દીપિકા પાદુકોણે ફેન્સ સાથે સેલિબ્રેટ કર્યો પોતાનો 40મો જન્મદિવસ
છેલ્લું અપડેટ : 05 Jan 2026
બોલિવૂડની ગ્લેમર ક્વીન દીપિકા પાદુકોણ આજે 40 વર્ષની થઈ ગઈ છે. આ ખાસ અવસરે સોશિયલ મીડિયા પર તેને સતત તેના ચાહકો દ્વારા અભિનંદન મળી રહ્યા છે. 'પીકુ' થી લઈને 'પદ્માવત' સુધી પોતાની દમદાર એક્ટિંગથી દર્શકોના દિલમાં ખાસ જગ્યા બનાવી ચૂકેલી દીપિકાનો આ જન્મદિવસ માત્ર તેના ફેન્સ માટે જ નહીં પરંતુ પરિવાર અને મિત્રો માટે પણ સ્પેશિયલ છે.
ચાહકો સાથે દીપિકાએ ઉજવ્યો જન્મદિવસ
રસપ્રદ વાત એ છે કે દીપિકાએ તેના જન્મદિવસ પહેલા જ તેના ચાહકો સાથે ખુશીઓ વહેંચી લીધી હતી. ન્યૂ યર અને જન્મદિવસ મનાવવા માટે અમેરિકા રવાના થતા પહેલા તેણે મુંબઈમાં ફેન્સ માટે એક ખાસ મુલાકાત રાખી હતી, જ્યાં તેણે ન માત્ર તેમની સાથે વાતચીત કરી, પરંતુ કેક કાપીને તેમનો પ્રેમ પણ સ્વીકાર્યો. આ વીડિયો હવે સોશિયલ મીડિયા પર વાયરલ થઈ રહ્યો છે.
દીપિકા માટે ખાસ રહ્યું આયોજન
આ આયોજન દીપિકાના 'ગ્રેટીટ્યુડ ડે' (કૃતજ્ઞતા દિવસ)નો ભાગ હતો, જેમાં તેણે તેના ફેન્સ પ્રત્યે આભાર વ્યક્ત કર્યો હતો. મુંબઈના મહાલક્ષ્મી વિસ્તારમાં યોજાયેલા આ ઈવેન્ટમાં મોટી સંખ્યામાં દીપિકાના ફેન્સ પહોંચ્યા હતા. અભિનેત્રીના આ સ્પેશિયલ ડેને પ્રશંસકોએ વધુ ખાસ બનાવી દીધો હતો.
સ્ટાઇલિશ અંદાજમાં જોવા મળી દીપિકા
આ દરમિયાન દીપિકા અત્યંત સાદા પણ સ્ટાઈલિશ અંદાજમાં જોવા મળી હતી. મરૂન રંગના કો-ઓર્ડ સેટમાં તેની એલિગન્સ (ભવ્યતા) જોવા જેવી હતી. ફેન્સની વચ્ચે ઘેરાયેલી દીપિકા સતત સ્મિત આપતી રહી અને દરેક સાથે ફોટો પડાવવાથી લઈને વાતચીત કરતી જોવા મળી. કેક કાપ્યા બાદ દીપિકાએ હાથ જોડીને સૌનો આભાર માન્યો હતો.
પતિ રણવીર સાથે અમેરિકા રવાના થઈ
આ ઈવેન્ટ બાદ દીપિકા તેના પતિ રણવીર સિંહ સાથે અમેરિકા રવાના થઈ ગઈ હતી. એવું કહેવામાં આવી રહ્યું છે કે કપલે ત્યાં જ ન્યૂ યર સેલિબ્રેટ કર્યું અને હવે દીપિકા પોતાનો 40મો જન્મદિવસ પણ ન્યૂયોર્કમાં મનાવી રહી છે. દીપિકા અને રણવીરની જોડી હંમેશાથી ફેન્સની ફેવરિટ રહી છે.
વર્કફ્રન્ટ પર દીપિકા પાદુકોણ
જો વર્કફ્રન્ટની વાત કરીએ તો દીપિકા માટે આગામી વર્ષ પણ ઘણું મોટું રહેવાનું છે. તે ટૂંક સમયમાં શાહરૂખ ખાનની આગામી ફિલ્મ 'કિંગ'માં જોવા મળશે, જેનું નિર્દેશન સિદ્ધાર્થ આનંદ કરી રહ્યા છે. માનવામાં આવે છે કે દીપિકાના જન્મદિવસ નિમિત્તે તેના પાત્ર સાથે જોડાયેલી પહેલી ઝલક સામે આવી શકે છે, જેની ફેન્સ આતુરતાથી રાહ જોઈ રહ્યા છે.
