બ્રિટનના 'કિંગ'થી પણ અમીર બન્યા ઋષિ સુનક, 1 વર્ષમાં સંપત્તિમાં થયો 1287 કરોડ રૂપિયાનો વધારો, આટલી છે નેટવર્થ

સન્ડે ટાઈમ્સે અમીરોની નવી યાદી બહાર પાડી છે. આ અમીરોની યાદીમાં બ્રિટિશ વડાપ્રધાન ઋષિ સુનક અને તેમની પત્ની અક્ષતા મૂર્તિની સંપત્તિમાં ગયા વર્ષે £122 મિલિયન (લગભગ રૂ. 1287 કરોડ)નો વધારો થયો છે. નવી યાદીમાં, તેમની અંદાજિત નેટવર્થ 2023માં £529 મિલિયનથી વધીને £651 મિલિયન (રૂ. 6867 કરોડ) થઈ છે.

સંપત્તિમાં આ વધારા સાથે, ઋષિ સુનક કિંગ ચાર્લ્સ ત્રીજા કરતા વધુ અમીર બની ગયા છે. બ્રિટનના સૌથી ધનિક લોકોની તાજેતરની યાદી અનુસાર, ચાર્લ્સ III ગયા વર્ષે સુનક પરિવાર કરતા વધુ સંપત્તિ ધરાવતા હતા.

2022માં બ્રિટનની ક્વીન કરતા પણ વધુ અમીર બની ગયા હતા

વર્ષ 2022માં ઋષિ સુનક અને તેમની પત્ની અક્ષતા મૂર્તિની સંપત્તિ દિવંગત ક્વીન કરતા વધુ થઈ ગઈ હતી. તે વર્ષે એલિઝાબેથ II ની સંપત્તિની વેલ્યુ £370 મિલિયન હતી. સુનક સન્ડે ટાઈમ્સના 35 વર્ષના ઈતિહાસમાં વાર્ષિક સંપત્તિની યાદીમાં સામેલ થનાર પ્રથમ ફ્રન્ટ-લાઈન રાજકારણી બન્યા છે.

ઋષિ સુનકની નેટવર્થ કેમ આટલી વધી?

ઋષિ સુનક અને તેમની પત્નીની સંપત્તિમાં વધારો Infosysમાં મૂર્તિના હિસ્સા સાથે જોડાયેલો છે. Infosys એ $70 બિલિયન (£55.3 બિલિયન) ની ભારતીય IT કંપની છે, જેના કો-ફાઉન્ડર અક્ષતા મૂર્તિના પિતા નારાયણ મૂર્તિ છે. અક્ષતા મૂર્તિનો પણ તેમાં હિસ્સો છે, ગયા વર્ષ દરમિયાન ઈન્ફોસિસમાં અક્ષતા મૂર્તિના શેરનું મૂલ્ય £108.8 મિલિયન વધીને લગભગ £590 મિલિયન થયું છે. જો કે, એક અહેવાલ મુજબ, દંપતીની સંપત્તિ 2022માં તેના સ્તરથી નીચે છે, ત્યારે તેમની સંપત્તિ અંદાજે £730 મિલિયન હતી.

બ્રિટનમાં અબજોપતિઓની સંપત્તિમાં મોટો ઘટાડો

સન્ડે ટાઈમ્સની વાર્ષિક યાદીએ જાહેર કર્યું છે કે 2023માં જોવા મળતી થીમને ચાલુ રાખીને બ્રિટિશ અબજોપતિઓની સંખ્યામાં સતત બીજા વર્ષે ઘટાડો થયો છે. યુકેમાં 2022માં 177 અબજોપતિ હતા, જે ગયા વર્ષે ઘટીને 171 થઈ ગયા અને આ વર્ષે ફરી ઘટીને 165 થઈ ગયા છે.