Anand/ જંત્રાલ-વિરસદ રોડ પર અકસ્માત, કાર અને બાઈક વચ્ચેની ટક્કરમાં બાળકી સહિત બેના મોત
છેલ્લું અપડેટ : 02 Mar 2026
Anand Accident: આણંદ જિલ્લાના બોરસદ તાલુકામાં રવિવારે (પહેલી માર્ચ) સાંજે એક અકસ્માત સર્જાયો હતો. જંત્રાલ-વિરસદ રોડ પર પૂરપાટ ઝડપે આવી રહેલી એક કારે બાઈકને અડફેટે લેતા ગમખ્વાર અકસ્માત સર્જાયો હતો. આ દુર્ઘટનામાં બાઈક ચાલકનું ઘટનાસ્થળે જ મોત નીપજ્યું હતું, જ્યારે 8 વર્ષની માસૂમ બાળકીએ હોસ્પિટલમાં સારવાર દરમિયાન દમ તોડ્યો હતો.
કેવી રીતે અકસ્માત સર્જાયો
મળતી માહિતી અનુસાર, પેટલાદ નજીક આવેલા જંત્રાલ-વિરસદ રોડ પર રવિવારે સાંજે આ અકસ્માત સર્જાયો હતો. કાર ચાલકે બાઈકને એટલી જોરદાર ટક્કર મારી હતી કે બાઈક પર સવાર ત્રણેય વ્યક્તિઓ ફંગોળાયા હતા. બાઈક ચાલક હરેશભાઈને ગંભીર ઈજાઓ પહોંચતા તેમનું ઘટનાસ્થળે જ કમકમાટીભર્યું મોત નિપજ્યું હતું. બાઈક પર સવાર જ્યોત્સનાબેન અને આઠ વર્ષીય બાળકી પ્રિયાને ગંભીર હાલતમાં પેટલાદ સિવિલ હોસ્પિટલ ખસેડવામાં આવ્યા હતા. જ્યાં ટૂંકી સારવાર બાદ પ્રિયાનું મોત નિપજ્યું હતું.
ઘટનાની જાણ થતા જ સ્થાનિક પોલીસ કાફલો સ્થળ પર પહોંચી ગયો હતો. પોલીસે બંને મૃતકોના મૃતદેહને પોસ્ટમોર્ટમ (PM) માટે મોકલી આપ્યા હતા અને ત્યારબાદ પરિવારજનોને સોંપવામાં આવ્યા હતા. પોલીસે અકસ્માત સર્જનાર કાર ચાલક વિરુદ્ધ ગુનો નોંધી તેની ધરપકડ કરી લીધી છે. હાલ પોલીસ આ મામલે વધુ તપાસ ચલાવી રહી છે કે કાર ચાલક નશામાં હતો કે કેમ અથવા અકસ્માત પાછળ અન્ય કોઈ કારણ જવાબદાર છે.
