Sensex today: ઉતાર-ચઢાવ વચ્ચે બજાર લીલા નિશાન પર બંધ થયું, સેન્સેક્સ 144 પોઈન્ટ વધ્યો; નિફ્ટી 24,855 પર બંધ
છેલ્લું અપડેટ : 30 Jul 2025
Sensex today: જુલાઈ શ્રેણીની સમાપ્તિના એક દિવસ પહેલા, સ્થાનિક શેરબજાર એક રેન્જમાં ટ્રેડ થઈ રહ્યું છે. બુધવારે નિફ્ટી અને બેંક નિફ્ટી ફ્લેટ બંધ થયા. મિડકેપ અને સ્મોલકેપ Index પણ ફ્લેટ બંધ થયા.
એશિયાઇ બજારોના મિશ્ર વલણથી ભારતીય શેરબજારોમાં આજે ભારે વોલેટાલિટી જોવા મળી હતી. 30 જુલાઇના રોજ સેન્સેક્સ નિફ્ટી ભારે ચડાવ ઉતારના અંતે સુધારા સાથે બંધ રહ્યા હતાં. એલ એન્ડ ટી અને ભારતી એરટેલના શેરમાં નવી ખરીદીથી બજારને તેજીમાં રહેવામાં મદદ મળી. જોકે, ટ્રમ્પ ટેરિફ ડેડલાઇન પહેલા રોકાણકારોમાં સાવચેતીનું વલણ જોવા મળ્યું હતું.
આજે 30 શેરોવાળો બીએસઈ સેન્સેક્સ 81,594.52 પોઈન્ટ પર મજબૂતીથી ખુલ્યો. ટ્રેડિંગ સેશન દરમિયાન ઈન્ડેક્સમાં વધઘટ જોવા મળી. જોકે, સેશનના બીજા ભાગમાં, તે મર્યાદિત રેન્જમાં ટ્રેડ થયો. અંતે, તે 143.91 પોઈન્ટ અથવા 0.18 ટકાના વધારા સાથે 81,481.86 પર બંધ થયો.
એ જ રીતે, નેશનલ સ્ટોક એક્સચેન્જ (એનએસઇ) નો નિફ્ટી-50 પણ આજે 24,890.40 પર મજબૂત રીતે ખુલ્યો. ટ્રેડિંગ દરમિયાન, તે 24,771.95 પોઈન્ટના નીચા સ્તરે અને 24,902 પોઈન્ટના ઉચ્ચ સ્તરે પહોંચ્યો. અંતે, તે 33.95 પોઈન્ટ અથવા 0.14 ટકાના વધારા સાથે 24,855 પર બંધ થયો હતો.
આ સમયગાળા દરમિયાન, BSE પર લિસ્ટેડ કંપનીઓનું માર્કેટ કેપ પાછલા સત્રમાં રૂ. 451.44 લાખ કરોડથી વધીને રૂ. 452 લાખ કરોડ થયું.
ટોપ ગેઇનર્સ અને લૂઝર્સ
સેન્સેક્સની કંપનીઓમાં લાર્સન એન્ડ ટુબ્રો, એનટીપીસી, મારુતિ સુઝુકી, ભારતી એરટેલ, ટ્રેન્ટ, એક્સિસ બેન્ક અને મહીન્દ્રા એન્ડ મહીન્દ્રા સૌથી વધારે વધનારા શેરો હતાં. બીજી તરફ, ટાટા મોટર્સ, બજાજ ફિનસર્વ, કોટક મહિન્દ્રા બેંક, પાવર ગ્રીડ અને એચયુએલ ઘટતા શેરોની યાદીમાં હતા.
બ્રોડર માર્કેટમાં નિફ્ટી મીડ કેપ ઇન્ડેક્સ અને નિફ્ટી સ્મોલ કેપ ઇન્ડેક્સ અનુક્રમે 0.07 ટકા અને 0.52 ટકા ઘટ્યા હતાં. ક્ષેત્રીય મોરચે, નિફ્ટી આઇટી 0.31 ટકા, નિફ્ટી ફાર્મા 0.01 ટકા અને નિફ્ટી એફએમસીજી 0.24 ટકા વધ્યા હતા. જ્યારે નિફ્ટી રિયલ્ટી 0.96 ટકા અને નિફ્ટી ઓટો 0.6 ટકા સૌથી વધુ ઘટ્યા હતા.
