અમદાવાદમાં IT વિભાગનું મેગા ઓપરેશન: મયુર ડાયકેમ ગૃપના 20થી વધુ સ્થળોએ દરોડાથી ફફડાટ
છેલ્લું અપડેટ : 21 Mar 2026
Ahmedabad news: ગુજરાતના આર્થિક પાટનગર ગણાતા અમદાવાદમાં આજે વહેલી સવારથી જ આવકવેરા વિભાગે (IT Department) મોટી કાર્યવાહી હાથ ધરી છે. શહેરના જાણીતા કેમિકલ ગૃપ 'મયુર ડાયકેમ ઈન્ટરમીડિયેટ્સ લિમિટેડ' (Mayur Dyechem Intermediates Ltd) અને તેની સાથે સંકળાયેલા ભાગીદારો પર આઈટી વિભાગે લાલ આંખ કરી છે. કરચોરીની શંકાના આધારે અમદાવાદમાં આશરે 20થી વધુ સ્થળોએ એકસાથે તપાસનો ધમધમાટ શરૂ કરવામાં આવ્યો છે.
વહેલી સવારથી તપાસનો દોર
મળતી માહિતી મુજબ, આવકવેરા વિભાગની અલગ-અલગ ટીમોએ આજે સૂર્યોદય પહેલા જ મયુર ડાયકેમની કોર્પોરેટ ઓફિસ અને ફેક્ટરી પરિસરમાં ધામા નાખ્યા હતા. આ તપાસમાં અમદાવાદના સોલા વિસ્તારમાં રહેતા ગ્રુપના મુખ્ય ભાગીદારો અને માલિકોના નિવાસસ્થાનનો પણ સમાવેશ થાય છે. તપાસ દરમિયાન કોઈ અનિચ્છનીય ઘટના ન બને તે માટે ચુસ્ત પોલીસ બંદોબસ્ત પણ ગોઠવવામાં આવ્યો છે.
કયા સ્થળોએ ચાલી રહી છે તપાસ?
આઈટી વિભાગ દ્વારા મયુર ડાયકેમ ગૃપની મુખ્ય ઓફિસો, ઉત્પાદન એકમો (ફેક્ટરીઓ) અને સંચાલકોના ખાનગી બંગલાઓ પર સર્ચ ઓપરેશન ચલાવવામાં આવી રહ્યું છે. સૂત્રોના જણાવ્યા અનુસાર, અધિકારીઓ દ્વારા હિસાબી ચોપડા, બેંક લોકર, ડિજિટલ ડેટા અને મિલકતને લગતા દસ્તાવેજોની ઝીણવટભરી તપાસ કરવામાં આવી રહી છે. કેમિકલ સેક્ટરમાં મોટા પાયે થયેલા વ્યવહારોમાં ગેરરીતિની આશંકા વ્યક્ત કરવામાં આવી રહી છે.
મોટા ખુલાસાની શક્યતા
આ મેગા સર્ચ ઓપરેશન હજુ પણ ચાલુ છે અને તે બે થી ત્રણ દિવસ સુધી લંબાઈ શકે તેવી શક્યતા છે. આ તપાસના અંતે મોટા પ્રમાણમાં બેનામી સંપત્તિ, બિનહિસાબી રોકડ અને કરચોરીના દસ્તાવેજો મળી આવવાની પૂરેપૂરી સંભાવના છે. અમદાવાદના બિઝનેસ જગતમાં આ દરોડાને કારણે ભારે ફફડાટ વ્યાપી ગયો છે.