VIDEO/ Morbi: હળવદમાં કાળમુખો અકસ્માત; તાલુકા પંચાયતના વર્તમાન અને પૂર્વ સદસ્ય સહિત 5 નાં મોત

હળવદ તાલુકાના ચરાડવા ગામ નજીક સર્જાયેલા ગમખ્વાર માર્ગ અકસ્માતમાં પાંચ લોકોનાં મોત નીપજ્યાં છે, જેને પગલે રણછોડગઢ ગામમાં શોકનું મોજું ફરી વળ્યું છે. ગઈકાલે રાત્રે ઊભેલા ડમ્પર પાછળ કાર ઘૂસી જતાં આ ભયાનક અકસ્માત સર્જાયો હતો. કારમાં સવાર કુલ સાત લોકોમાંથી બે વ્યક્તિ ગંભીર રીતે ઈજાગ્રસ્ત થઈ છે. અકસ્માતમાં તાલુકા પંચાયતના વર્તમાન અને પૂર્વ સદસ્ય સહિત પાંચ લોકોનાં મોત થતાં સમગ્ર પંથકમાં અરેરાટી વ્યાપી ગઈ છે. એક જ ગામના પાંચ લોકોના અકાળે અવસાનથી પરિવારો પર આભ તૂટી પડ્યું છે. આજે ગામમાં એક સાથે પાંચ અર્થી નીકળતાં અત્યંત હૃદયદ્રાવક દૃશ્યો સર્જાયા હતા અને આખું ગામ હિબકે ચડ્યું હતું.