VIDEO: કાલોલમાં ખનીજ માફિયાઓનો આતંક, ખાણ-ખનીજ વિભાગની ટીમ પર કર્યો હુમલો

પંચમહાલના કાલોલ તાલુકામાં ખનીજ માફિયાઓનો આતંક ચરમસીમાએ પહોંચ્યો છે. વેજલપુર નજીક ઘુસર ગામે ગોમા નદીમાં ગેરકાયદે રેતી ખનન રોકવા ગયેલી ખાણ-ખનીજ વિભાગની ટીમ પર માફિયાઓએ પાવડા અને પથ્થરો વડે હિચકારો હુમલો કર્યો છે. રેતીની હેરાફેરી રોકવા ગયેલી ટીમે જ્યારે પરમિટ વગરના ૫ ટ્રેક્ટરો ઝડપી પાડ્યા, ત્યારે ટ્રેક્ટર માલિકો અને ખનીજ માફિયાઓએ ટોળું વળી કર્મચારીઓ પર હુમલો કર્યો હતો.

ગંભીર બાબત એ છે કે એક કર્મચારી પર ટ્રેક્ટર ચડાવી દેવાનો પણ પ્રયાસ થયો હતો. હાલ બે ઈજાગ્રસ્ત કર્મચારીઓ ગોધરા સિવિલ હોસ્પિટલમાં સારવાર હેઠળ છે. અધિકારીના જણાવ્યા મુજબ, અગાઉ પણ આ સ્થળે હુમલો થયો હતો અને પોલીસને રજૂઆત કરવામાં આવી હતી, તેમ છતાં માફિયાઓ બેફામ બન્યા છે. આ ઘટનાએ જિલ્લામાં કાયદો અને વ્યવસ્થાની સ્થિતિ પર ગંભીર સવાલો ઉભા કર્યા છે. વન વિભાગ અને પોલીસ હવે આ ગુનેગારો સામે કેવા કડક પગલાં ભરે છે તે જોવું રહ્યું.