સોનું ઓલ ટાઈમ હાઈ સપાટીએ પહોંચ્યુંઃ અમદાવાદના બુલિયન માર્કેટમાં ઇન્ટ્રાડે વધઘટમાં શુધ્ધ સોનાનો ભાવ 78000ની નજીક પહોંચ્યો

સ્થાનિક અને વૈશ્વિક બજારોમાં સોનું નવી રેકોર્ડ ઊંચાઈ પર છે. અમેરિકામાં ગત બુધવારે ચાર વર્ષ બાદ વ્યાજદરમાં થયેલા ઘટાડા અને ભવિષ્યમાં વધુ તીવ્ર કાપની શક્યતાઓ વચ્ચે સોનામાં સતત મજબૂતી જોવા મળી રહી છે.

અમદાવાદ બુલિયન હાજર બજારના ભાવ પર એક નજર કરીએ તો 999 ટચ સોનાનો પ્રતિ દસ ગ્રામ ભાવ રૂ. 77,500થી રૂ. 78,000 સુધી બોલાયો હતો. હોલ માર્ક સોનામાં પણ પ્રતિ દસ ગ્રામન ભા રૂ. 76,440 બોલાયો હતો. બીજી તરફ અમદાવાદના બુલિયન માર્કેટમાં ચાંદી પણ કિલો દીઠ રૂ. 88,500થી 90,500 સુધી બોલાઈ હતી. 

અમદાવાદ બુલિયન માર્કેટમાં 27-9-2024ના ભાવ

• ચાંદી ચોરસા - રૂ. 88500-90500
• રૂપું - રૂ.88300-90300
• સિક્કા  જૂના - રૂ. 900થી 1100
• 999 સોનું - રૂ. 77500-78000
• હોલમાર્ક સોનું - રૂ. 76440

આજે દિલ્હીના બુલિયન માર્કેટમાં 24 કેરેટ સોનાનો ભાવ રૂ. 77,600, મુંબઈમાં રૂ. 77,450નો ભાવ નોંધાયો હતો. તો ચેન્નાઈ, ભૂવનેશ્વરમાં અને કોલકાતામાં રૂ. 77,450 ભાવ નોંધાયો છે. બેંગલોરમાં રૂ. 77,500નો ભાવ નોંધાયો છે. પટનામાં 24 કેરેટ સોનાનો ભાવ રૂ. 77,500 છે.

સ્થાનિક વાયદા બજાર એમસીએક્સ પર સોનાનો બેન્ચમાર્ક ઓક્ટોબર કોન્ટ્રાક્ટ બુધવારે રૂ. 76,000 પ્રતિ 10 ગ્રામની ઓલ ટાઈમ હાઈ સપાટીએ પહોંચ્યો હતો. આ 25 જુલાઈના નીચા ભાવ કરતાં 13 ટકા વધુ છે, એટલે કે આશરે રૂ. 9,000 પ્રતિ 10 ગ્રામ. હાલમાં એમસીએક્સ પર સોનાની કિંમત 75,500 હજાર રૂપિયા પ્રતિ 10 ગ્રામની આસપાસ છે.

આ પહેલા કેન્દ્રીય બજેટ 2024માં આયાત ડ્યૂટીમાં કાપ મુકાયા બાદ સોનાના ભાવમાં પ્રતિ 10 ગ્રામ 7 હજાર રૂપિયા સુધીનો ઘટાડો જોવા મળ્યો હતો. બજેટ પછી, 25 જુલાઈના રોજ, એમસીએક્સના ભાવ ઘટીને રૂ. 67,400ના નીચા સ્તરે આવી ગયા હતા.  23 જુલાઈએ રજૂ થયેલા સામાન્ય બજેટમાં સોના પરની આયાત ડ્યૂટી 15 ટકાથી ઘટાડીને 6 ટકા કરવામાં આવી હતી.

ગુરુવાર એટલે કે 26મી સપ્ટેમ્બરે સોનાના હાજર ભાવમાં પણ આવી જ હિલચાલ નોંધાઈ હતી. ઈન્ડિયન બુલિયન એન્ડ જ્વેલર્સ એસોસિએશન (આઇબીજેએ) અનુસાર, ગઈકાલે શરૂઆતના કારોબારમાં સોનું 24 કેરેટ (999) રૂ. 75,406 પ્રતિ 10 ગ્રામની નવી ઊંચી સપાટીએ જોવા મળ્યું હતું. આઇબીજેએના કહેવા પ્રમાણે ઘરેલું હાજર બજારમાં 18 જુલાઈ 2024ના રોજ 24 કેરેટ (999) સોનાનો ભાવ શરૂઆતી કામકાજમાં પ્રતિ 10 ગ્રામ રૂ. 74,064ની ઉંચાઈએ પહોંચ્યા બાદ 26 જુલાઈએ શરૂઆતી કામકાજમાં રૂ. 68,089 પ્રતિ 10 ગ્રામના નીચલા સ્તરે જતો રહ્યો હતો. 

વૈશ્વિક બજારમાં સોનાના ભાવમાં જોવા મળેલો રેકોર્ડ વધારો સ્થાનિક ભાવને ટેકો આપી રહ્યો છે. વૈશ્વિક બજારમાં, બુધવારે એટલે કે 25 સપ્ટેમ્બર, 2024ના રોજ, સ્પોટ સોનું $ 2,670.43 પ્રતિ ઔંસના રેકોર્ડ સ્તરે પહોંચ્યું હતું. તેવી જ રીતે, બેન્ચમાર્ક યુએસ ડિસેમ્બર ગોલ્ડ ફ્યુચર્સ (ગોલ્ડ કોમેક્સ ઓગસ્ટ′24) પણ ગઈકાલે ટ્રેડિંગ દરમિયાન $2,693.70 પ્રતિ ઔંસની નવી વિક્રમી સપાટીએ જોવા મળ્યો હતો. આ વર્ષે અત્યાર સુધીમાં સોનાના ભાવમાં અંદાજે 30 ટકાનો વધારો જોવા મળ્યો છે.

