Tech News: ફોલ્ડેબલ ફોન ખરીદતા પહેલાં 100 વાર વિચારજો! જોવામાં 'કૂલ' લાગતા આ ફોનના યુઝર્સ આ 4 મોટી સમસ્યાઓથી પરેશાન
છેલ્લું અપડેટ : 25 Jun 2026
ફોલ્ડેબલ ફોનનો ક્રેઝ આજકાલ ખૂબ જ ઝડપથી વધી રહ્યો છે. વર્ષ 2021માં જ્યાં વિશ્વભરમાં માત્ર 15 લાખ ફોલ્ડેબલ ફોન વેચાયા હતા, ત્યાં 2025માં આ આંકડો એક કરોડને પાર પહોંચી ગયો. આ વર્ષે પણ તેના વેચાણમાં 20 ટકાનો ઉછાળો આવવાની આશા છે. લોકો તેને ખરીદી તો રહ્યા છે, પરંતુ તેનો ઉપયોગ કરનારા ઘણા લોકો તેની રોજબરોજની ઝંઝટોથી કંટાળી પણ ગયા છે. ફોલ્ડેબલ ફોન જોવામાં ભલે કૂલ લાગતા હોય, પરંતુ તેમાં કેટલીક એવી સમસ્યાઓ આવે છે જે નોર્મલ ફોન વાપરનારાઓને ક્યારેય નથી આવતી. તો ચાલો વાત કરીએ આવી જ કેટલીક મોટી મુશ્કેલીઓ વિશે.
બેટરી જલ્દી ખતમ થવાની ઝંઝટ
ફોન ગમે તે હોય, બેટરીની ચિંતા બધાને રહે છે. પરંતુ ફોલ્ડેબલ ફોનમાં આ ચિંતા બમણી થઈ જાય છે. આ ફોનને પાતળા બનાવવાના ચક્કરમાં કંપનીઓ તેમાં બહુ મોટી બેટરી લગાવી શકતી નથી. ઉપરથી, તેની બે-બે સ્ક્રીન બેટરીને ખૂબ ઝડપથી પી જાય છે. તેથી, વારંવાર ચાર્જર શોધવું એ માથાનો મોટો દુખાવો બની જાય છે.
હિંજ નબળી પડી જવી
ફોલ્ડેબલ ફોન જે જગ્યાએથી વળે છે, તેને 'હિંજ' કહેવામાં આવે છે. શરૂઆતથી જ આ ફોન્સમાં હિંજને લઈને ઘણી ફરિયાદો રહી છે. સતત ફોનને ખોલવા અને બંધ કરવાથી થોડા જ સમયમાં આ ભાગ ઢીલો પડવા લાગે છે. આ સિવાય ઘણા લોકોનું કહેવું છે કે જો હિંજની અંદર સહેજ પણ ધૂળ કે માટી જતી રહે, તો ફોન બરાબર કામ કરવાનું બંધ કરી દે છે અને પહેલા જેવો સ્મૂધ રહેતો નથી.
એપ્સ અને વીડિયો યોગ્ય રીતે ન દેખાવા
ફોલ્ડેબલ ફોનની સ્ક્રીનની લંબાઈ અને પહોળાઈ નોર્મલ ફોન કરતાં અલગ હોય છે. આ કારણે ઘણી બધી એપ્સ આ મોટી સ્ક્રીન પર બરાબર ફિટ બેસતી નથી. જ્યારે તમે કોઈ વીડિયો જુઓ છો, ત્યારે સ્ક્રીનની ઉપર અને નીચે ઘણી બધી ખાલી જગ્યા (કાળી પટ્ટી) દેખાય છે, જેના કારણે મોટી સ્ક્રીનનો કોઈ ખાસ ફાયદો મળતો નથી. આ સિવાય, વચ્ચેથી જ્યાંથી ફોન વળે છે, ત્યાં એક લકીર (ક્રીઝ) હંમેશા દેખાય છે. આ લકીર વીડિયો જોવાની કે સ્ક્રોલ કરવાની મજા બગાડી નાખે છે.
સ્ક્રીન તૂટવાનો સતત ભય
નોર્મલ ફોનની સરખામણીમાં ફોલ્ડેબલ ફોનની અંદરની સ્ક્રીન ઘણી વધારે નાજુક અને સોફ્ટ હોય છે. ફોન હાથમાંથી છૂટીને નીચે પડવા પર તેના ડેમેજ થવાનું જોખમ ખૂબ વધારે રહે છે. આ ડરથી બચવા માટે કંપનીઓ સ્ક્રીન પર પ્લાસ્ટિકનું કવર (પ્રોટેક્ટર) લગાવીને આપે છે. પરંતુ થોડા સમયના વપરાશ પછી આ પ્રોટેક્ટરમાં હવાના પરપોટા (બબલ્સ) બનવા લાગે છે અને તે કિનારીઓથી ઉખડવા લાગે છે. એટલે કે નોર્મલ ફોનની જેમ આનું સ્ક્રીન પ્રોટેક્ટર પણ લાંબો સમય સાથ આપતું નથી.