ફિક્સ પગારદારોની મોટી જીત: ગુજરાત હાઈકોર્ટનો ઐતિહાસિક ચુકાદો,લઘુત્તમ વેતન ચૂકવવા સરકારને આદેશ
છેલ્લું અપડેટ : 21 Apr 2026
Gujarat high Court: રાજ્યમાં વર્ષોથી માત્ર 2500 રૂપિયાના ફિક્સ પગારમાં ફૂલ ટાઈમ કામ કરતા કર્મચારીઓની તરફેણમાં ગુજરાત હાઈકોર્ટ ખૂબ અગત્યનો ચુકાદો જાહેર કર્યો છે. જિલ્લા પંચાયતમાં ફૂલ ટાઈમ ફરજ બજાવતા કમ્પ્યૂટર ઓપરેટર અને ડ્રાઈવરોને વર્ષોથી પાર્ટ ટાઈમ કર્મચારી ગણીને માત્ર 2500 રૂપિયાના ફિક્સ પગારથી રખાતા કર્મચારીઓએ હાઈકોર્ટમાં અરજી કરી હતી. જેમાં સરકારના નાણાં વિભાગે તેમને લઘુતમ વેતન આપવા ઈન્કાર કરી દીધો હતો. હાઈકોર્ટે નાણાં વિભાગને જૂન સુધીમાં કર્મચારીઓને લઘુતમ વેતન મુજબ 6 ટકા વ્યાજ સાથે બાકી નીકળતો પગાર ચૂકવી દેવા આદેશ કર્યો છે.
ફિક્સ પગારના કર્મચારીની હાઈકોર્ટમાં અરજી
અરજદારો દ્વારા માંગણી કરવામાં આવી હતી કે, રાજ્ય સરકારના 16 જુલાઈ 2019ના પરિપત્ર મુજબ તેમની પોસ્ટના લઘુતમ પગારધોરણનો લાભ આપવામાં આવે. તેમજ જિલ્લા વિકાસ અધિકારીએ 12 ડિસેમ્બર 2022ના અરજદારોના દાવાને નકારતો જે આદેશ રદ કર્યો હતો તે રદ કરવા માંગણી કરવામાં આવી હતી.
અરજદારોનો મુદ્દો એવો હતો કે, તેઓ લાંબા સમયથી 2500 રૂપિયાના નિશ્ચિત પગારે કામ કરે છે અને માત્ર ફિક્સ પગાર પર હોવાને કારણે તેમને લઘુતમ પગારથી વંચિત રાખી શકાય નહીં. સરકારે અગાઉ 8 કેટેગરી નક્કી કરી હતી અને તે તમામને આ પરિપત્રનો લાભ આપવામાં આવ્યો હતો.
6 ટકા વ્યાજ સાથે લઘુતમ વેતન ચૂકવવા નાણા વિભાગને હાઇકોર્ટનો આદેશ
સમગ્ર મામલે હાઈકોર્ટે નોંધ્યું કે, અરજદારોનો કેસ “કેટેગરી-3”માં આવે છે. જેમાં 29 દિવસની નોકરી અને 1 દિવસના કૃત્રિમ બ્રેક સાથે કામ કરાવવામાં આવે છે. કાયદા મુજબ આ પ્રથા યોગ્ય નથી અને આવા કર્મચારીઓને પગારના લાભથી વંચિત રાખી શકાય નહીં. તેથી કોર્ટ 12 ડિસેમ્બર 2022નો આદેશ રદ કર્યો. સાથે જ રાજ્યને આદેશ આપ્યો કે અરજદારોને 16 જુલાઈ 2019ના પરિપત્ર મુજબ લાભ આપવામાં આવે.
હાઈકોર્ટે આદેશ કર્યો કે, બાકી રહેલા પગારનો તફાવત 31 મે 2026 સુધી ગણતરી કરીને 30 જૂન 2026 સુધી ચૂકવવાનો રહેશે. ઉપરાંત આ રકમ પર 6% વ્યાજ પણ આપવાનું રહેશે.
