12મું પાસ કર્યા પછી શું કરવું? બેસ્ટ છે 5 કોર્સ, કોઈપણ સ્ટ્રીમના વિદ્યાર્થી લઈ શકે છે એડમીશન

12 પાસ વિદ્યાર્થીઓ માટે કોલેજમાં પુષ્કળ વિકલ્પો છે. આ વર્ષે લાખો વિદ્યાર્થીઓ CUET UG પરીક્ષા આપીને વિવિધ કોલેજોમાં પ્રવેશ માટે અરજી કરશે. મોટી સંખ્યામાં 12 પાસ વિદ્યાર્થીઓએ NEET UG અને JEEની  પરીક્ષા પણ આપી છે. આ બધાની વચ્ચે, એવા લાખો વિદ્યાર્થીઓ છે જેઓ મેડિકલ કે એન્જિનિયરિંગ કોર્સમાં એડમિશન લેવા માંગતા નથી પરંતુ ઓફબીટ કરિયર ઓપ્શન શોધી રહ્યા છે.

ગ્રેજ્યુએશન લેવલ પર ઘણા કોર્સ છે જેમાં એડમીશન લેવા માટે કોઈપણ ખાસ સ્ટ્રીમ માંથી પાસ થયા હોવાની આવશ્યકતા નથી. આ કોર્સમાં, કોઈપણ સ્ટ્રીમમાંથી 12મું પાસ કરનાર વિદ્યાર્થી, પછી તે આર્ટસ, સાયન્સ કે કોમર્સ હોય, સરળતાથી પ્રવેશ લઈ શકે છે. આમાંના કેટલાક માટે, કોલેજ અથવા યુનિવર્સિટી લેવલે પ્રવેશ પરીક્ષા લેવામાં આવે છે, જ્યારે કેટલાકમાં, 12મા ધોરણના પરિણામના આધારે પ્રવેશ આપવામાં આવે છે. જાણો 12મા પછી ઉચ્ચ શિક્ષણ માટે તમે કયા કોર્સમાં એડમિશન લઈ શકો છો.

12મી પછી કારકિર્દીના ઘણા વિકલ્પો છે. જો વિદ્યાર્થીઓ ઇચ્છે તો તેઓ MBBS, B.Tech, BBA, BA, B.Com, B.Sc જેવા પરંપરાગત કારકિર્દી વિકલ્પોને બદલે ટ્રેન્ડિંગ કોર્સમાં પણ પ્રવેશ મેળવી શકે છે. આ દિવસોમાં, AI એટલે કે આર્ટિફિશિયલ ઈન્ટેલિજન્સ અને ML એટલે કે મશીન લર્નિંગની ઘણી માંગ છે. જો તમે ઈચ્છો તો, તમે સંબંધિત કોર્સમાં ડિગ્રી અથવા સર્ટિફિકેટ મેળવીને તેમાં કારકિર્દી બનાવી શકો છો. જાણો આવા 5 કોર્સ, જેમાં એડમિશન લેવા માટે કોઈ ખાસ સ્ટ્રીમમાંથી પાસ થવાની જરૂર નથી.

ડિજિટલ માર્કેટિંગ

ડિજિટલ માર્કેટિંગનું ક્ષેત્ર ખૂબ જ ઝડપથી ઉભરી રહ્યું છે. આવનારા કેટલાક વર્ષોમાં પણ તેમાં ઘટાડો થવાની કોઈ શક્યતા નથી. આ દિવસોમાં, જ્યારે જોબ માર્કેટ વિશે શંકા છે, ત્યારે ડિજિટલ માર્કેટિંગમાં નોકરીઓની ભરમાર છે. જો તમે તમારી કરિયરમાં ગ્રોથ મેળવવા માંગો છો અથવા બિઝનેસ ક્ષેત્રે આગળ વધવા માંગો છો, તો 12મી પછી ડિજિટલ માર્કેટિંગ સાથે સંબંધિત કોર્સ કરો. આ અંતર્ગત સર્ચ એન્જિન માર્કેટિંગ, ડિજિટલ એડ સ્પેશિયાલિસ્ટ, ડિજિટલ માર્કેટિંગ એક્ઝિક્યુટિવ, વેબ એનાલિસ્ટ જેવા ક્ષેત્રોમાં નોકરી મેળવી શકાય છે.

