VIDEO: ANDARNI VAAT / શેખ સાહિબાએ કાશ્મીરી કળાને આપ્યો મોર્ડન ટચ!

જમ્મુ અને કાશ્મીરની સુંદર ઉપત્યાકા શ્રીનગરમાંથી યુવા ક્ષમતા અને સર્જનાત્મકતાનું એક પ્રેરણાદાયી ઉદાહરણ સામે આવ્યું છે. સિવિલ એન્જિનિયરિંગનો અભ્યાસ પૂર્ણ કર્યા બાદ પરંપરાગત કાશ્મીરી કળા તરફ વળેલાં યુવા ડિઝાઈનર શેખ સાહિબા પોતાના અનોખા આઈડિયાથી કાશ્મીરી ક્રાફ્ટને એક નવો જ મોર્ડન લુક આપી રહ્યાં છે. એન્જિનિયરિંગના નકશાઓ અને ટેકનિકલ જ્ઞાનને ફેશન ડિઝાઈનિંગની દુનિયામાં ભેળવીને તેમણે કાશ્મીરી પરંપરા અને આધુનિક ફેશનનો સુંદર સંગમ રચ્યો છે, જેને લોકો ખૂબ જ પસંદ કરી રહ્યા છે. બડિંગ ડિઝાઈનર શેખ સાહિબાનું માનવું છે કે કાશ્મીરની સમૃદ્ધ હસ્તકળા અને પરંપરાગત આરી કે તિલ્લા વર્ક જેવી કલાઓને જો આધુનિક વેસ્ટર્ન અને ફ્યુઝન કટ સાથે જોડવામાં આવે, તો તે ગ્લોબલ લેવલે ધૂમ મચાવી શકે છે. તેમના બુટિકમાં કામ કરતા કર્મચારી મોહમ્મદ અંસાર જણાવે છે કે શેખ સાહિબાના આ નવીનતમ અભિગમને કારણે માત્ર સ્થાનિક ગ્રાહકો જ નહીં, પરંતુ પ્રવાસીઓમાં પણ આ યુનિક ડ્રેસિસની માંગ ખૂબ વધી ગઈ છે. આનાથી પરંપરાગત કળા સાથે જોડાયેલા સ્થાનિક કારીગરોને પણ રોજગારીના નવા અને ઉત્તમ અવસરો મળી રહ્યા છે..

પોતાની ડિગ્રીનો ઉપયોગ એક અલગ ક્ષેત્રમાં કરીને સફળતાનો નવો માર્ગ કંડારનાર શેખ સાહિબા આજે કાશ્મીરની અનેક યુવતીઓ માટે પ્રેરણા સ્ત્રોત બન્યાં છે. સિવિલ એન્જિનિયરિંગમાંથી ડિઝાઈનર બનવાની તેમની આ અદભુત સફરે સાબિત કરી દીધું છે કે જો મનમાં કશુંક નવું કરવાનો ઉત્સાહ હોય, તો પરંપરાને પણ આધુનિકતાના રંગે રંગીને સફળતાના શિખરે પહોંચી શકાય છે.

બ્યૂરો રિપોર્ટ જીએસટીવી