'હોર્મુઝ સંકટ' ની સીધી અસર સામાન્ય જનતા પર: દિલ્હીમાં 3 દિવસમાં બીજી વખત CNG ના ભાવ વધ્યાં

CNG Price Hike: દિલ્હી-NCR માં રહેતા વાહનચાલકોને મોંઘવારીનો વધુ એક મોટો ઝટકો લાગ્યો છે. ગેસ કંપનીઓ દ્વારા સીએનજી (CNG) ના ભાવમાં પ્રતિ કિલોએ વધુ ₹1 નો વધારો કરવામાં આવ્યો છે. નોંધનીય છે કે આ અગાઉ કંપનીઓએ ₹2 નો વધારો કર્યો હતો, જેનો અર્થ એ થાય કે છેલ્લા ત્રણ દિવસમાં જ સીએનજી ₹3 જેટલો મોંઘો થઈ ચૂક્યો છે. આ નવા વધારા બાદ હવે દિલ્હીમાં એક કિલો સીએનજી ની કિંમત વધીને ₹80.09 થઈ ગઈ છે.

વિવિધ શહેરોના નવા સુધારેલા દરો

નવા ભાવ વધારા બાદ નોઈડા, ગાઝિયાબાદ અને ગૌતમ બુદ્ધ નગરમાં સીએનજી નો નવો ભાવ પ્રતિ કિલો ₹88.70 થઈ ગયો છે. હરિયાણાના ગુરુગ્રામમાં આ દર ₹85.12 અને કરનાલમાં ₹84.43 થયો છે. જ્યારે દેશના અન્ય રાજ્યોની વાત કરીએ તો, ઉત્તર પ્રદેશના કાનપુર અને હમીરપુરમાં સીએનજી સૌથી મોંઘો એટલે કે ₹91.42 પ્રતિ કિલો પર પહોંચી ગયો છે. રાજસ્થાનના અજમેર અને પાલીમાં નવો ભાવ ₹89.44 છે, જ્યારે દેશની આર્થિક રાજધાની મુંબઈમાં હાલ સીએનજી નો ભાવ ₹84 પ્રતિ કિલોગ્રામ છે.

શા માટે વધી રહ્યા છે સીએનજી ના ભાવ?

ભારત પોતાની જરૂરિયાતના 50 ટકા કરતા પણ વધુ કુદરતી ગેસ (નેચરલ ગેસ) આંતરરાષ્ટ્રીય બજારમાંથી આયાત કરે છે. હાલમાં ચાલી રહેલા 'હોર્મુઝ સંકટ' ના કારણે ગેસના પુરવઠામાં મોટી અછત સર્જાઈ છે અને તેની સામે વૈશ્વિક માંગ વધી છે. આ પરિસ્થિતિને કારણે ઇન્દ્રપ્રસ્થ ગેસ લિમિટેડ (IGL) અને મહાનગર ગેસ લિમિટેડ (MGL) જેવી સપ્લાયર કંપનીઓ માટે આંતરરાષ્ટ્રીય સ્તરેથી ગેસ ખરીદવો ઘણો મોંઘો બન્યો છે. કંપનીઓનું કહેવું છે કે મોટું નુકસાન અટકાવવા માટે આ વધેલી કિંમતનો બોજ ગ્રાહકો પર નાખવો જ એકમાત્ર વિકલ્પ હતો.

પીએનજી અને એલપીજી ધારકોને રાહત

જો કે, આ બધા વચ્ચે સામાન્ય જનતા માટે રાહતની વાત એ છે કે ઘરોમાં પાઇપલાઇન દ્વારા સપ્લાય થતા રાંધણ ગેસ (PNG) અને ઘરેલું એલપીજી (LPG) સિલિન્ડરની કિંમતોમાં હાલ કોઈ ફેરફાર કરવામાં આવ્યો નથી, જેના કારણે રસોડાનું બજેટ હાલ પૂરતું ખોરવાતા બચી ગયું છે.