વઘી ગયું છે ક્રેડિટ કાર્ડનું દેવું? તો અપનાવો આ 7 ટ્રિક
છેલ્લું અપડેટ : 19 Dec 2025
ક્રેડિટ કાર્ડ એક સુવિધાની સાથે મોટો ખતરો પણ છે. ઘણા લોકો નાની જરૂરિયાતો માટે પણ આ કાર્ડનો ઉપયોગ કરે છે. જો કે, આ આદત ધીમે-ધીમે તમને મોટા દેવા તરફ દોરી જાય છે. EMI, મિનિમમ ડ્યૂ પેમેન્ટ અને હાઈ ઈન્ટરેસ્ટના ચક્કરમાં ફસાઈને લોકો નાણાકીય દબાણનો સામનો કરે છે. સાથે તેમનો ક્રેડિટ સ્કોર પણ બગડતો જાય છે. જો કે, યોગ્ય પદ્ધતિઓ અને એક્સપર્ટ ટ્રિક્સ સાથે, ક્રેડિટ કાર્ડ દેવાનું નહીં, પણ નાણાકીય મજબૂતાઈનું સ્ત્રોત બની શકે છે.
1. ક્રેડિટ લિમિટનો પૂર્ણ ઉપયોગ ના કરો: નિષ્ણાતો મુજબ ક્રેડિટ કાર્ડ લિમિટના 30%થી વધુનો ઉપયોગ ન કરવો જોઈએ. વધુ પડતા ઉપયોગથી ક્રેડિટ યૂટિલાઈઝેશન રેશિયો વધે છે, જે તમારા CIBIL સ્કોર પર નકારાત્મક અસર કરે છે.
2. હંમેશા તમારા બિલ સમયસર અને સંપૂર્ણ ચૂકવો: મિનિમમ અમાઉન્ટ ડ્યૂ પેમેન્ટ કરવું સરળ લાગે છે, પરંતુ આ એક મોટી ભૂલ છે. આનાથી વ્યાજ ઝડપથી વધે છે. દર મહિને તમારું બિલ પૂરું ચૂકવવાથી વ્યાજથી બચી શકાય છે અને તમારો સ્કોર મજબૂત રહે છે.
3. અનેક કાર્ડ રાખવાનું ટાળો: એકસાથે અનેક ક્રેડિટ કાર્ડ રાખવાથી ખર્ચ પર નિયંત્રણ રાખવું મુશ્કેલ બની શકે છે. જરૂરિયાતોને આધારે ફક્ત એક કે બે કાર્ડ રાખો અને તેનો જવાબદારીપૂર્વક ઉપયોગ કરો.
4. કેશ વિદડ્રોલ ટાળો: ક્રેડિટ કાર્ડ દ્વારા રોકડ ઉપાડવા પર ભારે વ્યાજ અને વધારાના ચાર્જ લાગે છે. ઈમરજન્સી સિવાય આવું ક્યારેય ન કરો.
5. EMI ઑફર્સનો સમજદારીપૂર્વક ઉપયોગ કરો: નો-કોસ્ટ EMI આકર્ષક લાગે છે, પરંતુ દરેક ખરીદીને EMIમાં બદલવી એ સારો વિચાર નથી. આનાથી ભવિષ્યની આવક પહેલા જ ખર્ચાઈ જાય છે અને દેવાનો બોજ વધી શકે છે.
6. તમારા ક્રેડિટ રિપોર્ટને નિયમિત ચેક કરો: વર્ષમાં ઓછામાં ઓછા એક વખત તો તમારા ક્રેડિટ રિપોર્ટને જરૂર ચેક કરો. આ સમયસર કોઈપણ ભૂલો અથવા છેતરપિંડી શોધવામાં મદદ કરે છે અને તમને તમારા સ્કોરને સુધારવાની તક આપે છે.
7. જૂના કાર્ડ બંધ ન કરો: લાંબા સમયથી ચાલતું ક્રેડિટ કાર્ડ તમારા ક્રેડિટ હિસ્ટ્રીને મજબૂત બનાવે છે. બિનજરૂરી રીતે જૂનું કાર્ડ બંધ કરવાથી તમારા સ્કોરમાં ઘટાડો થઈ શકે છે.
જો આ સાત એક્સપર્ટ ટ્રિક્સ યોગ્ય રીતે અપનાવવામાં આવે, તો ક્રેડિટ કાર્ડ દેવાનું સ્ત્રોત નહીં પણ નાણાકીય વૃદ્ધિ માટેનું સાધન બની શકે છે. યોગ્ય આયોજન, શિસ્ત અને સમયસર ચુકવણી સાથે, તમે દેવાથી બચી શકો છો. સાથે તમારા ક્રેડિટ સ્કોરને 800ને પાર પણ પહોંચાડી શકો છો.
