આધારકાર્ડ ધારકો માટે રાહત! હવે 14 જૂન 2027 સુધી મફતમાં અપડેટ કરી શકાશે દસ્તાવેજો, જાણો સંપૂર્ણ પ્રક્રિયા

આધારકાર્ડ (Aadhaar Card) ધારકો માટે મહત્ત્વના સમાચાર સામે આવ્યા છે. યુનિક આઇડેન્ટિફિકેશન ઓથોરિટી ઓફ ઇન્ડિયા (UIDAI) દ્વારા આધારકાર્ડમાં ઓળખ અને સરનામાના દસ્તાવેજો અપડેટ કરવાની મફત સુવિધા (Free Document Update)ની સમયમર્યાદા વધારીને 14 જૂન, 2027 કરવામાં આવી છે. એટલે કે હવે આધારકાર્ડ ધારકોને ઓનલાઇન માધ્યમથી પોતાના ઓળખના પુરાવા (Proof of Identity) અને સરનામાના પુરાવા (Proof of Address) અપડેટ કરવા માટે કોઈ ફી ચૂકવવી પડશે નહીં. આ સુવિધા ખાસ કરીને એવા લોકો માટે ઉપયોગી છે, જેમણે લાંબા સમયથી પોતાના આધારકાર્ડમાં જૂના દસ્તાવેજો અપડેટ કર્યા નથી. જોકે, આ મફત સુવિધા માત્ર ઓનલાઇન દસ્તાવેજ અપડેટ માટે જ લાગુ પડે છે. નામ, જન્મતારીખ, મોબાઇલ નંબર અથવા બાયોમેટ્રિક વિગતોમાં ફેરફાર માટે અલગ પ્રક્રિયા અને નિર્ધારિત ફી લાગુ પડી શકે છે.

ઘરે બેઠા આ રીતે કરો આધારકાર્ડ અપડેટ

આધારકાર્ડમાં દસ્તાવેજો અપડેટ કરવા માટે નીચેની પ્રક્રિયા અનુસરો:

1. સૌથી પહેલાં UIDAIની સત્તાવાર વેબસાઇટ પર જાઓ.

2. ત્યારબાદ myAadhaar પોર્ટલ ખોલીને Document Update વિકલ્પ પસંદ કરો.

3. તમારો 12 અંકનો આધાર નંબર દાખલ કરો.

4. રજિસ્ટર્ડ મોબાઇલ નંબર પર આવેલા OTP દ્વારા ઓળખની ચકાસણી કરો.

5. તમારી હાલની વિગતો તપાસીને ઓળખ અને સરનામાના દસ્તાવેજની કેટેગરી પસંદ કરો.

6. માન્ય ઓળખપત્ર અને સરનામાના પુરાવાની નકલ અપલોડ કરો.

7. તમામ વિગતો યોગ્ય છે તેની ખાતરી કરીને અરજી સબમિટ કરો.

8. અરજી સબમિટ થયા બાદ મળતો સર્વિસ રિક્વેસ્ટ નંબર (SRN) સાચવી રાખો.

UIDAI દ્વારા અપલોડ કરવામાં આવેલા દસ્તાવેજોની ચકાસણી કર્યા બાદ જ અરજી મંજૂર કરવામાં આવશે. માત્ર અરજી કરવાથી અપડેટની મંજૂરી મળી જાય તે જરૂરી નથી.

આધારકાર્ડમાં કઈ વિગતો અપડેટ કરી શકાય?

આધારકાર્ડમાં નામ, જન્મતારીખ, લિંગ, રહેણાકનું સરનામું, મોબાઇલ નંબર અને ઇમેઇલ જેવી વિગતોમાં ફેરફાર કરવાની સુવિધા UIDAIના નિયમો અનુસાર ઉપલબ્ધ છે. જોકે, તમામ ફેરફાર ઓનલાઇન થઈ શકતા નથી. ફિંગરપ્રિન્ટ, આંખની કીકીનું સ્કેન (Iris Scan) અને ફોટોગ્રાફ જેવી બાયોમેટ્રિક વિગતો અપડેટ કરાવવા માટે સામાન્ય રીતે અધિકૃત આધાર કેન્દ્રની મુલાકાત લેવી પડે છે.

આધાર અપડેટ માટે કેટલી ફી ચૂકવવી પડશે?

UIDAIના ફી માળખા અનુસાર, સામાન્ય રીતે અલગથી ડેમોગ્રાફિક વિગતો અપડેટ કરવા માટે ₹75 અને બાયોમેટ્રિક અપડેટ માટે ₹125 ફી ચૂકવવી પડી શકે છે. જોકે, ઓળખ અને સરનામાના દસ્તાવેજો ઓનલાઇન અપડેટ કરવાની પાત્ર સુવિધા 14 જૂન, 2027 સુધી મફત રહેશે.

બાળકો માટે પણ બાયોમેટ્રિક અપડેટ જરૂરી

બાળકોના આધારકાર્ડમાં પાંચ અને 15 વર્ષની ઉંમરે ફરજિયાત બાયોમેટ્રિક અપડેટ કરાવવાનું હોય છે. આ માટે અધિકૃત આધાર કેન્દ્રની મુલાકાત લેવી જરૂરી છે. નિયમો હેઠળ બાળકોના નિર્ધારિત ફરજિયાત બાયોમેટ્રિક અપડેટ માટે ફીમાંથી છૂટ આપવામાં આવે છે. આધારકાર્ડ ધારકોએ મફત સુવિધાનો લાભ લેવા માટે UIDAIની સત્તાવાર વેબસાઇટ પર ઉપલબ્ધ નવીનતમ નિયમો અને ફીનું માળખું તપાસવું જરૂરી છે.