Video: 'વિદેશી બેન્ડને છૂટ અને મારા પર પ્રતિબંધ કેમ?': અમદાવાદમાં દિલજીત દોસાંજે ટીકાકારોને આપ્યો જડબાતોડ જવાબ

દિલજીત દોસાંઝ પોતાના નિવેદનોને લઈને ચર્ચામાં રહે છે. જ્યાં અગાઉ પોતાના કોન્સર્ટમાં તેમના ગીતોને મંજૂરી ન મળવા પર તેઓ બોલતા જોવા મળ્યા હતા, તો હવે અમદાવાદના કોન્સર્ટમાં ફરી એકવાર તેમણે પોતાના દિલની વાત રજૂ કરી. તેમણે કહ્યું, જ્યારે વિદેશી બેન્ડ 'કોલ્ડપ્લે' બહારથી આવીને "આઈ એમ ફીલિંગ ડ્રંક એન્ડ હાઈ" (I am feeling drunk and high) જેવા શબ્દો ગાય છે, ત્યારે કોઈ સવાલ ઉઠાવતું નથી. પ્રતિબંધ બસ મારા પર જ લગાવવો છે! હું ભારતમાં જન્મ્યો છું અને અહીં જ ઉછર્યો છું, હોનોલુલુ જેવી કોઈ જગ્યાએ નહીં. તેનો આ વીડિયો સોશિયલ મીડિયા પર ખૂબ વાયરલ થઈ રહ્યો છે.
દિલજીત દોસાંઝે અમદાવાદ કોન્સર્ટમાં કહી આ વાત
શનિવારે સાંજે અમદાવાદમાં પોતાના કોન્સર્ટ દરમિયાન, ગાયક દિલજીત દોસાંઝે પ્રેક્ષકો સાથે વાત કરતા પોતાના ટીકાકારોને જડબાતોડ જવાબ આપતા કહ્યું કે અમદાવાદના નરેન્દ્ર મોદી સ્ટેડિયમમાં પરફોર્મ કરવું તેમના માટે એક સપનું સાકાર થવા સમાન છે. તેમણે એમ પણ કહ્યું કે આ દુનિયાનું સૌથી મોટું સ્ટેડિયમ છે, જેના પર સૌને ગર્વ હોવો જોઈએ.
પોતાના શોને લઈને ચાલી રહેલા વિવાદો અને પ્રતિબંધોનો ઉલ્લેખ કરતા દિલજીત દોસાંઝે સવાલ ઉઠાવ્યો કે તેમના અને આંતરરાષ્ટ્રીય કલાકારો વચ્ચે આ 'બેવડા ધોરણો' (ડબલ સ્ટાન્ડર્ડ) કેમ છે? તેમણે કહ્યું કે જ્યારે વિદેશી બેન્ડ 'કોલ્ડપ્લે' બહારથી આવીને "આઈ એમ ફીલિંગ ડ્રંક એન્ડ હાઈ" જેવા શબ્દો ગાય છે, ત્યારે કોઈ કંઈ કહેતું નથી, જ્યારે તેમના પોતાના ગીતો પર વાંધો ઉઠાવવામાં આવે છે. તેમણે સ્પષ્ટ કર્યું કે તેમને ખુદ 'કોલ્ડપ્લે'નું તે ગીત પસંદ છે, પરંતુ તેમણે સવાલ કર્યો કે જ્યારે તેઓ ગાય છે ત્યારે જ અધિકારીઓ અને ટીકાકારોને તકલીફ કેમ થાય છે? તેમણે પૂછ્યું કે વિદેશી કલાકારોનો તો સ્વીકાર કરી લેવામાં આવે છે, પરંતુ પ્રતિબંધો માત્ર તેમના પર જ કેમ લગાવવામાં આવે છે?
દિલજીત દોસાંઝે એ ધારણાને પણ ફગાવી દીધી કે તેઓ કોઈ 'બહારની' વ્યક્તિ છે. તેમણે સ્પષ્ટ શબ્દોમાં કહ્યું કે તેઓ ભારતમાં જ જન્મ્યા છે અને અહીં જ ઉછર્યા છે, ન કે હોનોલુલુ જેવી કોઈ વિદેશી જગ્યાએ. તેમણે પોતાના મૂળનો ઉલ્લેખ કરતા એમ પણ જણાવ્યું કે તેમની સાથે દુનિયાભરમાં કામ કરનારા અને મુસાફરી કરનારા તમામ સંગીતકારો પણ ભારતીય જ છે.
આટલું જ નહીં, પંજાબી સિંગરે કહ્યું કે તેમને આ 'બેવડા માપદંડ' સમજાતા નથી અને તેમને પોતાના ટીકાકારોની પરવા પણ નથી. તેમણે કહ્યું કે તેઓ બસ આ પરિસ્થિતિની મજા લઈ રહ્યા છે અને તેને હળવાશથી જોઈ રહ્યા છે. તેમણે મજાકમાં પોતાના ટીકાકારોને "આઈ લવ યુ" પણ કહ્યું. જોકે, તેમણે એક ચેતવણી પણ આપી કે તેમને છંછેડવાની કે ઉશ્કેરવાની કોશિશ ન કરવી, કારણ કે જો કોઈ તેમને ઉશ્કેરશે, તો તેઓ ચોક્કસ જવાબ આપશે.






