સફેદ દૂધનો કાળો કારોબાર: સહકારી ડેરીઓ ખદબદી રહી છે કૌભાંડ, ભરતી, ભેળસેળ અને ભ્રષ્ટાચારથી

સહકાર ક્ષેત્ર પણ ખાયકીનું જાણે એપી સેન્ટર બની રહ્યું છે. સફેદ દૂધના કાળા કારોબાર થકી ડેરીઓના શાસકો ભાગબટાઈ કરી રહ્યાં છે. ગુજરાતમાં ટોચની સહકારી ડેરીઓમાં ભ્રષ્ટાચાર, ભરતી અને ભેળસેળની ફરિયાદો ઉઠી છે, જેમકે સાબરડેરીમાં ભરતીકાંડ કરી મામા-કાકા અને સગાઓને ગોઠવી દેવાયા હોવાનો આરોપ છે. આ ઉપરાંત ખરીદીમાં પણ મોટાપાયે ભ્રષ્ટાચાર આચરવામાં આવ્યા હોવાની ફરિયાદો થઈ છે.

ગેરકાયદેસર રીતે ભરતી કરી મળતિયાઓને સાચવી લેવાયા

હવે જ્યારે ભાવફેર મામલે પશુપાલકો હક અધિકાર સાથે અહિંસક રીતે લડત લડી રહ્યા છે. ત્યારે પોલીસ લાઠીઓ વિઝીં રહી છે. આ જ પ્રમાણે સુરત સ્થિતિ સુમુલ ડેરીમાં પણ માનસિંહ પટેલ અને રાજેશ પાઠક વચ્ચે બરોબરનો ગજગ્રાહ જામ્યો છે. એક હજાર કરોડનો ભ્રષ્ટાચાર થયો હોવાની ચર્ચા છે. ગેરકાયદેસર રીતે ભરતી કરી મળતિયાઓને સાચવી લેવાયા છે. મહેસાણા દૂધસાગર ડેરીમાં પણ ચેરમેન અને ડિરેક્ટરો સામે ભરતી કૌભાંડ આચરાયા હોવાનો આરોપ છે.

ડેરીઓના સત્તાધીશોના કચ્ચા ચિઠ્ઠા ખૂલે તો કૌભાંડ બહાર આવે તેમ છે

મશીનરી ખરીદીમાં પણ મોટકી ખાયકી થઈ હોવાની ફરિયાદો છેક ગાંધીનગર  સુધી થઈ છે. બરોડા ડેરીમાં પણ ખુદ ભાજપના જ ધારાસભ્યોએ ફરિયાદો કરી છે કે મોટાપાયે ભ્રષ્ટાચાર થયો છે. ભરતીમાં ગેરરીતી થઈ છે. તાજેતરમાં આપના ધારાસભ્ય ગોપાલ ઈટાલિયાએ સૌરાષ્ટ્રની ડેરીઓમાં દૂધ મોટાપાયે ભેળસેળ થતી હોવાના આક્ષેપ કર્યા હતાં. ટૂંકમાં બધીય સહકારી ડેરીઓ શંકાના ઘેરામાં મૂકાઈ છે. જો કે આ તમામ ડેરીઓના સત્તાધીશોના કચ્ચા ચિઠ્ઠા ખૂલે તો મસમોટું કૌભાંડ બહાર આવે તેમ છે.