VIDEO: ANDARNI VAAT / સુરેન્દ્રનગરમાં મેઘરાજાનું તાંડવ: શહેર સહિત લીંબડી પંથક બન્યો જળમગ્ન!

ગુજરાતના સુરેન્દ્રનગર જિલ્લામાં અવિરતપણે વરસી રહેલા તોફાની વરસાદના કારણે સમગ્ર પંથકમાં જળબંબાકારની અત્યંત ગંભીર પરિસ્થિતિ નિર્માણ પામી છે. સુરેન્દ્રનગર શહેરના મુખ્ય બજારો, નીચાણવાળા વિસ્તારો અને રહેણાંક સોસાયટીઓમાં વ્યાપક પ્રમાણમાં પાણી ભરાઈ જવાથી શહરીજનોનું દૈનિક જનજીવન સંપૂર્ણપણે અસ્તવ્યસ્ત થઈ ગયું છે. શહેરના મુખ્ય માર્ગો પર ઘૂંટણસમા પાણી ફરી વળવાના કારણે વાહનવ્યવહાર પર માઠી અસર પહોંચી છે અને અનેક વાહનો પાણીમાં બંધ પડી જતાં વાહનચાલકોને ભારે મુશ્કેલીઓનો સામનો કરવો પડી રહ્યો છે. આ ઉપરાંત જિલ્લાના લીંબડી તાલુકામાં મેઘરાજાએ રૌદ્ર સ્વરૂપ ધારણ કરતાં ગ્રામીણ વિસ્તારોની સ્થિતિ વધુ વિકટ બની છે. લીંબડી તાલુકાના ભાલગામડા સહિતના અનેક ગામોમાં ભારે વરસાદના કારણે રસ્તાઓ પાણીમાં ગરકાવ થઈ ગયા છે, જેના લીધે અનેક ગામડાઓનો સંપર્ક મુખ્ય મથકથી સંપૂર્ણપણે કપાઈ ગયો છે..

લીંબડીના ભાલગામડા ગામમાં ચોમેર પાણી ફરી વળતાં ખેતરો તળાવમાં ફેરવાઈ ગયા છે, જેના કારણે ચોમાસુ પાકને મોટું નુકસાન પહોંચવાની ભીતિ સેવાઈ રહી છે. ગામડાઓને જોડતા મુખ્ય માર્ગો પર પૂરના પાણી ફરી વળવાના લીધે એમ્બ્યુલન્સ, દૂધ અને શાકભાજી જેવી અતિ આવશ્યક સેવાઓની અવરજવર પણ અટકી પડી છે. નીચાણવાળા વિસ્તારોમાં આવેલા કાચા-પાકા ઘરો અને દુકાનોમાં વરસાદી પાણી ઘૂસી જતાં સ્થાનિક ગ્રામજનોની ઘરવખરી અને અનાજના જથ્થાને વ્યાપક ક્ષતિ પહોંચી છે. પાણીના યોગ્ય નિકાલના અભાવે ભાલગામડા સહિત આસપાસના વિસ્તારોમાં જળબંબાકારનો માહોલ સર્જાયો છે. સુરેન્દ્રનગર શહેરથી લઈને લીંબડી તાલુકાના ગ્રામ્ય વિસ્તારો સુધી વરસી રહેલા આ ધોધમાર વરસાદે સ્થાનિક લોકો માટે આજીવિકા અને રહેઠાણનું મોટું સંકટ ઊભું કરી દીધું છે..

બ્યૂરો રિપોર્ટ જીએસટીવી