દિગ્ગજ ગાયિકા ઉષા મંગેશકરને અપાશે રાષ્ટ્રીય પુરસ્કાર, આસામ મુખ્યમંત્રીએ કરી જાહેરાત

આસામ સરકારે પ્લેબેક સિંગર ઉષા મંગેશકરને પ્રથમ ડૉ. ભૂપેન હજારિકા નેશનલ અવોર્ડ (રાષ્ટ્રીય પુરસ્કાર)થી સન્માનિત કરવાનો નિર્ણય કર્યો છે. 90 વર્ષની ઉષા મંગેશકરને નવી દિલ્હીમાં સન્માનિત કરવામાં આવશે. વડાપ્રધાન મોદી દિગ્ગજ ગાયિકાને 29 નવેમ્બરે નવી દિલ્હીના ભારત મંડપમમાં આ પુરસ્કાર આપશે. પુરસ્કાર હેઠળ ઉષા મંગેશકરને 10 લાખ રૂપિયાની રોકડ રકમ અને પ્રશસ્તિ પત્ર આપવામાં આવશે.

29 નવેમ્બરે નવી દિલ્હીમાં આયોજિત ઇવેન્ટ સાથે ડૉ. ભૂપેન હજારિકાના 100મા જન્મદિનની ઉજવણી પણ કરવામાં આવશે. આસામમાં છેલ્લા ત્રણ વર્ષથી ભૂપેન હજારિકાના 100મા જન્મદિનની ઉજવણી કરવામાં આવી રહી છે. આ સન્માન સમારોહ સાથે આ ઉજવણીનું સમાપન થશે.

આસામ મુખ્યમંત્રીએ કરી જાહેરાત

મુખ્યમંત્રી હિમંત બિસ્વા સરમાના જણાવ્યા મુજબ આ રાષ્ટ્રીય પુરસ્કાર દર ત્રણ વર્ષે આપવામાં આવશે. સંગીત, કળા અને સિનેમાના ક્ષેત્રમાં રાષ્ટ્રીય કે આંતરરાષ્ટ્રીય સ્તરે ઓળખ બનાવનાર હસ્તીઓને આના માટે પસંદ કરવામાં આવશે. આ સન્માનનો હેતુ ભૂપેન હજારિકાની સાંસ્કૃતિક અને કલાત્મક વારસાગત વિરાસતને આગળ વધારવાનો છે.

ઉષા મંગેશકરે અનેક ભાષાઓમાં ગાયા છે ગીત

ઉષા મંગેશકરના સંગીતના સફરની વાત કરીએ તો દિગ્ગજ ગાયિકાએ મરાઠી, મણિપુરી, હિન્દી, બંગાળી, કન્નડ, નેપાળી, ભોજપુરી, ગુજરાતી, ઓડિયા અને આસામી ભાષામાં ગીતો ગાયા છે. તે ચારેય મંગેશકર બહેનોમાં સૌથી નાની છે. ઉષા મંગેશકર, દિવંગત ગાયિકા લતા મંગેશકર અને આશા ભોસલેની નાની બહેન છે. તેમને સંગીત પરિવારથી વારસામાં મળ્યું છે.

ઉષા મંગેશકરે વર્ષ 1975માં આવેલી ફિલ્મ ‘જય સંતોષી માંના ગીતોથી પોતાની કારકિર્દીની શરૂઆત કરી હતી. આ ફિલ્મમાં તેમના ભક્તિ ગીતને જબરદસ્ત પ્રતિસાદ મળ્યો હતો. તેમના અવાજને ખૂબ જ પસંદ કરવામાં આવ્યો હતો. તે મરાઠી ફિલ્મ ‘પિંજરા’ના ગીત ‘મુંગડા’ માટે પણ પ્રખ્યાત છે. તેમણે અનેક ભાષાઓની ફિલ્મોના ગીતો ગાયા છે. ઉષા મંગેશકરે દૂરદર્શનનું મ્યુઝિકલ ડ્રામા ‘ફૂલવંતી’ પણ પ્રોડ્યુસ (નિર્માણ) કર્યું હતું. હવે ડૉ. ભૂપેન હજારિકા નેશનલ અવોર્ડ તેમની કારકિર્દીમાં મહત્વનો સીમાચિહ્ન સાબિત થશે.