Ahmedabad news: મેમ્કોના અંબિકા એસ્ટેટમાં ભીષણ આગ, લાકડાની ફેક્ટરીમાં 2 લોકો ફસાયા હોવાની આશંકા
છેલ્લું અપડેટ : 11 Jan 2026
Ahmedabad news: અમદાવાદ શહેરનાં પૂર્વ વિસ્તારમાં આવેલા મેમ્કો બ્રિજ નીચે આજે રવિવારે બપોરના સમયે એક મોટી દુર્ઘટના સર્જાઈ છે. મેમ્કો બ્રિજ પાસે આવેલી 'અંબિકા એસ્ટેટ'માં આવેલી એક લાકડાની ફેક્ટરીમાં અચાનક ભીષણ આગ ફાટી નીકળી હતી. આગ એટલી વિકરાળ હતી કે તેના ધૂમાડાના ગોટેગોટા દૂર-દૂર સુધી જોવા મળ્યા હતા. આ ઘટનામાં ફેક્ટરીની અંદર બે વ્યક્તિઓ ફસાયા હોવાની આશંકા સેવાતા તંત્રમાં દોડધામ મચી ગઈ છે.
બે લોકો ફસાયા હોવાની આશંકાથી રૅસ્ક્યૂ ઓપરેશન તેજ
મળતી માહિતી અનુસાર, જ્યારે આગ લાગી ત્યારે ફેક્ટરીમાં કામકાજ ચાલી રહ્યું હતું. આગે જોતજોતામાં વિકરાળ સ્વરૂપ ધારણ કરી લેતા અંદર રહેલા કર્મચારીઓને બહાર નીકળવાની તક મળી ન હતી. આગ લાગી ત્યારે બે લોકો અંદર ફસાયા હોવાની પ્રાથમિક વિગતો સામે આવી છે, જેને પગલે ફાયર બ્રિગેડ દ્વારા યુદ્ધના ધોરણે રૅસ્ક્યૂ ઓપરેશન હાથ ધરવામાં આવ્યું છે. ફસાયેલા લોકોને સલામત રીતે કાઢવા માટે ફાયરના જવાનો ઓક્સિજન માસ્ક અને આધુનિક સાધનો સાથે ફેક્ટરીમાં પ્રવેશ્યા છે.
ફાયર બ્રિગેડનો કાફલો ઘટનાસ્થળે
આગની ગંભીરતાને જોતા અમદાવાદ ફાયર બ્રિગેડની અનેક ગાડીઓ તાત્કાલિક ઘટનાસ્થળે પહોંચી ગઈ હતી. ચીફ ફાયર ઓફિસર સહિતના ઉચ્ચ અધિકારીઓ પણ સ્થળ પર હાજર છે અને કામગીરીનું સીધું નિરીક્ષણ કરી રહ્યા છે. લાકડું જ્વલનશીલ પદાર્થ હોવાથી આગ ઝડપથી પ્રસરી હતી, જેને કાબૂમાં લેવા માટે વોટર કેનનનો ઉપયોગ કરવામાં આવી રહ્યો છે.
આગનું કારણ હજુ અકબંધ
અંબિકા એસ્ટેટની આ ફેક્ટરીમાં આગ કયા કારણોસર લાગી તે હજુ સુધી જાણી શકાયું નથી. શોર્ટ સર્કિટના કારણે આગ લાગી હોવાની પ્રાથમિક શક્યતા જોવામાં આવી રહી છે, પરંતુ ચીફ ફાયર ઓફિસરના જણાવ્યા અનુસાર, આગ પર સંપૂર્ણ કાબૂ મેળવ્યા બાદ અને સર્ચ ઓપરેશન પૂર્ણ થયા પછી જ ચોક્કસ કારણ જાણી શકાશે.
વિસ્તારમાં ભયનો માહોલ
મેમ્કો બ્રિજ જેવો વ્યસ્ત વિસ્તાર હોવાથી અને આસપાસ અન્ય એકમો આવેલા હોવાથી તંત્ર દ્વારા સાવચેતીના ભાગરૂપે આસપાસનો વિસ્તાર ખાલી કરાવવામાં આવ્યો છે. પોલીસ કાફલો પણ ટ્રાફિક નિયમન અને ભીડને કાબૂમાં લેવા માટે ખડકી દેવામાં આવ્યો છે.
