VIDEO: 'દિવસે શાંતિની વાત અને રાતે આતંકવાદ...', UNમાં ભારતે પાકિસ્તાનને ઘેર્યું

સંયુક્ત રાષ્ટ્ર મહાસભા (UNGA)માં પાકિસ્તાનના વડાપ્રધાન શાહબાઝ શરીફના ભાષણ બાદ ભારતે જવાબ આપવાનો અધિકાર (Right of Reply) ઉપયોગ કરીને પાકિસ્તાનના દાવાઓ પર વળતો પ્રહાર કર્યો હતો. ભારતીય પ્રતિનિધિ પેટલ ગેહલોતે પાકિસ્તાનના આતંકવાદ, માનવાધિકારો અને અલ્પસંખ્યકો સાથેના વ્યવહાર સહિતના મુદ્દાઓ ઉઠાવ્યા હતા. ભારતે જમ્મુ-કાશ્મીર અંગે પણ પોતાનું વલણ સ્પષ્ટ કરતાં તેને ભારતનો અભિન્ન અને અવિભાજ્ય ભાગ ગણાવ્યો હતો.

ઓસામા બિન લાદેનના આશ્રયનો મુદ્દો ઉઠાવ્યો

ભારતીય પ્રતિનિધિએ 9/11ના આતંકવાદી હુમલાની 25મી વર્ષગાંઠનો ઉલ્લેખ કરતાં ઓસામા બિન લાદેનનો મુદ્દો ઉઠાવ્યો હતો. ભારતે કહ્યું કે 9/11 હુમલાનો મુખ્ય આરોપી ઓસામા બિન લાદેન પાકિસ્તાનમાં લાંબા સમય સુધી રહ્યો હતો. ભારતે આ મુદ્દાને પાકિસ્તાનના આતંકવાદ સામેના દાવાઓ સાથે જોડીને રજૂ કર્યો હતો.

પાકિસ્તાનની રાજકીય વ્યવસ્થા પર પણ પ્રહાર

ભારતીય પ્રતિનિધિએ પાકિસ્તાનની રાજકીય વ્યવસ્થા અને સૈન્યની ભૂમિકા અંગે પણ ટિપ્પણી કરી હતી. ભારત તરફથી એવો આક્ષેપ કરવામાં આવ્યો કે પાકિસ્તાનમાં ચૂંટાયેલી સરકારની સાથે સૈન્યનો પ્રભાવ મહત્વપૂર્ણ છે. 2024ની ચૂંટણી અંગે પણ પાકિસ્તાનમાં થયેલા રાજકીય વિવાદનો ઉલ્લેખ કરવામાં આવ્યો હતો.

અલ્પસંખ્યકો અને માનવાધિકારોનો મુદ્દો

ભારતે પાકિસ્તાનમાં ધાર્મિક અલ્પસંખ્યકોની સ્થિતિ અને કથિત માનવાધિકાર ઉલ્લંઘનનો મુદ્દો પણ સંયુક્ત રાષ્ટ્રના મંચ પર ઉઠાવ્યો હતો. ભારતીય પક્ષે પાકિસ્તાનના કડક ઇશનિંદા કાયદા અને ધાર્મિક અસહિષ્ણુતા અંગે સવાલો ઉઠાવ્યા હતા.

જમ્મુ-કાશ્મીર મુદ્દે ભારતનું વલણ સ્પષ્ટ

શાહબાઝ શરીફે પોતાના UNGA ભાષણમાં જમ્મુ-કાશ્મીરનો મુદ્દો ઉઠાવ્યો હતો અને તેને દક્ષિણ એશિયામાં શાંતિ સાથે જોડ્યો હતો. ભારતે તેના જવાબમાં સ્પષ્ટ કર્યું કે જમ્મુ-કાશ્મીર ભારતનો અભિન્ન અને અવિભાજ્ય ભાગ છે. ભારતે પાકિસ્તાનને પોતાના નિયંત્રણ હેઠળના વિસ્તારોમાં માનવાધિકારો અને સ્થાનિક પરિસ્થિતિ પર ધ્યાન આપવાની પણ વાત કરી હતી.