'Mahavatar Narasimha' એ વીકેન્ડ પર મચાવી ધૂમ, ભારતની સૌથી મોટી એનિમેટેડ હિટ

'મહાવતાર નરસિમ્હા'ને ભલે શરૂઆતમાં જોરદાર ઓપનિંગ ન મળ્યું, પરંતુ ત્યારબાદ ફિલ્મ સતત સારી કમાણી કરી રહી છે. મહાવતાર નરસિંહા બોક્સ ઓફિસ પર સતત રેકોર્ડ તોડી રહી છે. રિલીઝના માત્ર ત્રણ દિવસમાં જ આ ફિલ્મ ભારતની સૌથી વધુ કમાણી કરનારી એનિમેશન ફિલ્મ બની ગઈ. એટલું જ નહીં, ચોથા દિવસે 6.1 કરોડ રૂપિયાનું કલેક્શન કરીને ફિલ્મે સોમવારના ટેસ્ટમાં પણ સફળતા મેળવી.

ફિલ્મી ભાષામાં સોમવારનો ટેસ્ટ એટલે રિલીઝ પછીનો પહેલો સોમવાર. કારણ કે શનિવાર-રવિવારે લોકોને સામાન્ય રીતે રજા હોય છે, તેથી ફિલ્મો વીકએન્ડ પર સારી કમાણી કરી લે છે. પરંતુ સોમવારે ઓફિસો ફરી શરૂ થઈ જાય છે અને યુવાનો શાળા-કોલેજ જવા લાગે છે, જેના કારણે સિનેમાઘરોમાં ભીડ ઓછી થઈ જાય છે. આવી સ્થિતિમાં દર્શકોને ફિલ્મ જોવા માટે આકર્ષવું ખૂબ મુશ્કેલ હોય છે. પરંતુ 'મહાવતાર નરસિંહા'ના કિસ્સામાં આવું નથી થયું. આ ફિલ્મે સોમવારે 6.1 કરોડ રૂપિયાની કમાણી કરી. આ રવિવારના કલેક્શન કરતાં ઓછું છે, પરંતુ શુક્રવાર અને શનિવાર કરતાં વધુ છે.

25 જુલાઈએ ઓપનિંગ ડે પર ફિલ્મે 1.75 કરોડ રૂપિયાનું કલેક્શન કર્યું હતું. પરંતુ વર્ડ ઓફ માઉથ પબ્લિસિટીના કારણે તેના કલેક્શનમાં જબરદસ્ત ઉછાળો આવ્યો. શનિવારે ફિલ્મે 4.6 કરોડ રૂપિયાનો બિઝનેસ કર્યો. રવિવારે તેની કમાણી 9.5 કરોડ રૂપિયા સુધી પહોંચી ગઈ. જો સોમવારનું કલેક્શન ઉમેરવામાં આવે તો, ફિલ્મે અત્યાર સુધી ડોમેસ્ટિક ઓડિયન્સ પાસેથી 21.95 કરોડ રૂપિયાનું કલેક્શન કર્યું છે. આ કમાણી ફિલ્મના હિન્દી અને તેલુગુ વર્ઝન સહિત કુલ 5 ભાષાઓમાં થઈ છે. જોકે, ફિલ્મના બોક્સ ઓફિસ કલેક્શનનો મુખ્ય સ્ત્રોત હિન્દી દર્શકો જ છે.

એનિમેશન ફિલ્મ હોવા છતાં 'મહાવતાર નરસિમ્હા'ના વિઝ્યુઅલ્સ અને સ્ટોરીલાઇનની ખૂબ પ્રશંસા થઈ રહી છે. અશ્વિન કુમારના નિર્દેશનમાં બનેલી આ ફિલ્મને હોમ્બલે ફિલ્મ્સે પ્રસ્તુત કરી છે, જે અગાઉ KGF, 'સલાર' અને 'કાંતારા' જેવી ફિલ્મોનું નિર્માણ કરી ચૂકી છે. આ બધી મોટા પાયે બનેલી એક્શન ફિલ્મો હતી. થોડા સમય પહેલા નિર્માતાઓએ 'મહાવતાર સિનેમેટિક યુનિવર્સ' (MCU)ની જાહેરાત કરી હતી. આના અંતર્ગત ભગવાન વિષ્ણુના દસ અવતારો પર સાત એનિમેશન ફિલ્મો બનાવવામાં આવશે. 'મહાવતાર નરસિમ્હા' આ શ્રેણીની પ્રથમ ફિલ્મ છે.