મધરાતે ચાર્જિંગમાં મૂકેલો મોબાઇલ ફાટ્યો, ઘરમાં ભીષણ આગ! 35 વર્ષીય શિક્ષકનું કરુણ મોત
કચ્છના લખપત તાલુકામાં મોબાઇલ બ્લાસ્ટની દુર્ઘટનાએ એક પરિવારનો માળો વિખેરી નાખ્યો છે. પીપર ગામની પ્રાથમિક શાળામાં શિક્ષક તરીકે ફરજ બજાવતા ખેડા જિલ્લાના 35 વર્ષીય રાહુલભાઈ વાઘેલાનું મોબાઇલમાં બ્લાસ્ટ થયા બાદ લાગેલી આગમાં ગંભીર રીતે દાઝી જવાથી મોત થયું છે. ભુજની હોસ્પિટલમાં સારવાર દરમિયાન મંગળવારે સવારે તેમણે અંતિમ શ્વાસ લીધા હતા. આ ઘટનાથી પરિવારજનોમાં શોકનું મોજું ફરી વળ્યું છે.
ચા જગમાં મૂકેલા મોબાઇલમાં બ્લાસ્ટ થયાની આશંકા
પશ્ચિમ કચ્છના સરહદી વિસ્તાર એવા લખપત તાલુકાના પીપર ગામમાં આ દુર્ઘટના બની હતી. મૂળ ખેડા જિલ્લાના રહેવાસી રાહુલભાઈ શરદભાઈ વાઘેલા (ઉંમર 35 વર્ષ) છેલ્લા એક વર્ષથી પીપર ગામની પ્રાથમિક શાળામાં શિક્ષક તરીકે ફરજ બજાવતા હતા. તેઓ એક વર્ષ પહેલાં લગ્નગ્રંથિથી જોડાયા હતા અને પરિવાર સાથે રહેતા હતા.
રાહુલભાઈ શાળાના શિક્ષકો માટે ફાળવવામાં આવેલા ઓરડામાં પરિવાર સાથે રહેતા હતા. સોમવારે રાત્રે તેઓ પોતાના માતા-પિતા અને પત્ની સાથે ઓરડામાં સૂતા હતા. દરમિયાન મધરાતે મોબાઇલમાં બ્લાસ્ટ થતાં આગ લાગી હોવાની પ્રાથમિક માહિતી સામે આવી છે. મોબાઇલ ચા જગમાં મૂકેલો અને ચાર્જિંગમાં હોવાનું અહેવાલમાં જણાવાયું છે.
મધરાતે અચાનક આગ લાગતાં પરિવાર દોડ્યો
મળતી માહિતી મુજબ, રાત્રે આશરે સાડા ત્રણ વાગ્યાના સમયે આ દુર્ઘટના બની હતી. મોબાઇલમાં બ્લાસ્ટ થયા બાદ આગ લાગતાં રાહુલભાઈ ગંભીર રીતે દાઝી ગયા હતા. તેમની બૂમાબૂમ સાંભળીને પરિવારજનો અને આસપાસના લોકો તાત્કાલિક મદદ માટે દોડી આવ્યા હતા.
ગંભીર રીતે દાઝી ગયેલા રાહુલભાઈને તાત્કાલિક ભુજની કે.કે. હોસ્પિટલમાં સારવાર માટે ખસેડવામાં આવ્યા હતા. જોકે, તબીબોના પ્રયાસો છતાં મંગળવારે સવારે સારવાર દરમિયાન તેમનું મોત નીપજ્યું હતું. યુવાન શિક્ષકના અચાનક નિધનથી પરિવાર પર દુઃખનો પહાડ તૂટી પડ્યો છે.
મોબાઇલ બ્લાસ્ટનું ચોક્કસ કારણ જાણવા તપાસ
ઘટનાની જાણ થતાં નારાયણ સરોવર પોલીસે અકસ્માતે મોતનો ગુનો નોંધી વધુ તપાસ હાથ ધરી છે. પોલીસની પ્રાથમિક તપાસમાં ચાર્જિંગમાં મૂકેલો મોબાઇલ ફાટ્યો હોવાની આશંકા વ્યક્ત કરવામાં આવી છે.
આ ઉપરાંત, ઇલેક્ટ્રિક શોર્ટ સર્કિટ (Short Circuit)ની શક્યતા અંગે પણ તપાસ કરવામાં આવી રહી છે. ઘટનાસ્થળે બહારના વીજથાંભલામાં પણ નુકસાન જોવા મળ્યું હોવાનું જણાવાયું છે. જોકે, મોબાઇલમાં બ્લાસ્ટ કયા કારણોસર થયો અને આગ કેવી રીતે ફેલાઈ તે અંગેની ચોક્કસ વિગતો તપાસ પૂર્ણ થયા બાદ જ સામે આવશે.