નિષ્ણાતોના મતે અમેરિકામાં વ્યાજદરમાં વધુ ઘટાડાની શક્યતાને પગલે હાલમાં સોનામાં શાનદાર ઉછાળો જોવા મળી રહ્યો છે. યુએસ ડોલર અને યુએસ બોન્ડ યીલ્ડમાં નબળાઈ પણ અમુક અંશે કિંમતો માટે મદદરૂપ થઈ છે. છેલ્લા 3 મહિનામાં યુએસ ડોલર ઈન્ડેક્સ લગભગ 5 ટકા નબળો પડ્યો છે. 10-વર્ષના યુએસ બોન્ડ યીલ્ડમાં પણ સમાન સમયગાળામાં 50 બેસિસ પોઈન્ટ્સથી વધુનો ઘટાડો થયો છે.

બજારમાં હાલ એ વાતની સંભાવના પ્રબળ થઈ ગઈ છે કે, અમેરિકામાં કેન્દ્રીય બેન્ક નવેમ્બરમાં યોજાનારી બેઠકમાં એક વાર ફરી વ્યાજ દરમાં અડધા ટકાનો ઘટાડો કરી શકે છે. જો અમેરિકામાં વ્યાજદરમાં આટલો તીવ્ર ઘટાડો થાય તો સોનાને વધુ ટેકો મળે તે અનિવાર્ય છે. સોના પર કોઈ વ્યાજ/ઉપજ નથી, તેથી વ્યાજ દરોમાં ઘટાડો થવાથી રોકાણ તરીકે આ સંપત્તિ વર્ગની માંગ વધે છે.

નિષ્ણાતો માને છે કે જો યુએસ સહિત અન્ય મોટી સેન્ટ્રલ બેંકો વ્યાજદરમાં વધુ ઘટાડો કરવાનું ચાલુ રાખે તો પશ્ચિમી દેશોમાં રોકાણકારોનો વલણ ફરી સોના તરફ વધી શકે છે અને ભવિષ્યમાં સોનાના ભાવમાં વધુ સ્પષ્ટ અને ટકાઉ વધારો જોવા મળી શકે છે. આંકડા પણ પુષ્ટિ કરે છે કે છેલ્લા બે મહિનામાં સોનામાં પશ્ચિમી દેશોના છૂટક રોકાણકારોનો રસ વધવા લાગ્યો છે. જો આ નિષ્ણાતોનું માનવું હોય તો, સોનાના ભાવમાં ભાવિ વધારામાં પશ્ચિમી દેશોના રોકાણકારો મોટી ભૂમિકા ભજવી શકે છે.

આ સિવાય અન્ય ઘણા પરિબળો છે જે હાલમાં સોનાને ટેકો આપી રહ્યા છે. ફરીથી ગોલ્ડ ઇટીએફમાં રોકાણ વધારવું તે મહત્ત્વના પરિબળોમાંનું એક છે. વર્લ્ડ ગોલ્ડ કાઉન્સિલના રિપોર્ટ અનુસાર વૈશ્વિક સ્તરે ઓગસ્ટમાં સતત ચોથા મહિને ગોલ્ડ ઇટીએફમાં રોકાણમાં વધારો નોંધાયો હતો. વૈશ્વિક સ્તરે, ઓગસ્ટ 2024 દરમિયાન ગોલ્ડ ઇટીએફમાં રોકાણમાં $2.1 બિલિયન (28.5 ટન સોનાના મૂલ્યની સમકક્ષ) નો વધારો થયો છે. જુલાઈ 2024 દરમિયાન, વૈશ્વિક સ્તરે ગોલ્ડ ઇટીએફમાં રોકાણમાં $3.7 બિલિયન (48.5 ટન સોનાના મૂલ્યની સમકક્ષ) નો વધારો થયો હતો.

જૂન 2024 દરમિયાન પણ વૈશ્વિક સ્તરે ગોલ્ડ ઇટીએફમાં રોકાણમાં $1.4 બિલિયન (17.5 ટન સોનાના મૂલ્યની સમકક્ષ) નો વધારો થયો હતો. અગાઉ, મે મહિનામાં સતત 12 મહિનાના ઘટાડા પછી ગોલ્ડ ઇટીએફમાં ચોખ્ખું રોકાણ $0.5 બિલિયન (8.2 ટન સોનાના મૂલ્યની સમકક્ષ) વધ્યું હતું. 

વૈશ્વિક સ્તરે વધી રહેલા ભૌગોલિક-રાજકીય તણાવ વચ્ચે, સલામત રોકાણના વિકલ્પ તરીકે સોનાની માંગમાં પણ વધારો થયો છે.

જોકે, કિંમતોમાં વિક્રમી વૃદ્ધિ વચ્ચે સોનાની ભૌતિક માંગને અસર થઈ શકે છે. આંકડા એ પણ દર્શાવે છે કે છેલ્લા 4 મહિનામાં ચીનમાં ભૌતિક માંગને અસર થઈ છે. જોકે, આયાત ડ્યૂટીમાં ઘટાડા બાદ ભારતમાં ભૌતિક માંગ વધી છે. પરંતુ જો ભાવ વધુ વધે તો તેની ભૌતિક માંગને અસર થઈ શકે છે.