હૈદરાબાદના ચારમીનાર પાસે ભીષણ આગ: બાળકો સહિત 17 લોકોના મોત

હૈદરાબાદમાં ચારમિનાર( Charminar in Hyderabad) નજીક એક ઇમારતમાં ભીષણ આગ લાગવાથી 17 લોકોના મોત થયાના અહેવાલ છે. આ આગમાં આ બધા લોકો ગંભીર રીતે ઘાયલ થયા હતા. આ આગ હૈદરાબાદના મીર ચોક વિસ્તારમાં આવેલી એક ઇમારતમાં લાગી હતી. આગ લાગવાનું કારણ હજુ સુધી જાણી શકાયું નથી. ફાયર વિભાગના એક અધિકારીએ જણાવ્યું કે તેમને સવારે 6.30 વાગ્યાની આસપાસ ફોન આવ્યો અને તેઓ ઘટનાસ્થળે પહોંચી ગયા.

આ ઘટના અંગે કેન્દ્રીય મંત્રી જી કિશન રેડ્ડીએ કહ્યું કે આવી ઘટનાઓ ખૂબ જ દુઃખદ છે. હું કેન્દ્ર સરકાર અને પ્રધાનમંત્રી સાથે વાત કરીશ અને આ ઘટનામાં માર્યા ગયેલા લોકોના પરિવારોને આર્થિક મદદ કરવાનો પ્રયાસ કરીશ. મુખ્યમંત્રી રેવંત રેડ્ડીએ આ ઘટના પર દુઃખ વ્યક્ત કર્યું છે. તેમણે કહ્યું કે તેમણે અધિકારીઓને રાહત કાર્ય ઝડપી બનાવવા અને ઘાયલોને શ્રેષ્ઠ સારવાર સુનિશ્ચિત કરવા જણાવ્યું છે.

માહિતી અનુસાર હૈદરાબાદ ઓલ્ડ સિટીમાં ગુલઝાર હાઉસ પાસે આગ ફાટી નીકળી હતી, જે ઐતિહાસિક સ્મારક ચારમિનારની નજીકનો વિસ્તાર છે, જેના પરિણામે બાળકો સહિત 17 લોકોના મોત થયા હતા. કેટલાંક લોકો ફસાયેલા હોવાથી બચાવ કામગીરી ચાલી રહી છે. 

રેસ્ક્યુ ટીમોએ અત્યાર સુધીમાં 10 થી 15 લોકોને સફળતાપૂર્વક બહાર કાઢ્યા છે. સ્થાનિક ધારાસભ્યએ પરિસ્થિતિનું મૂલ્યાંકન કરવા અને રાહત પ્રયાસોનું સંકલન કરવા માટે સ્થળની મુલાકાત લીધી છે.

મુખ્યમંત્રી રેવંત રેડ્ડીએ ઘટના અંગે વિગતવાર અપડેટ્સ મેળવવા માટે સંબંધિત મંત્રી પોન્નમ પ્રભાકર સાથે વાત કરી છે. મુખ્યમંત્રીએ આગથી પ્રભાવિત પરિવારોને સાંત્વના આપવા માટે ફોન દ્વારા પણ સંપર્ક કર્યો હતો.