CREDIT CARD યુઝર્સ પર રહેશે ઇન્કમ ટેક્સની બાજનજર! ફરજિયાત આપવી પડશે આ માહિતી
છેલ્લું અપડેટ : 20 Mar 2026
નવો ઇન્કમ ટેક્સ એક્ટ, 2025, જે 1 એપ્રિલ, 2026 થી અમલમાં આવવા જઈ રહ્યો છે, તે લાખો લોકોના ક્રેડિટ કાર્ડ વપરાશની પદ્ધતિને બદલી નાખશે. આ નવા કાયદા હેઠળ મોટા વ્યવહારોની કડક તપાસથી લઈને પ્લાસ્ટિક મની (ક્રેડિટ કાર્ડ) દ્વારા ટેક્સ ચૂકવવાની શક્યતાઓ સુધીના ફેરફારો જોવા મળશે.
આ માળખું એવી મુખ્ય જોગવાઈઓ રજૂ કરે છે જે સીધી રીતે ક્રેડિટ કાર્ડ ધારકોને અસર કરે છે, જેનો ઉદ્દેશ્ય પારદર્શિતા વધારવાનો અને કરચોરી અટકાવવાનો છે.
મોટા વ્યવહારોનું કડક મોનિટરિંગ
સૌથી મહત્ત્વના ફેરફારોમાંનો એક મોટા ખર્ચનું કડક ટ્રેકિંગ છે. જો કોઈ વ્યક્તિ એક નાણાકીય વર્ષમાં ક્રેડિટ કાર્ડ દ્વારા રૂ. 10 લાખ અથવા તેથી વધુના ડિજિટલ પેમેન્ટ કરે છે, તો બેંકો અથવા કાર્ડ ઈશ્યુ કરનારાઓએ આ વિગતો ઇન્કમ ટેક્સ વિભાગને આપવી પડી શકે છે.
આ ઉપરાંત,રૂ. 1 લાખ કે તેથી વધુના રોકડ પેમેન્ટ પણ રિપોર્ટિંગના દાયરામાં આવી શકે છે. જોકે હાઈ-વેલ્યુ ટ્રાન્ઝેક્શનનું રિપોર્ટિંગ અગાઉ પણ અસ્તિત્વમાં હતું, પરંતુ નવા નિયમો આ દેખરેખને વધુ સચોટ બનાવશે અને મોટા ખર્ચાઓને કડક તપાસ હેઠળ લાવશે.
PAN કાર્ડ માટે એડ્રેસ પ્રૂફ તરીકે ક્રેડિટ કાર્ડ સ્ટેટમેન્ટ
દસ્તાવેજીકરણની પ્રક્રિયાને સરળ બનાવવા માટે, હવે કાયમી એકાઉન્ટ નંબર (PAN) મેળવવા માટે તાજેતરના ક્રેડિટ કાર્ડ સ્ટેટમેન્ટનો ઉપયોગ માન્ય સરનામાના પુરાવા તરીકે કરી શકાશે.
છેલ્લા ત્રણ મહિનાના સ્ટેટમેન્ટ સ્વીકારવામાં આવી શકે છે, જો તેમાં અરજદારનું સાચું અને અપડેટ થયેલું સરનામું સ્પષ્ટપણે દેખાતું હોય. આ ફેરફાર એવા વ્યક્તિઓને મદદરૂપ થશે જેમની પાસે યુટિલિટી બિલ (લાઇટ બિલ વગેરે) જેવા પરંપરાગત સરનામાના પુરાવા નથી.
ક્રેડિટ કાર્ડ દ્વારા ઇન્કમ ટેક્સની ચુકવણી
નવા નિયમો કરદાતાઓને ક્રેડિટ કાર્ડનો ઉપયોગ કરીને ઇન્કમ ટેક્સની બાકી રકમ ચૂકવવાની મંજૂરી પણ આપે છે.
અત્યાર સુધી, ટેક્સની ચૂકવણી મોટે ભાગે નેટ બેન્કિંગ અને ડેબિટ કાર્ડ પૂરતી મર્યાદિત હતી. જોકે આ ફેરફાર સુવિધા વધારે છે, પરંતુ કરદાતાઓએ વધારાના ખર્ચ વિશે સાવધ રહેવું જોઈએ, કારણ કે બેંકો પ્રોસેસિંગ ફી અથવા વ્યાજ વસૂલ કરી શકે છે, જેનાથી કુલ ખર્ચ વધી શકે છે.
કંપનીના ક્રેડિટ કાર્ડના વ્યક્તિગત વપરાશ પર ટેક્સ
નવા નિયમો એમ્પ્લોયર દ્વારા આપવામાં આવેલા ક્રેડિટ કાર્ડના ટેક્સ ટ્રીટમેન્ટને પણ સ્પષ્ટ કરે છે.
જો કંપની દ્વારા ઇશ્યૂ કરાયેલ કાર્ડનો ઉપયોગ વ્યક્તિગત ખર્ચ માટે કરવામાં આવે છે, તો તે રકમને "પરક્વિઝિટ" ગણવામાં આવશે અને તે મુજબ તેના પર ટેક્સ લાગશે. જોકે, વ્યવસાયિક મુસાફરી, ક્લાયન્ટ મીટિંગ્સ અથવા કામ સંબંધિત મનોરંજન જેવા સંપૂર્ણપણે સત્તાવાર હેતુઓ માટે કરવામાં આવેલા ખર્ચ ટેક્સ-ફ્રી રહેશે.
એમ્પ્લોયરોએ સત્તાવાર ખર્ચને સાબિત કરવા માટે વિગતવાર રેકોર્ડ જાળવવો પડશે. ટેક્સપાત્ર મૂલ્યની ગણતરી કરતી વખતે કર્મચારી દ્વારા પરત કરવામાં આવેલી કોઈપણ રકમને તેમાંથી બાદ કરવામાં આવશે.