Ahmedabad/ ચાલુ કારે ડ્રાઇવરને ખેંચ આવી જતા અકસ્માત, અખબાર નગર સર્કલ પાસે બે કાર વચ્ચે ટક્કર
છેલ્લું અપડેટ : 08 Feb 2026
અમદાવાદ શહેરના નવા વાડજ વિસ્તારમાં અખબારનગર સર્કલ નજીક બે કાર વચ્ચે અકસ્માત સર્જાતા થોડા સમય માટે ટ્રાફિક વ્યવહાર ખોરવાઈ ગયો હતો. મળતી માહિતી અનુસાર, કાર ચલાવતા ડ્રાઇવરને અચાનક ખેંચ આવી જતા વાહન પરનો કાબુ ગુમાવતા અકસ્માત સર્જાયો હતો. સદભાગ્યે આ ઘટનામાં કોઈ જાનહાનિ નોંધાઈ નથી, જોકે વાહનોને નુકસાન થયું હતું.
પ્રાથમિક વિગતો મુજબ, અખબારનગર સર્કલ પાસે એક કાર ચાલક વાહન લઈને પસાર થઈ રહ્યો હતો ત્યારે તેને અચાનક ખેંચ આવી હતી. અચાનક શારીરિક અસ્વસ્થતા સર્જાતા ડ્રાઇવર સ્ટીયરિંગ પરનો કાબુ જાળવી શક્યો નહોતો. પરિણામે કાર ઝડપથી આગળ વધી અને આગળ ચાલી રહેલી કિયા કાર સાથે ધડાકાભેર અથડાઈ હતી. અથડામણનો અવાજ સાંભળતા આસપાસના લોકો ઘટના સ્થળે દોડી આવ્યા હતા.
અકસ્માત બાદ થોડા સમય માટે માર્ગ પર વાહનોની લાંબી કતારો લાગી ગઈ હતી અને ટ્રાફિક જામ સર્જાયો હતો. ખાસ કરીને પીક અવર્સ દરમિયાન અકસ્માત બનતા વાહનચાલકોને મુશ્કેલીનો સામનો કરવો પડ્યો હતો. ઘટનાની જાણ થતાં જ ટ્રાફિક પોલીસ ઘટના સ્થળે પહોંચી હતી અને ટ્રાફિક વ્યવસ્થા સંભાળી માર્ગને ફરી સામાન્ય બનાવ્યો હતો.
પોલીસ દ્વારા બંને વાહનોને રસ્તા પરથી હટાવી ટ્રાફિક ક્લિયર કરાવવામાં આવ્યો હતો. સાથે જ અકસ્માત અંગેની માહિતી એકત્રિત કરીને આગળની તપાસ હાથ ધરવામાં આવી છે. ડ્રાઇવરની તબિયત અંગે પણ પૂછપરછ કરવામાં આવી રહી છે અને જરૂરી તબીબી સારવાર અપાઈ હોવાનું જાણવા મળ્યું છે.