રાત્રે સૂતા અનુજ ઠાકુર ક્યારેય જાગ્યા જ નહીં! 33 વર્ષની ઉંમરે ટીવી એક્ટરનું અચાનક નિધન, માતા રૂમમાં પહોંચ્યાં ત્યારે...

જાણીતા ટીવી એક્ટર અનુજ ઠાકુરનું અચાનક નિધન થયું છે. અનુજે માત્ર 33 વર્ષની નાની ઉંમરે દુનિયાને અલવિદા કહી દીધું છે. તેઓ રાત્રે સૂતા હતા અને ત્યારબાદ સવારનો સૂરજ જોઈ શક્યા નહોતા. ઊંઘમાં જ તેમણે અંતિમ શ્વાસ લીધા હતા. તેમના અચાનક નિધનથી પરિવાર પર દુઃખનો પહાડ તૂટી પડ્યો છે, જ્યારે ટીવી ઇન્ડસ્ટ્રીમાં પણ શોકની લાગણી ફેલાઈ ગઈ છે.

કેવી રીતે થયું અનુજ ઠાકુરનું નિધન?

અનુજ ઠાકુરનું નિધન મુંબઈના ઓશિવારા સ્થિત તેમના નિવાસસ્થાને ઊંઘ દરમિયાન થયું હતું. મળતી માહિતી મુજબ, મંગળવાર (27 ઓક્ટોબર)ના રોજ ઊંઘમાં જ તેમને હૃદય સંબંધિત નહીં પરંતુ સંભવિત રીતે મગજનો હુમલો (દૌરો એટલે કે મિર્ગી) આવતાં તેમનું મોત થયું હતું. એક્ટરના નજીકના મિત્ર અને કાસ્ટિંગ ડિરેક્ટર રૂપેશ સોનારે એક ખાસ વાતચીતમાં આ સમાચારની પુષ્ટિ કરી હતી.

રૂપેશ સોનારે જણાવ્યું હતું કે અનુજના અચાનક નિધનથી તેમનો પરિવાર ઊંડા આઘાતમાં છે અને આ મુશ્કેલ સમયમાં પરિવારે સૌને તેમની પ્રાઇવસી જાળવવાની અપીલ કરી છે. રૂપેશ સોનારે કહ્યું હતું કે, અનુજ છેલ્લા કેટલાક સમયથી ઇન્ડસ્ટ્રીથી દૂર હતા, પરંતુ બંને સતત એકબીજાના સંપર્કમાં હતા. તેમના નિધનના આશરે 10 દિવસ પહેલાં જ બંનેની મુલાકાત થઈ હતી. શુક્રવારે જ્યારે તેમણે અનુજનો સંપર્ક કરવાનો પ્રયાસ કર્યો, ત્યારે તેમના પરિવારે ફોન ઉપાડીને તેમના નિધનના સમાચાર આપ્યા હતા.

એક વર્ષ પહેલાં પણ આવ્યો હતો દૌરો

રૂપેશ સોનારે વધુમાં જણાવ્યું હતું કે, જ્યારે તેઓ અનુજના પરિવારને મળ્યા ત્યારે પરિવારે કહ્યું હતું કે કદાચ ઊંઘમાં દૌરો આવવાને કારણે તેમનું નિધન થયું છે. સવારે અનુજનું એલાર્મ વાગ્યું હતું. ત્યારબાદ તેમની માતા તેમને જોવા માટે રૂમમાં ગયાં ત્યારે અનુજનું નિધન થઈ ચૂક્યું હતું.

રૂપેશે વધુમાં જણાવ્યું કે, આ વર્ષની શરૂઆતમાં પણ અનુજને એક વખત દૌરો આવ્યો હતો, જેના માટે તેઓ દવાઓ લઈ રહ્યા હતા. આ વખતે કદાચ તેઓ એકલા હોવાથી સમયસર મદદ મળી શકી નહોતી અને તેમનો જીવ બચાવી શકાયો નહોતો.

અનુજને યાદ કરીને ભાવુક થયા રૂપેશ સોનાર

કાસ્ટિંગ ડિરેક્ટર રૂપેશ સોનારના જણાવ્યા અનુસાર, અનુજ ઠાકુરનો પરિવાર તેમના અંતિમ સંસ્કાર માટે હરિદ્વાર પહોંચ્યો છે. અનુજને યાદ કરતાં રૂપેશે કહ્યું કે તેઓ હજુ પણ તેમના નિધનના સમાચાર સ્વીકારી શકતા નથી. મિત્રના અચાનક વિદાયથી તેઓ ઊંડા આઘાતમાં છે.

અનુજની યાદમાં રૂપેશે સોશિયલ મીડિયા પર એક ભાવુક પોસ્ટ પણ શેર કરી હતી. આ પોસ્ટમાં તેમણે લખ્યું હતું કે, 'હજુ પણ વિશ્વાસ નથી થતો કે તું હવે આપણી વચ્ચે નથી. તું માત્ર મારો મિત્ર જ નહોતો, પરંતુ મારા નાના ભાઈ જેવો હતો. આપણે સાથે મળીને અનેક પ્રોજેક્ટ્સનું આયોજન કર્યું હતું. મને આજે પણ તારા શરૂઆતના દિવસોનો સંઘર્ષ અને તારી આખી સફર યાદ છે.'

તેમણે આગળ લખ્યું હતું કે, 'જીવન ખરેખર કેટલું અનિશ્ચિત છે. તું આટલી નાની ઉંમરે અમને છોડીને જતો રહ્યો છે એ સ્વીકારવું ખૂબ જ દુઃખદાયક છે. આ સમાચાર હજુ પણ અવિશ્વસનીય અને અણધાર્યા લાગે છે. ભાઈ, તને હંમેશાં યાદ રાખવામાં આવશે. ભગવાન તારી આત્માને શાંતિ આપે.'

'ધૂમ મચાઓ ધૂમ' સહિત અનેક ટીવી શોમાં કર્યું હતું કામ

અનુજ ઠાકુરની વાત કરીએ તો તેણે 'ધૂમ મચાઓ ધૂમ', 'બંધન સાત જન્મો કા' અને 'મહિસાગર' જેવા લોકપ્રિય ટીવી શોમાં કામ કર્યું હતું. પોતાની અભિનય ક્ષમતાથી તેણે દર્શકોના દિલમાં ખાસ જગ્યા બનાવી હતી. તેના અચાનક નિધનના સમાચારથી ચાહકો પણ શોકમાં ગરકાવ થઈ ગયા છે. સોશિયલ મીડિયા પર ફેન્સ તેમને ભાવભીની શ્રદ્ધાંજલિ આપી રહ્યા છે.