VIDEO: ANDARNI VAAT / હનુમાનગઢના મક્કાસરમાં આકાશી આફત, ભારે વરસાદથી ૨૦ થી ૩૦ મકાનોને નુકસાન!

રાજસ્થાનના હનુમાનગઢ જિલ્લામાં પડેલા ભારે વરસાદના કારણે મક્કાસર ગામમાં જળબંબાકારની ગંભીર પરિસ્થિતિ સર્જાઈ છે. અવિરત વરસેલા વરસાદી પાણીના નિકાલની યોગ્ય વ્યવસ્થા ન હોવાના કારણે સમગ્ર ગામમાં અનેક ફૂટ પાણી ભરાઈ ગયા છે. વરસાદી પાણી ઘરોની અંદર ઘૂસી જતાં ૨૦ થી ૩૦ જેટલા મકાનોને વ્યાપક નુકસાન પહોંચ્યું છે અને કેટલાક મકાનો ધારાશાયી થવાની સ્થિતિમાં આવી ગયા છે. આ આકાશી આફતને કારણે અનેક પરિવારો બેઘર બનીને વિસ્થાપિત થવા મજબૂર બન્યા છે. માર્ગો અને શેરીઓ જળમગ્ન થઈ જતાં સામાન્ય જનજીવન સંપૂર્ણપણે અસ્તવ્યસ્ત થઈ ગયું છે, જેનાથી ગ્રામજનો મોટો આર્થિક અને માનસિક સંતાપ ભોગવી રહ્યા છે.

સ્થાનિકોના જણાવ્યા અનુસાર, દર વર્ષે ચોમાસા દરમિયાન મક્કાસર ગામમાં પાણી ભરાવાની સમસ્યા વિકટ બને છે, પરંતુ તેનો કોઈ કાયમી ઉકેલ લાવવામાં આવતો નથી. પૂર જેવા સંકટ વચ્ચે ગ્રામજનોએ તાત્કાલિક ધોરણે પાણીના નિકાલ માટે ડ્રેનેજ સિસ્ટમની કાયમી સુવિધા ઊભી કરવાની વહીવટી તંત્ર પાસે મજબૂત માગણી કરી છે. ઘટનાની જાણ થતાં જ વહીવટી તંત્રના અધિકારીઓએ સ્થળની મુલાકાત લીધી છે અને પાણીના નિકાલ માટે પંપિંગ મશીનો ગોઠવવાની કામગીરી હાથ ધરી છે. આ ઉપરાંત પ્રશાસન દ્વારા વિસ્થાપિત પરિવારોને સલામત સ્થળે આશ્રય આપવા અને રાહત સામગ્રી પૂરી પાડવાની તજવીજ હાથ ધરવામાં આવી છે..

બ્યૂરો રિપોર્ટ જીએસટીવી