અમેરિકાના પ્રતિબંધોના ડરથી ચીનની AI કંપનીઓ વિદેશમાં Nvidia ચિપ્સની ક્ષમતા બુક કરવા દોડી
અમેરિકાના અદ્યતન AI ચિપ્સ પરના નિકાસ પ્રતિબંધો વધુ કડક બનવાની આશંકા વચ્ચે ચીનની આર્ટિફિશિયલ ઇન્ટેલિજન્સ (AI) કંપનીઓએ વિદેશમાં Nvidia ચિપ્સથી સજ્જ ડેટા સેન્ટરની કમ્પ્યુટિંગ ક્ષમતા (Computing Capacity) ભાડે મેળવવાની તૈયારી શરૂ કરી છે. અમેરિકામાં Nvidiaના CEO જેન્સન હુઆંગ સાથે જોડાયેલા વિવાદને કારણે વોશિંગ્ટન રિમોટ એક્સેસ દ્વારા ચિપ્સના ઉપયોગ પર પણ નિયંત્રણો લાદી શકે તેવી ચિંતા ચીની ટેક કંપનીઓમાં વધી છે. આ અંગેની માહિતી મામલાથી પરિચિત ત્રણ સૂત્રોએ આપી છે.
વિદેશી ડેટા સેન્ટરમાં ચિપ્સની ક્ષમતા બુક કરવાની તૈયારી
અમેરિકા ચીનને Nvidiaની સૌથી અદ્યતન આર્ટિફિશિયલ ઇન્ટેલિજન્સ ચિપ્સની સીધી નિકાસ પર પ્રતિબંધ મૂકે છે. જોકે, ચીનની કંપનીઓ વિદેશમાં આવેલા ડેટા સેન્ટરમાં કમ્પ્યુટિંગ પાવર ભાડે લઈને આ ચિપ્સનો રિમોટ ઉપયોગ કરી શકે છે. હવે આ રસ્તો પણ બંધ થઈ શકે તેવી આશંકાથી ચીની કંપનીઓ વિદેશમાં ચિપ્સની ક્ષમતા અગાઉથી બુક કરવા માગે છે. ચીનની એક મોટી ક્લાઉડ સર્વિસ પ્રોવાઇડર કંપનીએ આંતરિક સ્તરે વિદેશમાં Nvidia ચિપ્સની ક્ષમતા સુરક્ષિત રાખવા અંગે ચર્ચા કરી છે. જ્યારે કેટલીક અન્ય કંપનીઓએ ડેટા સેન્ટર ઓપરેટર્સનો સંપર્ક કરીને ક્ષમતા અનામત રાખવા પૂછપરછ કરી છે. નાની AI લેબ્સ પણ આ દિશામાં વિચાર કરી રહી છે. ખાસ કરીને દક્ષિણ-પૂર્વ એશિયા (Southeast Asia)માં કમ્પ્યુટિંગ પાવર ભાડે આપતી મોટી કંપનીઓનો સંપર્ક કરવામાં આવી રહ્યો છે.
અમેરિકાના નવા કાયદાથી ચીનની ચિંતા વધી
ચીની કંપનીઓને આશંકા છે કે Nvidiaના CEO સાથે જોડાયેલો વિવાદ અમેરિકામાં ‘રિમોટ એક્સેસ સિક્યોરિટી એક્ટ’ (Remote Access Security Act - RASA)ને રાજકીય સમર્થન અપાવી શકે છે. આ પ્રસ્તાવિત કાયદા હેઠળ અમેરિકાના વાણિજ્ય વિભાગને (Commerce Department) પ્રતિબંધિત ટેક્નોલોજી સુધી ક્લાઉડ અને રિમોટ માધ્યમથી થતી પહોંચને નિયંત્રિત કરવાની સત્તા મળી શકે છે. અમેરિકી પ્રતિનિધિ ગૃહે (House of Representatives) જાન્યુઆરીમાં આ બિલને 369 વિરુદ્ધ 22 મતથી મંજૂરી આપી હતી. હવે તે સેનેટની મંજૂરીની રાહ જોઈ રહ્યું છે. જો આ કાયદો અમલમાં આવશે અને વિદેશી ક્લાઉડ દ્વારા Nvidia ચિપ્સનો ઉપયોગ પણ પ્રતિબંધિત થશે, તો ચીની AI ડેવલપર્સ માટે અદ્યતન કમ્પ્યુટિંગ પાવર મેળવવાનું વધુ મુશ્કેલ બની શકે છે.
