ગૌતમ અદાણી બન્યા સૌથી અમીર ભારતીય, મુકેશ અંબાણીને પાછળ છોડ્યા: હુરૂન

અદાણી ગ્રૂપના ચેરમેન ગૌતમ અદાણી અને તેમનો પરિવાર હુરૂનની 2024 ઈન્ડિયા રિચ લિસ્ટમાં ટોચ પર છે, તેમની સંપત્તિ 95 ટકાના વધારા સાથે રૂ. 11.61 લાખ કરોડ થઈ છે. હુરૂનની ભારતના સૌથી અમીર લોકોની યાદી અનુસાર, દેશભરમાં અબજોપતિઓની સંખ્યામાં અનેકગણો વધારો થયો છે. હવે 334 ભારતીય અબજોપતિ છે, જે 13 વર્ષ પહેલા જ્યારે આ યાદી બહાર પાડવામાં આવી હતી ત્યારે તેની સંખ્યા કરતાં છ ગણી વધારે છે. અમીર લોકોની આ યાદીમાં રિલાયન્સ ઈન્ડસ્ટ્રીઝના ચેરમેન મુકેશ અંબાણી અને તેમના પરિવારને બીજું સ્થાન મળ્યું છે અને તેમની કુલ સંપત્તિ 10.14 લાખ કરોડ રૂપિયા હોવાનો અંદાજ છે.

1539 ભારતીયોની સંપત્તિ 1000 કરોડ રૂપિયાથી વધુ

આ વર્ષે હુરૂન ઈન્ડિયાની યાદીમાં 1,539 વ્યક્તિઓ છે, જેમની કુલ સંપત્તિ રૂ. 1,000 કરોડથી વધુ છે. આ સંખ્યા ગત વખત કરતા 220 વધુ છે અને આ લિસ્ટમાં 272 લોકો એવા છે જેમના નામ પહેલીવાર યાદીમાં નોંધાયા છે. રૂ. 1,000 કરોડથી વધુની સંપત્તિના માલિકોની સંખ્યા પહેલી વખત 1,500ના આંકને વટાવી ગઈ છે અને છેલ્લા પાંચ વર્ષમાં તેમાં 86 ટકાનો વધારો થયો છે. હુરૂન ઈન્ડિયાના જણાવ્યા અનુસાર, ગયા વર્ષે ભારતમાં દર પાંચ દિવસે એક નવો અબજોપતિ બન્યો છે. 

શાહરૂખ ખાનને પણ મળ્યું અમીરોમાં સ્થાન

ભારતીય ફિલ્મ ઉદ્યોગના 'બાદશાહ' તરીકે ઓળખાતા શાહરૂખ ખાને પહેલી વખત હુરૂન ભારતના અમીરોની યાદીમાં સ્થાન મેળવ્યું છે અને તેની કુલ સંપત્તિ 7,300 કરોડ રૂપિયા આંકવામાં આવી છે. ફિલ્મ ઈન્ડસ્ટ્રીમાંથી શાહરૂખ ખાન ઉપરાંત, આ વખતે જુહી ચાવલા અને તેનો પરિવાર, હ્રિતિક રોશન, કરણ જોહર અને અમિતાભ બચ્ચન પણ હુરૂન ઈન્ડિયાની સમૃદ્ધ યાદીમાં સ્થાન મેળવવામાં સફળ થયા છે. આ વર્ષની યાદીમાં એવા 18 લોકો છે જેમની કુલ સંપત્તિ 1 લાખ કરોડ રૂપિયાથી વધુ છે. ગયા વર્ષે આ સંખ્યા માત્ર 12 હતી અને એક દાયકા પહેલા આ યાદીમાં માત્ર બે જ લોકો હતા, જેમની સંપત્તિ 1 લાખ કરોડ રૂપિયાથી વધુ હતી. 

ભારતીય અમીરોની કુલ સંપત્તિ ભારતના જીડીપીના અડધાથી વધુ

હુરૂન ભારતના અમીરોની યાદીની કુલ સંપત્તિ વધીને રૂ. 159 લાખ કરોડ થઈ છે, જે સાઉદી અરેબિયા અને સ્વિટ્ઝર્લેન્ડના સંયુક્ત જીડીપી કરતાં વધુ છે અને ભારતના જીડીપીના અડધાથી વધુ છે. હુરૂન ઈન્ડિયાની યાદીમાં સામેલ લોકો કુલ 29 ઉદ્યોગો અને 42 શહેરોના છે. તેમાંથી 1,334 લોકોએ તેમની સંપત્તિમાં વધારો કર્યો છે, 272 નવા ચહેરા છે, 205માં ઘટાડો થયો છે, 45 યાદીમાંથી ગાયબ થઈ ગયા છે અને પાંચનું અવસાન થયું છે. 

મુંબઈમાં રહે છે મોટા ભાગના અમીરો

આ યાદીમાં સૌથી વધુ 386 અમીરો મુંબઈના છે. દિલ્હી 217 નામો સાથે બીજા સ્થાને છે અને હૈદરાબાદ 104 ઉમરાવો સાથે ત્રીજા સ્થાને છે. આ વર્ષે મુંબઈથી લિસ્ટમાં 66 નવા નામ ઉમેરાયા છે. HCLના શેરના ભાવમાં 50 ટકાના વધારાને કારણે 79 વર્ષીય શિવ નાદર 3.1 લાખ કરોડની સંપત્તિ સાથે યાદીમાં ત્રીજા સ્થાને છે. 45 વર્ષીય આનંદ ચંદ્રશેખરન, રૂ. 1,200 કરોડની નેટવર્થ સાથે, 2024 હુરુન ઈન્ડિયા રિચ લિસ્ટમાં સ્થાન મેળવનાર પહેલા એન્જલ રોકાણકાર છે. યાદીમાં સૌથી યુવા અબજોપતિઓ હર્ષિલ માથુર અને શશાંક કુમાર (બંને 33 વર્ષની વયના) છે, જેઓ પેમેન્ટ સોલ્યુશન્સ એપ્લિકેશન, RAZORPAYના સ્થાપક છે.

સોશિયલ મીડિયા પર સૌથી વધુ ફોલો થાય છે શાહરૂખ ખાન

હુરુન ઈન્ડિયા રિચ લિસ્ટમાં સામેલ અમીરોની સરેરાશ ઉંમર 64 વર્ષ છે, જે ગયા વર્ષ કરતા એક વર્ષ વધુ છે. યાદીમાં સામેલ મહિલાઓની સરેરાશ ઉંમર 65 વર્ષ છે. હુરુન ઈન્ડિયા રિચ લિસ્ટમાં સામેલ લોકોમાં સોશિયલ મીડિયા પર સૌથી વધુ ફોલો કરવામાં આવતા ફિલ્મ સ્ટાર શાહરૂખ ખાન છે, જેને X (અગાઉ ટ્વિટર) પર 4.41 કરોડ લોકો ફોલો કરે છે. આ પછી બીજા સ્થાને હ્રિતિક રોશન છે, જેના ફોલોઅર્સની સંખ્યા 3.23 કરોડ છે.