Video: સોનાના ભાવમાં ઘટાડા પાછળ ચાર મુખ્ય કારણ

દિવાળી પહેલાં સોનાના ભાવમાં ઘટાડો નોંધાતાં ખરીદદારોનું ધ્યાન સોનાના બજાર તરફ ખેંચાયું છે. આંતરરાષ્ટ્રીય બજારમાં એક સપ્તાહ દરમિયાન સોનાની કિંમત આશરે ચાર ટકા ઘટીને ચાર મહિનાથી વધુ સમયના નીચલા સ્તરે પહોંચી હતી. ભારતીય બજારમાં પણ તેની અસર જોવા મળી હતી. એમસીએક્સ પર સોનાના વાયદાનો ભાવ પ્રતિ 10 ગ્રામ 1 લાખ 41 હજાર 334 રૂપિયાના નીચલા સ્તરે પહોંચ્યો હતો, જ્યારે સપ્તાહના અંતે આશરે 1 લાખ 42 હજાર 24 રૂપિયા રહ્યો હતો. સોનાના ભાવમાં ઘટાડા પાછળ ક્રૂડ ઓઇલના વધતા ભાવ, મોંઘવારીની ચિંતા, અમેરિકન ડોલરની મજબૂતી અને ઊંચા વ્યાજદરની આશંકા જેવા પરિબળો જવાબદાર હોવાનું માનવામાં આવે છે. શેરબજારમાં વેચવાલીથી પણ કિંમતી ધાતુઓ પર દબાણ વધ્યું છે. જોકે, દિવાળી અને લગ્નસરાની ખરીદી પહેલાં ભાવમાં વધુ ઘટાડો થશે કે નહીં તે નિશ્ચિત નથી.