચા મકાનમાં ભીષણ આગ, ઘરવખરીનો સામાન બળીને ખાખ થતાં પરિવારમાં શોક

દિવાળીના પર્વની ખુશીઓ વચ્ચે દાહોદના પોલીસીમલ ગામે કાચા મકાનમાં અચાનક અગમ્ય કારણોસર આગ લાગી હતી.. મકાનમાં આગ લાગતાની સાથે જ વિસ્તારમાં ભારે દોડધામ અને અફરાતફરી મચી ગઈ હતી, જેથી પરિવારજનો અને આસપાસના લોકોએ તાત્કાલિક પાણીનો મારો ચલાવી આગ પર કાબૂ મેળવવાના પ્રયાસો હાથ ધર્યા હતા. આ ઘટનાની જાણ થતાં જ ફાયર ફાઈટરની ટીમ તાત્કાલિક ઘટનાસ્થળે દોડી આવી હતી અને ભારે જહેમત બાદ આગ પર સંપૂર્ણ કાબૂ મેળવ્યો હતો. સદનસીબે કોઈ જાનહાનિ થઈ ન હતી, પરંતુ આગની આ દુર્ઘટનામાં ઘરમાં રહેલો સમગ્ર ઘરવખરીનો સામાન બળીને ખાખ થઈ ગયો હતો. તહેવારના દિવસોમાં જ ઘર આંગણે સર્જાયેલી આ દુર્ઘટનાને કારણે પીડિત પરિવારમાં ભારે દુઃખ અને શોકનું વાતાવરણ છવાઈ ગયું છે.