VIDEO: ANDARNI VAAT / કુપવાડાનું સરહદી ગામ કેરાન બન્યું હોટ ફેવરિટ, પ્રવાસીઓનો જામ્યો મેળાવડો!

જમ્મુ-કાશ્મીરના સરહદી જિલ્લા કુપવાડાના સુંદર સીમાવર્તી ગામ કેરાન ખાતે પ્રવાસીઓની સંખ્યામાં અભૂતપૂર્વ વધારો જોવા મળી રહ્યો છે.. લાઈન ઓફ કન્ટ્રોલ પર સ્થિત આ મનોરમ ગામ તાજેતરના વર્ષોમાં દેશ-વિદેશના સૈલાનીઓ માટે એક અગ્રણી ટુરિસ્ટ ડેસ્ટિનેશન તરીકે ઉભરી આવ્યું છે. ઉનાળાની કળકળતી ગરમીથી રાહત મેળવવા અને કુદરતી સૌંદર્યનો આનંદ માણવા મોટી સંખ્યામાં સૈલાનીઓ કેરાન પહોંચી રહ્યા છે. સ્થાનિક નિવાસી વકાર અહમદે જણાવ્યું કે, પ્રવાસીઓના આગમનથી ગામમાં રોજીરોટી અને પ્રવાસન ક્ષેત્રે નવા અવસરો ઊભા થયા છે. ગામની શાંતિ, પહાડી વાતાવરણ અને કિશનગંગા નદીનો મનોરમ કિનારો પ્રવાસીઓને મંત્રમુગ્ધ કરી રહ્યો છે. એક સમયે સીમાવર્તી તણાવ માટે જાણીતો આ વિસ્તાર હવે પ્રવાસનના ધમધમાટથી ગૂંજી રહ્યો છે. કુદરતના ખોળે વસેલું આ ગામ મુલાકાતીઓ માટે એક અદ્ભુત અનુભવ સાબિત થઈ રહ્યું છે.

કેરાનની મુલાકાતે આવેલા પ્રવાસીઓએ પોતાના અનુભવો શેર કરતાં જણાવ્યું હતું કે, અહીનું વાતાવરણ, સ્થાનિક લોકોનો પ્રેમ અને સરહદી વિસ્તારનું અનોખું આકર્ષણ અદ્ભુત છે. તેમણે ઉમેર્યું કે, અહીંનું શાંત અને પ્રાકૃતિક વાતાવરણ શહેરી ભાગદોડથી દૂર એક અલગ જ માનસિક શાંતિ આપે છે. સીમાવર્તી ગામ હોવા છતાં સુરક્ષા દળો અને સ્થાનિક પ્રશાસન દ્વારા પ્રવાસીઓ માટે ઉત્તમ વ્યવસ્થા કરવામાં આવી છે. પ્રવાસનના વિકાસથી સ્થાનિક હોમસ્ટે અને હોટેલ ઉદ્યોગને નવું બળ મળ્યું છે, જેનાથી સ્થાનિક યુવાનોને રોજગારી મળી રહી છે. સરહદી વિસ્તારોમાં બદલાતી આ તસવીર કાશ્મીરમાં શાંતિ અને વિકાસનું ઉદાહરણ પૂરું પાડે છે. હાલમાં કેરાન ગામમાં સૈલાનીઓની ભીડ અને ઉત્સવ જેવો માહોલ સ્પષ્ટપણે જોઈ શકાય છે.

બ્યૂરો રિપોર્ટ જીએસટીવી