જેન્સન હુઆંગ સાથે જોડાયેલા વિવાદથી ચર્ચા તેજ
Nvidiaના CEO જેન્સન હુઆંગે રવિવારે પોતાના વૈવાહિક સંબંધમાં બેવફાઈ કરી હોવાની વાત સ્વીકારી હતી. ‘ધ ન્યૂયોર્ક ટાઇમ્સ’ના અહેવાલ મુજબ, આ મામલે સંકળાયેલી મહિલા એલિસ હુઆંગ હતી, જે સિંગાપોર સ્થિત ક્લાઉડ કમ્પ્યુટિંગ કંપની મેગાસ્પીડની ભૂતપૂર્વ એક્ઝિક્યુટિવ રહી ચૂકી છે. અહેવાલમાં એવો પણ દાવો કરવામાં આવ્યો હતો કે અમેરિકી અધિકારીઓએ તેને ચીની ગુપ્તચર એજન્સી સાથે જોડાયેલી વ્યક્તિ ગણાવી હતી. જોકે, આ દાવાની સ્વતંત્ર રીતે પુષ્ટિ થઈ શકી નથી અને ચીને આ આરોપો નકારી કાઢ્યા છે. એલિસ હુઆંગના ચીનની અગ્રણી ટેક કંપનીઓ ટેન્સેન્ટ અને અલીબાબા સાથે વ્યાવસાયિક તથા રોકાણ સંબંધો હોવાની માહિતી પણ સૂત્રોએ આપી છે.
ગ્રે માર્કેટમાં Nvidia ચિપ્સની ખરીદી વધી
અમેરિકા દ્વારા પ્રતિબંધોના અમલમાં વધુ કડકાઈ લાવવાની સંભાવનાને કારણે ચીનના ગ્રે માર્કેટ (Grey Market)માં પ્રતિબંધિત Nvidia AI ચિપ્સની માંગ વધી રહી છે. વેપારીઓ અને વચેટિયાઓએ આ ચિપ્સનો સ્ટોક એકત્રિત કરવાનું શરૂ કર્યું હોવાની માહિતી સૂત્રોએ આપી છે. ખરીદદારોને ડર છે કે અમેરિકા અદ્યતન ચિપ્સ અને AI સર્વર્સની ચીનમાં ગેરકાયદે હેરફેર સામે મોટી કાર્યવાહી કરી શકે છે. તાજેતરમાં અમેરિકાની નિકાસ પ્રતિબંધોની યાદીમાં સામેલ ચીનની એક યુનિવર્સિટીએ પણ Nvidiaની શક્તિશાળી H200 AI ચિપ્સ ખરીદી હોવાની માહિતી ખરીદીના દસ્તાવેજોમાંથી સામે આવી છે. આ યુનિવર્સિટીના ચીનની પીપલ્સ લિબરેશન આર્મી (PLA) સાથે ગાઢ સંબંધો હોવાનું જણાવાયું છે.
AI સર્વર્સની હેરફેર મામલે અમેરિકામાં કાર્યવાહી
આ વર્ષે માર્ચમાં અમેરિકી ફરિયાદી પક્ષે સુપર માઇક્રો કમ્પ્યુટરના સહ-સ્થાપક યી-શિયાન ‘વૉલી’ લિયાવ સહિત ત્રણ લોકો સામે Nvidia ચિપ્સ ધરાવતા સર્વર્સને દક્ષિણ-પૂર્વ એશિયાની એક કંપની મારફતે ચીનમાં પહોંચાડવાના કથિત ષડયંત્રનો આરોપ મૂક્યો હતો. અમેરિકી ફરિયાદી પક્ષના જણાવ્યા અનુસાર, સંબંધિત કંપનીએ 2024થી 2025 દરમિયાન સુપર માઇક્રો પાસેથી આશરે 2.5 અબજ ડોલરના સર્વર્સ ખરીદ્યા હતા, જેમાંથી મોટો હિસ્સો કથિત રીતે ચીન તરફ વાળવામાં આવ્યો હતો. જોકે, આ કેસમાં આરોપીઓ સામે હજુ દોષ સાબિત થયો નથી. આ સમગ્ર ઘટનાક્રમ દર્શાવે છે કે અમેરિકા અને ચીન વચ્ચે અદ્યતન AI ટેક્નોલોજી અને સેમિકન્ડક્ટર ક્ષેત્રે સ્પર્ધા વધુ તીવ્ર બની રહી છે. અમેરિકાના સંભવિત નવા પ્રતિબંધો પહેલાં જ ચીની કંપનીઓ વિદેશમાં કમ્પ્યુટિંગ ક્ષમતા સુરક્ષિત કરવા સક્રિય થઈ છે.