નિફ્ટી-50ના ટોપ ગેનર્સની વાત કરીએ તો આમાં સૌથી વધુ ફાયદો એલએન્ડટી ના શેરમાં થયો જેમાં 4.85 ટકાનો વધારો જોવા મળ્યો. ત્યારબાદ સન ફાર્માના શેરમાં 1.37 ટકા, એનટીપીસીના શેરમાં 1.26 ટકા, મારુતિ સુઝુકીના શેરમાં 1.2 ટકા અને ટાટા કન્ઝ્યુમરના શેરમાં 1.09 ટકાનો વધારો જોવા મળ્યો.
નિફ્ટી-50ના ટોપ લૂઝર્સની વાત કરવામાં આવે તો ટાટા મોટર્સના શેરમાં સૌથી વધુ ૩.૪૬ ટકાનો ઘટાડો થયો હતો. આ પછી, હીરો મોટોકોર્પ ૧.૭૧ ટકા, પાવર ગ્રીડ ૧.૪૨ ટકા, બજાજ ઓટો ૧.૦૪ ટકા અને એટરનલના શેરમાં ૧.૦૨ ટકાનો ઘટાડો થયો હતો.
વૈશ્વિક બજારોમાંથી શું સંકેતો છે?
અમેરિકાના વાણિજ્ય સચિવ હોવર્ડ લુટનિકે જણાવ્યું હતું કે રાષ્ટ્રપતિ ટ્રમ્પ દ્વારા ટેરિફ લાદવાની સમયમર્યાદામાં વધુ વિલંબ થશે નહીં. આના કારણે એશિયન બજારોમાં મિશ્ર શરૂઆત થઈ.
દરમિયાન, અમેરિકા અને ચીને ભારે ટેરિફ પરના કામચલાઉ પ્રતિબંધને લંબાવવા અંગે કોઈ સમજૂતી કર્યા વિના વેપાર વાટાઘાટોનો અંત લાવ્યો. જાપાનનો નિક્કી 225 ઇન્ડેક્સ 0.14 ટકા ઘટ્યો હતો જ્યારે હોંગકોંગનો હેંગ સેંગ ઇન્ડેક્સ 1 ટકા ઘટ્યો હતો. જોકે, દક્ષિણ કોરિયાનો કોસ્પી ઇન્ડેક્સ 0.3 ટકા વધ્યો હતો.
મંગળવારે વોલ સ્ટ્રીટના બેન્ચમાર્ક સૂચકાંકો નીચા સ્તરે બંધ થયા હતા કારણ કે રોકાણકારો ઊંચા કોર્પોરેટ મૂલ્યાંકન અંગે ચિંતિત હતા. S&P 500 0.3 ટકા ઘટીને બંધ થયો હતો, જ્યારે નાસ્ડેક 0.38 ટકા નીચે હતો.
ભારતીય માલ પર 25% સુધીનો ટેરિફ શક્ય છે
અમેરિકન રાષ્ટ્રપતિ ડોનાલ્ડ ટ્રમ્પે મંગળવારે (સ્થાનિક સમય) કહ્યું કે ભારતથી અમેરિકામાં થતી નિકાસ પર 25% સુધીનો ટેરિફ લાદી શકાય છે. જોકે, તેમણે એ પણ સ્પષ્ટતા કરી કે આ અંગે હજુ સુધી કોઈ અંતિમ નિર્ણય લેવામાં આવ્યો નથી. ટ્રમ્પનું આ નિવેદન એવા સમયે આવ્યું છે જ્યારે ભારત અને અમેરિકા વચ્ચે લાંબા સમયથી ચાલી રહેલા વેપાર વિવાદોને ઉકેલવાના પ્રયાસો ચાલી રહ્યા છે.
બ્લૂમબર્ગના અહેવાલ મુજબ, ટ્રમ્પ સ્કોટલેન્ડની પાંચ દિવસની મુલાકાતથી પરત ફરતી વખતે એરફોર્સ વન પર પત્રકારો સાથે વાત કરી રહ્યા હતા. જ્યારે તેમને પૂછવામાં આવ્યું કે શું ભારત પર 20% થી 25% સુધીનો ટેરિફ લાદી શકાય છે, ત્યારે તેમણે કહ્યું, "હા, મને એમ લાગે છે. ભારત મારો સારો મિત્ર છે. મારી વિનંતી પર તેમણે પાકિસ્તાન સાથે યુદ્ધનો અંત લાવ્યો. ભારત સાથેનો સોદો હજુ સુધી અંતિમ સ્વરૂપ પામ્યો નથી. ભારત એક સારો મિત્ર રહ્યો છે, પરંતુ તે વિશ્વના અન્ય કોઈપણ દેશ કરતાં વધુ ટેરિફ લાદે છે."
