Ahmedabad news: શહેરના T.P રોડ પર ગેરકાયદે પાર્કિંગ સામે AMCની કડક કાર્યવાહી, 2 દિવસમાં 384 નોટિસ ફટકારી
છેલ્લું અપડેટ : 26 Dec 2025
Ahmedabad news: અમદાવાદ શહેરમાં જાહેર રસ્તા, ટી.પી. રોડ તથા ફૂટપાથ પર ગેરકાયદે વાહન પાર્કિંગના કારણે સર્જાતી ટ્રાફિક સમસ્યાને ગંભીરતાપૂર્વક ધ્યાનમાં રાખીને અમદાવાદ મ્યુનિસિપલ કોર્પોરેશન(AMC)ના એસ્ટેટ વિભાગ દ્વારા શહેરના તમામ ઝોનમાં કડક કાર્યવાહી હાથ ધરવામાં આવી છે. આ કાર્યવાહી અંતર્ગત માત્ર બે દિવસમાં અંદાજિત 384 નોટિસો આપવામાં આવી છે.
AMC દ્વારા કરવામાં આવેલી તપાસ દરમિયાન સામે આવ્યું છે કે, શહેરના અનેક રહેણાંક તથા વાણિજ્યિક બિલ્ડીંગોમાં પ્લોટની અંદર જરૂરી પાર્કિંગ વ્યવસ્થા ન રાખી, જાહેર ટી.પી. રોડ, ફૂટપાથ તથા અન્ય જાહેર જગ્યાઓ પર પરવાનગી વગર વાહનો પાર્ક કરવામાં આવી રહ્યા છે, જેના કારણે ટ્રાફિક વ્યવસ્થામાં ગંભીર અડચણો ઊભી થઈ રહી છે. આ સ્થિતિને નિયંત્રિત કરવા માટે સંબંધિત તમામ માલિકો, હાઉસિંગ એસોસિએશન, ચેરમેન, સેક્રેટરી, બિલ્ડીંગ માલિકો, કબ્જેદારો તથા વપરાશકર્તાઓને નીતિ-નિયમો અનુસાર ફરજિયાત રીતે પોતાના વાહનોનું પાર્કિંગ પ્લોટ અથવા પ્રિમાઇસીસની અંદર જ કરવા સૂચના આપવામાં આવી છે અને જ્યાં ઇમ્પ્લીમેન્શન નથી થઈ રહ્યું ત્યાં નોટિસ પણ આપવામાં આવી છે.
AMC દ્વારા સ્પષ્ટ સૂચના આપવામાં આવી છે કે દરેક બિલ્ડીંગમાં પાર્કિંગ માટે યોગ્ય સાઇનેજ અને વ્યવસ્થા ઊભી કરવી તેમજ બિલ્ડીંગની બહાર આવેલા મ્યુનિસિપલ રસ્તા, ફૂટપાથ અથવા જાહેર જગ્યાઓમાં પાર્કિંગ ન થાય તે માટે કાયમી નિયંત્રણ વ્યવસ્થા અમલમાં મૂકવી ફરજિયાત રહેશે.
આ સાથે, બિલ્ડીંગની ફ્રન્ટ માર્જિન વિસ્તારમાં માલ-સામાન મૂકી દબાણ ન થાય તે માટે જરૂરી પગલાં લેવા તેમજ પાર્કિંગમાં અવરોધરૂપ બને તેવા ઓટલા, લેન્ડસ્કેપિંગ તથા અન્ય અડચણો તાત્કાલિક દૂર કરી ખુલ્લી જગ્યાનો ઉપયોગ પાર્કિંગ હેતુસર કરવા પણ સૂચના આપવામાં આવી છે.
આ બાબતે નોંધનીય છે કે અગાઉ પણ AMC દ્વારા આ મુદ્દે નોટિસો આપવામાં આવી ચૂકી છે અને નાગરિકોને પાર્કિંગ વ્યવસ્થાને લઈને સતત જાગૃત કરવામાં આવ્યા છે. ખાસ કરીને ફૂટપાથ પર વાહન પાર્કિંગ ન કરવું, જાહેર માર્ગોને અવરોધરૂપ ન બનાવવું અને પોતાના વાહનો પોતાની પ્રિમાઈસિસની અંદર જ પાર્ક કરવા અંગે નાગરિકોને સ્પષ્ટ સૂચન કરવામાં આવ્યું છે.
AMC દ્વારા અંતમાં જણાવવામાં આવ્યું છે કે જો ઉપરોક્ત સૂચનાઓનું પાલન કરવામાં નહીં આવે તો માનનીય ગુજરાત હાઇકોર્ટના આદેશો તથા માર્ગદર્શિકાઓ મુજબ કડક કાર્યવાહી કરવામાં આવશે. નાગરિકો પોતે જ ટ્રાફિક વ્યવસ્થાપન અંગે જાગૃત બની નિયમોનું પાલન કરશે તો અમદાવાદ શહેરની ટ્રાફિક સમસ્યા નોંધપાત્ર રીતે હળવી બનશે.
