Video: અમદાવાદ ફાયર વિભાગની નવી 112 સિસ્ટમમાં ખોટા સ્ટેશનને કોલ ફાળવાતાં વિલંબની ભીતિ

અમદાવાદ ફાયર વિભાગને આધુનિક બનાવવા માટે નવી સિસ્ટમ અમલમાં મૂકવામાં આવી છે, પરંતુ આ સિસ્ટમમાં કેટલીક ખામીઓ સામે આવી રહી છે. ફાયર વિભાગનો જૂનો નંબર 101 બદલીને 112 કરવામાં આવ્યો છે, જેના કારણે કોલ રિસિવિંગ અને ફાયર સ્ટેશનને કોલ ફાળવવામાં મુશ્કેલીઓ ઊભી થઈ રહી છે. આ સમસ્યાઓને લઈને ગાંધીનગર ખાતે અમદાવાદ, સુરત અને વડોદરા સહિતના મહાનગરપાલિકાના ફાયર અધિકારીઓની બેઠક યોજાઈ હતી. નવી સિસ્ટમમાં નજીકના ફાયર સ્ટેશનને બદલે દૂરના સ્ટેશનને કોલ ફાળવવામાં આવતો હોવાની ફરિયાદ સામે આવી છે, જેમાં થલતેજના કોલ માટે નવરંગપુરા અને મણિનગરના કોલ માટે અન્ય ફાયર સ્ટેશનને મેસેજ આપવામાં આવ્યો હતો. આ ઉપરાંત મોબાઇલમાં કોલ મોડા દેખાવા, સાયરનની સમસ્યા, ખોટું લોકેશન, કોલરની માહિતી ન દેખાવી અને એક્શન ટેકન રિપોર્ટ ભર્યા પછી પણ કોલ બંધ ન થવા જેવી ખામીઓ રજૂ કરવામાં આવી હતી. દિવાળીના તહેવારો દરમિયાન આગના બનાવોમાં વધારો થવાની શક્યતા હોવાથી આ ખામીઓ વહેલી તકે દૂર થાય તે જરૂરી છે.