Gold-Silver Price Crash: સોના-ચાંદીના ભાવમાં મોટો ભૂકંપ! ચાંદીમાં 12,000 અને સોનામાં 4500 રૂપિયાની ભારે ઉથલપાથલ
છેલ્લું અપડેટ : 18 Mar 2026
Gold-Silver Price Crash: મધ્ય પૂર્વમાં યુદ્ધ શરૂ થયા બાદ સોના-ચાંદીની કિંમતોમાં સતત ઘટાડો થઈ રહ્યો છે. યુદ્ધ બાદ વિશ્વભરની ચિંતાઓ વધવા છતાં કિંમતી ધાતુઓના ભાવ એક-બે દિવસ છોડીને સતત તૂટી રહ્યા છે. સપ્તાહના ત્રીજા ટ્રેડિંગ સત્ર બુધવારે પણ મલ્ટી કોમોડિટી એક્સચેન્જ (MCX) પર સોના-ચાંદીના બાવમાં ઘટાડો થયો છે.
ચાંદીના ભાવમાં રૂ.12000ની ઉથલ-પાથલ
MCX પર એક કિલો ચાંદીના ભાવની વાત કરીએ તો, ગઈકાલે ચાંદીનો ભાવ રૂ.2,53,113 પર બંધ થયા બાદ આજે રૂ.2,51,498 પર ખુલ્યો હતો. તેનો ભાવ દિવસ દરમિયાન નીચેમાં રૂ.2,42,803 પર પહોંચ્યો હતો અને ઊંચામાં રૂ.2,54,897 પર સ્પર્શ્યો હતો. એટલે કે આજે દિવસ દરમિયાન ચાંદીની કિંમતમાં રૂ.12,094ની ઉથલ-પાથલ જોવા મળી છે. આજે રાત્રે 9.30 વાગ્યા સુધીમાં ચાંદીનો ભાવ રૂ.2,45,835 પર ટ્રેડ થઈ રહ્યો છે.
સોનાની કિંમતમાં રૂ.4500ની ઉથલ-પાથલ
MCX પર સોનાના ભાવની વાત કરીએ તો, ગઈકાલે સોની કિંમત રૂ.1,55,658 પર બંધ થયા બાદ આજે રૂ.1,55,985 પર ખુલી હતી. તેનો ભાવ દિવસ દરમિયાન નીચેમાં રૂ.1,51,550 પર પહોંચ્યો હતો અને ઊંચામાં રૂ.1,56,075 પર સ્પર્શ્યો હતો. એટલે કે આજે દિવસ દરમિયાન સોનાની કિંમતમાં રૂ.4525ની ઉથલ-પાથલ જોવા મળી છે. આજે રાત્રે 9.30 વાગ્યા સુધીમાં સોનાનો ભાવ રૂ.1,52,597 પર ટ્રેડ થઈ રહ્યો છે.
ડોમેસ્ટિક માર્કેટમાં પણ સોના-ચાંદીના ભાવ ગગડ્યા
સ્થાનિક બજારમાં સોના-ચાંદીના ભાવમાં ઘટાડો જોવા મળ્યો છે. મલ્ટી કોમોડિટી એક્સચેન્જ (MCX) પર વાયદાના વેપારમાં જ નહીં, પરંતુ ડોમેસ્ટિક માર્કેટમાં પણ સોનું અને ચાંદી સસ્તા થઈ રહ્યા છે. ઈન્ડિયન બુલિયન જ્વેલર્સ એસોસિએશન (IBJA)ની સત્તાવાર વેબસાઈટ મુજબ મંગળવારે 24 કેરેટ સોનું 1,55,668 રૂપિયા પર બંધ થયું હતું, જે બુધવારે ઘટીને 1,54,879 રૂપિયા પર સ્થિર થયું છે. જ્યારે ચાંદીના ભાવમાં પણ મોટો ઘટાડો નોંધાયો છે. એક કિલો ચાંદીનો ભાવ ગઈકાલના 2,52,340 રૂપિયાથી ઘટીને આજે 2,49,907 રૂપિયા થઈ ગયો છે.
અત્રે ઉલ્લેખનીય છે કે IBJA ની વેબસાઈટ પર અપડેટ કરવામાં આવતા સોના-ચાંદીના આ દરો સમગ્ર દેશમાં સમાન હોય છે. જોકે, જ્યારે તમે જ્વેલરી ખરીદો છો ત્યારે આ કિંમતી ધાતુઓ પર લાગુ પડતા GST અને મેકિંગ ચાર્જને કારણે અંતિમ ભાવમાં વધારો થાય છે.