ફિલ્મ અને ટેલિવિઝન ડિપ્લોમા

જો તમે ક્રિએટિવ છો અને ફિલ્મ અને ટેલિવિઝનના ક્ષેત્રમાં કંઈક કરવા માંગો છો, તો તમે આ ક્ષેત્ર સાથે સંબંધિત ડિપ્લોમા, ડિગ્રી અથવા સર્ટિફિકેટ કોર્સ કરી શકો છો. આ ક્ષેત્રમાં કમાણી કરવાની સારી તકો છે. જો તમારામાં ટેલેન્ટ છે, તો તમે આ ક્ષેત્રમાં કારકિર્દી બનાવી શકો છો. તમે ફિલ્મ, ટેલિવિઝન અને મીડિયામાં કારકિર્દી બનાવી શકો છો. ટ્રેનીંગ દરમિયાન, તમે ફિલ્મ ડાયરેકશન, સિનેમેટોગ્રાફી, એડીટીંગ, એક્ટિંગ, સ્ક્રિપ્ટ રાઈટીંગ, ઓડિયો-વિઝ્યુઅલ પ્રોડક્શનની મૂળભૂત બાબતો શીખી શકો છો.

આર્કિટેક્ચર

જો તમે સાયન્સના સ્ટુડન્ટ છો, અને મેથ્સમાં રસ ધરાવો છો પરંતુ B.Tech કરવા નથી માંગતા, તો તમે બેચલર ઓફ આર્કિટેક્ચર (B.Arch) કોર્સમાં એડમિશન લઈ શકો છો. આ કોર્સમાં, વિદ્યાર્થીઓને વિશ્વભરની આર્કિટેક્ચરલ ડિઝાઇન અને તેની સંબંધિત ટેકનીક શીખવવામાં આવે છે. જેમાં ગ્રાફિક્સ, 3D મોડલ અને ડેકોરેશનની ટેકનીકનો સમાવેશ થાય છે. જો તમે મેથ્સમાં નબળા છો પરંતુ ખૂબ જ ક્રિએટિવ છો તો તમે ઈન્ટિરિયર ડિરેક્ટર તરીકે કારકિર્દી બનાવી શકો છો.

ટ્રાવેલ, ટુરીઝમ અને હોટેલ મેનેજમેન્ટ

ટ્રાવેલ, ટુરીઝમ, હોટેલ મેનેજમેન્ટ અને હોસ્પિટાલિટીના ક્ષેત્ર આગળ વધી રહ્યા છે. કોરોનાના અંત પછી તેમાં સતત વૃદ્ધિ જોવા મળી રહી છે. હોટેલ અને ટ્રાવેલ ઉદ્યોગ સંબંધિત આધુનિક હોટેલ મેનેજમેન્ટ અને સર્વિસ મેનેજમેન્ટ સ્કિલ્સ શીખીને, તમે મેનેજર, ઓફિસ મેનેજર, હોટેલ, રિસોર્ટ અથવા રેસ્ટોરન્ટમાં પ્લાનર તરીકે કામ કરી શકો છો. જો તમે ઈચ્છો તો તમે તમારું પોતાનું કામ પણ શરૂ કરી શકો છો. આમાં કારકિર્દીની ઉત્તમ સંભાવનાઓ છે.

ઈન્ફ્લુએન્સર

આ સોશિયલ મીડિયાનો જમાનો છે. આજકાલ ઈન્ફ્લુએન્સર્સ વિવિધ બ્રાન્ડ્સ માટે જાહેરાતો, વીડિયો અને વિવિધ પ્રકારના કન્ટેન્ટ બનાવે છે, અને તેને શેર કરીને તેઓ બ્રાન્ડ પાસેથી પૈસા મેળવે છે. તે જ સમયે, કેટલીક સોશિયલ મીડિયા સાઈટ્સ અને સ્ટ્રીમિંગ પ્લેટફોર્મ્સ પણ વ્યુના આધારે પૈસા જમા કરે છે. જો તમે ઈચ્છો તો જર્નાલીઝમ કે સોશિયલ મીડિયા મેનેજમેન્ટના ક્ષેત્રમાં પણ કારકિર્દી બનાવી શકો છો. ઘણી કંપનીઓ તેમના બ્રાંડ પેજને મેનેજ કરવા માટે સોશિયલ મીડિયા મેનેજરને હાયર કરે છે.