સતત બીજા દિવસે શેરબજારમાં નરમાઇ, જાણો શું છે કારણ

ભારતીય શેરબજારમાં આજે ઓટો અને રિયલ્ટી શેરોમાં જોરદાર ઘટાડો જોવા મળ્યો હતો. એશિયન શેરબજારો આજે નરમ રહ્યા હતા, પરંતુ જાપાનના શેર ત્રણ સપ્તાહના સૌથી નીચા સ્તરે સરકી ગયા હતા. બજાર વિશ્લેષકોનું માનવું છે કે યુએસની આર્થિક ચિંતાઓને કારણે રોકાણકારોએ યુએસ વ્યાજદરમાં ઘટાડો કરવાની આશા ગુમાવી દીધી છે અને તેની અસર બજારમાં જોવા મળી રહી છે.

આજે એટલે કે 5 સપ્ટેમ્બરે નિફ્ટી-50 સતત બીજા દિવસે લાલ નિશાનમાં બંધ રહ્યો હતો. એનએસઇનો બેન્ચમાર્ક ઈન્ડેક્સ નિફ્ટી-50 પૈકી 50 શેર 53.60 પોઈન્ટ અથવા 0.21%ના ઘટાડા સાથે 25,145.10 ના સ્તર પર બંધ થયા છે. તો આજે S&P બીએસઇ સેન્સેક્સમાં પણ સતત ત્રીજા દિવસે ઘટાડો જોવા મળ્યો હતો. 30 શેરવાળો સેન્સેક્સ આજે 0.18% અથવા 151.48 પોઈન્ટના ઘટાડા સાથે 82,201.16 પર બંધ થયો હતો. ઇન્ટ્રાડે ટ્રેડ દરમિયાન, નિફ્ટી 50 વધીને 25,275.45ની સપાટીએ અને સેન્સેક્સ 82,617.49ની ઊંચી સપાટીએ પહોંચ્યો હતો.

સેન્સેક્સના 30 શેરોમાંથી આજે માત્ર 10 શેર જ લીલા રંગમાં બંધ થયા છે, જ્યારે નિફ્ટી-50ના 17 શેરો ઉછાળા સાથે બંધ થયા છે. સેક્ટરલ ઈન્ડેક્સ પર નજર કરીએ તો સૌથી વધુ ઘટાડો નિફ્ટી ઓટો, ઓઈલ એન્ડ ગેસ અને રિયલ્ટી સેક્ટરમાં જોવા મળ્યો હતો. આજે નિફ્ટી રિયલ્ટી 0.97%, નિફ્ટી ઑટો 0.38% અને ઑઇલ એન્ડ ગેસ પણ 0.38% ઘટીને બંધ થયા છે.

વ્યાપક રીતે કહીએ તો, સ્મોલ અને મિડ-કેપ્સ અનુક્રમે 1% અને 0.4% વધીને તેમના સર્વકાલીન ઉચ્ચ સ્તરે પહોંચ્યા હતા.

ટોપ ગેઇનર્સ

નિફ્ટી અને સેન્સેક્સ બંનેમાં ટાટા ગ્રૂપની કંપની ટાઇટનનું નામ આજે ટોપ ગેઇનર્સની યાદીમાં ટોચ પર હતું. ટાઇટનનો શેર આજે બીએસઇ પર 3.11%ના ઉછાળા સાથે રૂ. 3721.40 અને એનએસઇ પર 3.11%ના ઉછાળા સાથે રૂ. 3,720 પર બંધ રહ્યો હતો. આ સિવાય નિફ્ટી પર ટોપ ગેઇનર્સની યાદીમાં એલ.ટી માઇન્ડ ટ્રી, વિપ્રો, બીપીસીએલ આઇટીસી, હીરો મોટો કોર્પ, તાતા સ્ટીલ, ઇન્ફોસિસ, એચસીએલ ટેક, હિન્દાલ્કો અને ટીસીએસના શેરો વધારા સાથે બંધ થયા હતા.

ટોપ લૂઝર્સ

નિફ્ટી50ના 50 શેરોમાંથી 33 નુકસાન સાથે બંધ થયા હતા, જેમાં કોકા-કોલા ઈન્ડિયા, બ્રિટાનિયા ઈન્ડસ્ટ્રીઝ, સિપ્લા, ડૉ. રેડ્ડીઝ લેબ્સ અને રિલાયન્સ ઈન્ડસ્ટ્રીઝ 1.46 ટકા સુધીના નુકસાન સાથે બંધ થયા હતા. દરમિયાન, ઇન્ડેક્સ પરના અન્ય ઘટક શેરો ટાઇટન, એલટી માઇન્ડ ટ્રી, વિપ્રો, બીપીએલ, અને આઇટીસી હતા, જે 3.11 ટકા સુધી વધ્યા હતા.

તેવી જ રીતે, બીએસઇ પર, લિસ્ટેડ સેન્સેક્સના 30માંથી 20 શેરો લાલ નિશાનમાં બંધ થયા હતા, જેમાં રિલાયન્સ ઈન્ડસ્ટ્રીઝ, ટાટા મોટર્સ, નેસ્લે ઈન્ડિયા અને ભારતી એરટેલ 1.41 ટકા સુધી ઘટ્યા હતા.

કારણ શું છે

અમેરિકાના નબળા મેન્યુફેક્ચરિંગ ડેટા પછી વૈશ્વિક નાણાકીય બજારે યુએસ આર્થિક ડેટા પર વધુ પડતી પ્રતિક્રિયા આપી છે. ફેડ દ્વારા વ્યાજદરમાં ઘટાડા અંગે રોકાણકારોમાં શંકા વધી છે. વધુમાં, એઆઇ  પ્રસિદ્ધિ પરના સંશયને પણ જોખમની સંપત્તિને નુકસાન પહોંચાડ્યું છે. નિવિદા કોર્પ માં  ઓક્ટોબર 2022 પછીનો સૌથી ખરાબ બે દિવસનો ઘટાડો જોવા મળ્યો.

રોકાણકારોનું ધ્યાન હવે શુક્રવાર (7 સપ્ટેમ્બર) ના રોજ નિયત કરાયેલ યુએસ પેરોલ્સ ડેટા તરફ વળશે, જે ફેડના નિર્ણયની આગળના સૌથી મહત્વપૂર્ણ ડેટા પોઇન્ટ્સમાંનું એક છે. આ સિવાય યુએસ સેન્ટ્રલ બેંક ફેડરલ રિઝર્વના વ્યાજ દરો સંબંધિત ડેટા પણ 18 સપ્ટેમ્બરે જાહેર કરવામાં આવનાર છે.