પગારદારો માટે ખુશખબર! હવે કર્મચારીઓની ઇન-હેન્ડ સેલરીમાં થઈ શકે છે વધારો; જાણો PFના નવા નિયમો

જો તમે પણ પ્રાઇવેટ સેક્ટરના કર્મચારી છો અને તમારું PF એકાઉન્ટ છે, તો તમારી ઇન-હેન્ડ સેલરી (હાથમાં આવતો પગાર) વધી શકે છે, કારણ કે તાજેતરમાં સરકાર તરફથી એક ખાસ નિયમમાં ફેરફારની જાહેરાત કરવામાં આવી છે. આ નિયમ હેઠળ તમારું PF કોન્ટ્રિબ્યુશન (ફાળો) ઓછો થઈ જશે, અને ઇન-હેન્ડ સેલરી વધી જશે. કેન્દ્ર સરકારે તાજેતરમાં કેટલાક નિયમો બદલ્યા છે, જેમાં એક નિયમ PF કોન્ટ્રિબ્યુશનને સ્વૈચ્છિક કરવાનો પણ સામેલ છે. આ નિયમ હેઠળ PF કોન્ટ્રિબ્યુશન પર કેપ (મર્યાદા) લગાવી દેવામાં આવી છે. હવે દર મહિને PFમાં માત્ર મહત્તમ 1,800 રૂપિયાનું કોન્ટ્રિબ્યુશન જ અનિવાર્ય કરવામાં આવ્યું છે. એનો અર્થ એ છે કે, જેમનું PF વધુ કપાઈ રહ્યું છે, તેઓ ઈચ્છે તો તેને ઓછું કરાવીને 1,800 રૂપિયા સુધી મર્યાદિત કરી શકે છે. પરંતુ આ એમ્પ્લોયર અને કર્મચારી બંનેની મરજી પર નિર્ભર કરે છે. કર્મચારી ઈચ્છે, તો જ આને વધારી શકે છે, અથવા ઓછું કરાવી શકે છે. 

જો કે, જેમની સેલરી 15,000 રૂપિયા સુધી છે, તેમણે 1,800 રૂપિયાનું PF કપાવવું જ પડશે. અત્યાર સુધી, ઘણી કંપનીઓ કર્મચારીઓની વાસ્તવિક બેઝિક સેલરી પર સ્વેચ્છાએ PFની ગણતરી કરતી હતી, ભલે તે 15,000 રૂપિયાથી ઘણી વધારે હોય. તેના કારણે ઘણીવાર માસિક PF કપાત 5,000 રૂપિયા, 10,000 રૂપિયા કે, તેથી વધુ પણ થઈ જતી હતી. નવા નિયમો હેઠળ, આ પ્રકારનું ઊંચું અંશદાન હવે અનિવાર્ય રહેશે નહીં. હવે કર્મચારીઓ પોતાની મરજીથી PFમાં યોગદાન આપી શકે છે, જેનાથી તેમની ઇન-હેન્ડ સેલરી વધી શકે છે.

કેટલી વધી શકે છે સેલરી?

માની લો કે, 60,000 રૂપિયાની બેઝિક સેલરી ધરાવતો કર્મચારી દર મહિને 7,200 રૂપિયાનું યોગદાન આપે છે. આવા કિસ્સામાં જો બંને પક્ષો ન્યૂનતમ રકમનું પાલન કરવાનો નિર્ણય લે છે, અને અનિવાર્ય યોગદાનને 1,800 રૂપિયા સુધી મર્યાદિત કરે છે, તો ઇન-હેન્ડ સેલરી 5,600 રૂપિયા વધી જશે. પરંતુ જો તમે તમારા રિટાયરમેન્ટ પ્લાન માટે PF અમાઉન્ટ વધારવા માંગો છો, તો તમે તમારી PF અમાઉન્ટની કપાત ચાલુ રાખી શકો છો, અને ઈચ્છો તો, તેને વધુ વધારી પણ શકો છો. આ સંપૂર્ણપણે તમારી મરજી પર નિર્ભર રહેશે. આ ફેરફારથી તમારી ઇન-હેન્ડ સેલરી ઓછી થઈ જશે.