VIDEO: પુડુચેરીના 5મી વખત મુખ્યમંત્રી બન્યા એન.રંગાસ્વામી, NDA ગઠબંધનની બની સરકાર

દક્ષિણ ભારતના રાજકારણમાં આજે (13મી મે) મોટા ફેરફારો જોવા મળ્યા છે. એક તરફ પુડુચેરીમાં એન. રંગાસામીએ પાંચમી વખત મુખ્યમંત્રી તરીકે શપથ લીધા છે, તો બીજી તરફ પાડોશી રાજ્ય કેરલમમાં મુખ્યમંત્રીના નામ પર ચાલી રહેલું સસ્પેન્સ હવે અંતિમ તબક્કામાં પહોંચ્યું હોય તેવું જણાય છે.

રંગાસામીના નેતૃત્વવાળા NDA ગઠબંધને બહુમતી મેળવી હતી

પુડુચેરીના લોક ભવન ખાતે આયોજિત ભવ્ય શપથવિધિ સમારોહમાં ઉપ-રાજ્યપાલ કૈલાશ નાથને એન. રંગાસામીને પદ અને ગુપ્તતાના શપથ લેવડાવ્યા હતા. આ પ્રસંગે ભાજપના રાષ્ટ્રીય અધ્યક્ષ નિતિન નવીન સહિતના દિગ્ગજ નેતાઓ હાજર રહ્યા હતા. ચોથી મેના રોજ જાહેર થયેલા પરિણામોમાં NDA ગઠબંધને સ્પષ્ટ બહુમતી મેળવી હતી.

ચૂંટણી પરિણામોનું વિશ્લેષણ (કુલ બેઠકો: 30):

પુડુચેરીમાં 30 બેઠકો પર ચૂંટણી યોજાઈ હતી. AINRCએ 16 માંથી 12 બેઠકો જીતીને 75% નો સૌથી વધુ સ્ટ્રાઈક રેટ હાંસલ કર્યો. ભાજપે 10 માંથી 4 બેઠકો જીતીને 40% સાથે બીજું સ્થાન મેળવ્યું. કોંગ્રેસ 16 બેઠકો પર ચૂંટણી લડીને માત્ર 1 બેઠક જીતી શકી અને તેનો સ્ટ્રાઈક રેટ માત્ર 6% રહ્યો.

કેરલમમાં કેસી વેણુગોપાલ કે વીડી સતીશન?

કેરલમમાં મુખ્યમંત્રીના નામની જાહેરાત માટે ભારે કવાયત ચાલી રહી છે. પૂર્વ પ્રદેશ કોંગ્રેસ અધ્યક્ષ કે. મુરલીધરને રાહુલ ગાંધી સાથેની મુલાકાત બાદ દાવો કર્યો છે કે બુધવાર સવાર સુધીમાં નામ જાહેર થઈ જશે. સૂત્રોના જણાવ્યાનુસાર, હાઈકમાન્ડ કેસી વેણુગોપાલના નામ પર મહોર લગાવી શકે છે. ધારાસભ્ય દળની બેઠકમાં પણ 75-80% સભ્યોએ તેમને સમર્થન આપ્યું છે.વીડી સતીશનને 6 ધારાસભ્યોનું સમર્થન મળ્યું છે. જોકે, તેમને UDF ના સહયોગી પક્ષો (IUML અને કેરળમ કોંગ્રેસ-જોસેફ) તેમજ ત્રણ પૂર્વ પ્રદેશ અધ્યક્ષોનો ટેકો મળી રહ્યો છે.

અન્ય રાજ્યોની સ્થિતિ

ઉલ્લેખનીય છેકે, 5 રાજ્યોની વિધાનસભા ચૂંટણી બાદ બંગાળ, આસામ અને તમિલનાડુમાં શપથવિધિ સંપન્ન થઈ ચૂકી છે. પુડુચેરીમાં આજે નવી સરકાર કાર્યરત થઈ ગઈ છે, જ્યારે હવે સમગ્ર દેશની નજર કેરલમ પર ટકેલી છે.