E20 પેટ્રોલની અસર! EV અને CNG કારની માંગમાં 30%થી વધુ ઉછાળો, લોકપ્રિય મોડેલો પર 6 મહિના સુધી વેટિંગ
છેલ્લું અપડેટ : 01 Sept 2026
ઇથેનોલ બ્લેન્ડેડ E20 પેટ્રોલના ઉપયોગથી વાહનોના માઇલેજમાં ઘટાડો થવાની અને મેન્ટેનન્સ ખર્ચ વધવાની ફરિયાદો સતત સામે આવી રહી છે. આ સ્થિતિએ વાહન ખરીદનારા ગ્રાહકોની પસંદગી પર મોટો પ્રભાવ પાડ્યો છે. પેટ્રોલ વાહનોને બદલે હવે લોકો સીધા ઇલેક્ટ્રિક વાહનો (EV) અને CNG મોડેલ્સ તરફ ઝડપથી વળી રહ્યા છે. આ અચાનક વધેલી માંગને કારણે માર્કેટમાં સપ્લાય પર ભારે દબાણ ઊભું થયું છે અને ઘણા લોકપ્રિય મોડેલોનો વેટિંગ પીરિયડ ખૂબ વધી ગયો છે.
લોકપ્રિય EV અને CNG મોડેલો પર લાંબુ વેટિંગ
હાલમાં ઓટોમોબાઇલ ક્ષેત્રે સૌથી વધુ ચર્ચા Mahindra XEV 9Sની છે, જેના માટે ગ્રાહકોએ આશરે 6 મહિના સુધી રાહ જોવી પડી રહી છે. Tata Punch EV અને Tata Tiago EVના કેટલાક વેરિઅન્ટ્સ પર વેટિંગ પીરિયડ 18થી 24 અઠવાડિયા સુધી પહોંચી ગયો છે. ટુ-વ્હીલર ઇલેક્ટ્રિક સ્ટીગ્મેન્ટમાં TVS iQubeના વિવિધ વેરિઅન્ટ્સ માટે 4થી 5 મહિનાનું વેટિંગ ચાલી રહ્યું છે. બીજી તરફ Maruti Brezzaની બુકિંગમાં પણ ટર્બો-પેટ્રોલ અને CNG વેરિઅન્ટ્સનો હિસ્સો 70% જેટલો નોંધાયો છે, જે દર્શાવે છે કે ગ્રાહકો હવે માત્ર સામાન્ય પેટ્રોલ પર નિર્ભર નથી રહેવા માંગતા.
ઇન્ક્વાયરી અને બુકિંગમાં 30% થી વધુનો વધારો
રિપોર્ટ અનુસાર, E20 ફ્યુઅલ અંગે વધી રહેલી નકારાત્મક ચર્ચાઓ અને નવા મોડેલોના લોન્ચિંગને કારણે EV અને CNG વાહનો માટેની ઇન્ક્વાયરી તેમજ બુકિંગમાં 30% થી વધુનો ઉછાળો આવ્યો છે. આ દર પરંપરાગત પેટ્રોલ-ડીઝલ (ICE) વાહનોની સરખામણીએ બમણાથી પણ વધુ છે. આશરે 5 મહિના પહેલાં જ્યાં મહત્તમ વેટિંગ પીરિયડ 1 મહિના આસપાસ હતો, તે વધીને હવે 3થી 4 મહિના થઈ ગયો છે.
સસ્તા વેરિઅન્ટ્સની ભારે માંગ અને તહેવારોની સિઝન
EV માર્કેટમાં સસ્તા અને પોસાય તેવા વેરિઅન્ટ્સની માંગ સૌથી વધુ જોવા મળી રહી છે. Tata Punch EV Smart 30 અને Tata Sierra EVના Pure 65 જેવા મોડેલ્સ પર 12થી 24 અઠવાડિયા સુધીનું વેટિંગ ચાલી રહ્યું છે, જ્યારે મોંઘા વેરિઅન્ટ્સ 4થી 6 અઠવાડિયામાં ઉપલબ્ધ થઈ રહ્યા છે. ઓણમ, ગણેશ ચતુર્થી, નવરાત્રી અને દિવાળી જેવા મોટો તહેવારોની સિઝન નજીક આવી રહી છે ત્યારે આ વાહનોની ડિમાન્ડ અને વેટિંગ પીરિયડ હજુ વધવાની શક્યતા છે.
